पत्रकारले प्रेस स्वतन्त्रता मागेका हुन्, सत्ता होइनः उपाध्यक्ष पोख्रेल

A+ A A-

नेपाल पत्रकार महासंघका केन्द्रीय उपाध्यक्ष विपुल पोख्रेलले प्रेस स्वतन्त्रताको सवालमा इमानदार बन्न नेपाल सरकारलाई आग्रह गरेका छन् ।

उपाध्यक्ष पोख्रेलले गत १ भदौदेखि लागू भएका मुलकी संहिताका केही प्रावधानहरु संशाेधन गर्छु भनेको सरकारले अहिलेसम्म संशाेधन प्रक्रिया नै अगाडि नबढाएको र मिडिया काउन्सिल विधेयक त पत्रकारिता नै समाप्त पार्ने खालको ल्याएको भन्दै सरकार प्रेस स्वतन्त्रताप्रति इमानदार नदेखिएको बताए ।

‘क्रमशः कडा कानून ल्याउँदै सरकारले प्रेस स्वतन्त्रतालाई संकुचन गर्दै छ, प्रेस स्वतन्त्रताको पक्षमा पत्रकातिता क्षेत्र तथा नागरिक समाजबाट आएको आवाजलाई बाेवास्ता गर्दै छ । यो कुरामा आफूलाई नसच्याएर प्रेस स्वतन्त्रताविरोधी मनसाय राखिरहेमा त्यो सरकारकै लागि दूर्भाग्य हुनेछ,’ उपाध्यक्ष पोख्रेलले भने ।

आफूहरुले प्रेस स्वतन्त्रता माग्दा सरकारले सत्ता नै मागेझैं गरी प्रतिक्रिया दिइरहेको भन्दै पोख्रेलले स्वतन्त्रताका पक्षधरलाई नजिस्काउन सरकारलाई चेतावनी पनि दिए ।

‘सबै दलहरुको चुनावी घोषणापत्रका प्रेस स्वतन्त्रताको कुरा छ, हाम्रो सञ्चार नीतिले स्वतन्त्र प्रेसको परिकल्पना गरेको छ, संविधानमा पूर्ण प्रेस स्वतन्त्रता लेखिएको छ, त्यही प्रेस स्वतन्त्रता माग्दा पत्रकारिता क्षेत्रलाई उल्टो आक्षेप लगाउने र पत्रकार महासंघको मानमर्दन गर्ने खेलमा स्वयं सरकारका मन्त्रीहरु देखिनु अनौठो हो,’ उनले भने ।

सरकारले ल्याउन चाहेका कानुनहरुबाट सरकार नियन्त्रणमुखी हुँदै गएको प्रतीत भएको भन्दै पोख्रेलले कानुन ल्याउने प्रयास हुँदा सरोकारवालाहरु असन्तुष्ट बन्छन् भने सरकारले कसका लागि कानून बनाउँदै छ भन्ने प्रश्नसमेत गरे ।

असन्तुष्टहरुसँग संवाद नचाहने सरकारी प्रवृत्तिले देशलाई भयावहको अवस्थातर्फ धकेल्ने खतरा पनि उनले औंल्याए ।

‘अहिले अलग अलग रुपमा जुन असन्तुष्टि सडकमा पोखिँदै छ, त्यसले संगठित भएर सशक्त आन्दोलनको रुप धारण गर्यो भने के होला भन्ने तर्फ सोच्न पनि सरकारको ध्यानाकर्षण हुन जरुरी छ,’ उपाध्यक्ष पोख्रेलले भने ।

पत्रकार महासंघ कतारले आयोजना गरेको तालिममा सहभागी हुन कतार पुगेका पोख्रेलले कतारमा रहेका पत्रकारहरुसँग कुरा गर्दै प्रेस स्वतन्त्रताको पक्षमा भएको आन्दोलनमा कुनै सम्झौता नहुने बताए ।

पत्रकार महासंघले स्वतन्त्रताको पक्षमा लडाइँ सुरु गरेको छ, स्वतन्त्रताको पक्षको लडाइँ सधैं सफल हुने लडाइँ हो त्यसैले स्वतन्त्रता प्राप्त नहुन्जेल लडाइँ जारी रहन्छ,’ उनले भने ।

पोख्रेलले मिडिया विधेयक र सूचना प्रविधि विधेयक जस्ताको तस्तै पास भए पत्रकार मात्रै हाेइन, सबै नागरिकहरुको अभिव्यक्ति स्वतन्त्रतासमेत खोसिने धारणा राखे ।

‘विदेशमा बस्ने तपाईंहरु सबैजना सामाजिक सञ्जालका माध्यमबाट नेपालमा रहेका आफ्ना परिवारसँग जोडिनुभएको छ, सूचना प्रविधि विधेयक जस्ताको तस्तै संसदबाट पास भएर आएमा अब त्यो अवसरको अन्त्य हुन सक्छ,’ उनले भने ।

प्रकाशित मिति: मंगलबार, असार ३, २०७६ ०१:१९