सरावगीको एमाले प्रवेशले वीरगञ्जमा त्रिपक्षीय भिडन्तको संकेत, यी हुन् आकांक्षी

सरावगीको एमाले प्रवेशले वीरगञ्जमा त्रिपक्षीय भिडन्तको संकेत, यी हुन् आकांक्षी

A+ A A-

जनता समाजवादी पार्टी (जसपा) बाट वीरगञ्ज महानगरमा निर्वाचित मेयर विजय सरावगी २८ फागुनमा तामझामसहित एमाले प्रवेश गरेपछि वीरगञ्जमा नयाँ तरंग पैदा भएको छ ।

३० वैशाखमा हुने स्थानीय चुनावमा एमालेबाट मेयर उठ्ने गरी सरावगी प्रवेश गरेपछि वीरगञ्जको राजनीति रोचक मोडमा पुगेको छ । मेयरको आकांक्षासहित लोकतान्त्रिक समाजवादी पार्टी (लोसपा) का नेता राजेशमान सिंह एमाले प्रवेशको तयारीमा रहिरहेका बेला उनीभन्दा अघि नै सरावगी एमाले भएका हुन् ।

अघिल्लो चुनावमा तत्कालीन राजपाबाट उम्मेदवार बनेका सिंह १४ फागुनमै एमाले छिर्ने तयारीमा थिए । केही वडाध्यक्षसहित सिंहलाई पार्टी प्रवेश गराउन एमाले अध्यक्ष केपी ओलीले वीरगञ्ज जाने कार्यक्रम तय भइसकेको थियो । तर, एमालेको जिल्ला नेतृत्वले सिंहलाई स्वागत कार्यक्रम २१ फागुनलाई सार्‍यो ।

त्यसपछि पुनः २५ फागुनमा सारियो । त्यतिबेला पनि पार्टी प्रवेश हुन नसकेपछि ८ चैतमा सारिएको थियो । सिंहको पार्टी प्रवेश कार्यक्रम पटक-पटक सारेपछि एमाले नेताहरुरू प्रभु हजारा र बसुरुद्दिन अन्सारीको पहलमा सिंहभन्दा पहिल्यै सरावगीलाई एमाले प्रवेश गराइयो ।

सरावगीको प्रवेशले एमालेबाट उम्मेदवार हुने गरी तयारी गरेका सिंहलाई धक्का लाग्यो । मेयरमा बहालवाला सरावगीले नै टिकट पाउने गरी एमाले प्रवेश गरेपछि सिंह बिच्किए । अब उनी एमाले प्रवेश गर्ने सम्भावना न्यून छ । सिंह अहिले जसपातिर नजिकिएको वीरगञ्जका स्थानीय नेताहरू बताउँछन् । जसपाबाट मेयरको उम्मेदवार हुनेगरी पार्टी प्रवेश गर्न मंगलबार उनले केही महत्त्वपूर्ण बैठक गरेको स्रोत बताउँछ । सिंह जसपामा गए लोसपाबाट सुरेन्द्र कुर्मी मेयरको उम्मेदवार हुने सम्भावना छ ।

दलीय जनमत

०७४ को निर्वाचनमा जसपाबाट उम्मेदवार भएका विजय सरावगी १९ हजार ३ सय ९३ मत ल्याएर विजयी भएका थिए । वीरगञ्ज उद्योग वाणिज्य संघको आवद्धता छोडेर जसपाको राजनीतिमा आएका सरावगीसँग कांग्रेसका उम्मेदवार अजय द्विवेदी करिब २ हजार मतान्तरले पराजित भएका थिए । त्यतिबेला द्विवेदीले १७ हजार १ सय ९७ मत ल्याएका थिए । त्यसैगरी तत्कालीन राजपाका तर्फबाट उम्मेदवार बनेका राजेशमान सिंह तेस्रो भएका थिए । सिंहले १२ हजार १ सय ६५ मत ल्याएका थिए ।

त्यतिबेला एमाले पाँचौँ स्थानमा थियो । एमालेभन्दा अघि चौथो स्थानमा विजय गच्छदारको तत्कालीन फोरम लोकतान्त्रिकका उम्मेदवार विमल श्रीवास्तवले ८ हजार ७ सय १ मत ल्याएका थिए । एमालेबाट वीरगञ्ज महानगर मेयरका उम्मेदवार बसुरुद्दिन अन्सारीले ८ हजार ६ सय ८८ मत ल्याएका थिए । एमालेपछि छैटौँ नम्बरमा मत ल्याउने चाहिँ माओवादीमा रहवर अन्सारी थिए ।

फोरम लोकतान्त्रिकबाट त्यतिबेला मेयरको उम्मेदवार भएका विमल श्रीवास्तव प्रतिनिधिसभा निर्वाचनमा उपेन्द्र यादव नेतृत्वको संघीय समाजवादी फोरमबाट उम्मेदवार भए । सांसदमा निर्वाचित श्रीवास्तव अहिले यादवलाई छोडेर महन्थ ठाकुर नेतृत्वको लोसपामा आवद्ध छन् । सरावगी र श्रीवास्तवको दोस्तीकै कारण अहिले सरावगी एमाले प्रवेश गरेको बताइन्छ । श्रीवास्तव स्वयम् पनि एमाले प्रवेशको तयारीमा रहेको वीरगञ्जका एमाले नेताहरूको दाबी छ ।

चर्चामा दर्जन आकांक्षी

अहिले वीरगञ्ज महानगरको मेयरका लागि दर्जन नेताहरू आकांक्षी देखिएका छन् । एमालेबाट नवप्रवेशी मेयर सरावगी प्रमुख दाबेदारका रूपमा देखिएका छन् । शिलापत्रसँग कुराकानी गर्दै सरावगीले आफू पुनः मेयरको आकांक्षी भए पनि पार्टीले गर्ने निर्णय मुख्य हुने बताउँछन् । उनले भने, ‘अहिले नै केही भन्नसक्ने अवस्था छैन । ८ चैतपछि धेरै कुरा भन्न सकिएला ।’

वर्तमान मेयर मात्र होइन, कांग्रेसबाट निर्वाचित उपमेयर शान्ति कार्कीले पार्टीभित्र आफू मेयरको आकांक्षी रहेको बताएकी छिन् । कांग्रेसभित्र आकांक्षीको संख्या धेरै भए पनि आकांक्षीहरू भने खुलेर आइसकेका छैनन् । कार्कीले शिलापत्रसँगको कुराकानीमा उपमेयर भएर धेरै काम गर्न नसकेकाले मेयरका लागि दाबी गरेको बताएकी छिन् ।

कांग्रेसबाट कार्कीबाहेक विजय सर्राफ पनि दाबेदारका रूपमा रहेका छन् । ०७४ को निर्वाचनमा पनि दाबी गरेका सर्राफ यो पटक नछोड्ने मुडमा देखिएका छन् । शिलापत्रसँग कुराकानी गर्दै सर्राफले आफू प्रमुख दाबेदार रहेको बताए । सर्राफले भने, ‘अघिल्लो निर्वाचनमा महानगरमा भएको सर्भेमा दोस्रो नम्बरमा रुचाइएको नेता हुँ, अहिले त छोड्ने कुरा नै हुँदैन ।’

अघिल्लो निर्वाचनमा कांग्रेसबाट अजय द्विवेदी मेयरको उम्मेदवार भएका थिए । अहिले पनि द्विवेदीको नाम चर्चामा रहे पनि उनी प्रतिनिधिसभातिर जाने चर्चा पनि वीरगञ्जमा चलेको छ । कांग्रेसबाट राजेन्द्रबहादुर अमात्य, श्याम पटेल र ओमप्रकाश शर्मा पनि मेयरका आकांक्षी देखिएका छन् ।

माओवादी केन्द्रबाट भने मेयरका दाबेदार खुलेका छैनन् । अघिल्लो पटकका उम्मेदवार रहवर अन्सारीको नाम चर्चामा रहेको छ । तर, माओवादी केन्द्र वीरगञ्जमा कमजोर रहेकाले गठबन्धनमा जाने स्थितिमा को हुने भन्ने प्रस्ट भइसकेको छैन । एमालेमा प्रवेश गर्न लागेका सिंह अहिले जसपा प्रवेश गर्ने मुडमा देखिएकाले उनी जसपाबाट मेयर उम्मेदवार हुनसक्ने अनुमान गरिएको छ ।

सिंहले आफू चुनावी तयारीमा लागिरहेको बताए । शिलापत्रसँग कुराकानी गर्दै उनले भने, 'अहिलेको मेयरले महानगरमा गरेको भ्रष्टाचारविरुद्ध आवाज उठाइरहेकाले अब महानगरको नेतृत्व हामी आउने गरी तयारी गरिरहेका छौँ ।' सिंहले आफू एमाले प्रवेश गर्ने सम्भावना अब न्यून रहेको बताए ।

त्रिपक्षी भिडन्तको सम्भावना

वीरगञ्जको मेयरमा दाबी गरिरहेका पात्र हेर्दा त्रिपक्षीय भिडन्त हुने सम्भावना देखिएको छ । एमालेबाट उम्मेदवार हुँदा सरावगी बलियो दाबेदारका रूपमा देखिन्छन् । व्यवसायी पृष्ठभूमिका सरावगीको व्यक्तिगत लोकप्रियता र एमालेको जनमतका कारण उनी बलियो दाबेदारका रूपमा देखिएका हुन् ।

त्यसैगरी राजेशमान सिंह पनि बलियो जनमत भएका स्थानीय नेता हुन् । उनी जसपाबाट उम्मेदवार भएको अवस्थामा जसपाको जनाधार र सिंहको व्यक्तिगत जनमतले सिंहको प्रतिस्पर्धा निकै बलियो हुने आकलन गरिएको छ । त्यसबाहेक वीरगञ्जमा कांग्रेस त्यति नै बलियो दाबेदार पार्टी हो । अघिल्लो निर्वाचनमा दोस्रो भएको कांग्रेसमा फोरम लोकतान्त्रिक समाहित भएपछि भोट बढ्ने र मुख्य प्रतिस्पर्धी बन्ने अनुमान छ ।

प्रकाशित मिति: बुधबार, चैत २, २०७८ २२:५५