उपाधिमा खेलाँची: मनलाग्दी बनाइँदैछ महानायक र महानायिका

A+ A A-

अभिनेताद्वय शिव श्रेष्ठ र भुवन केसीले अभिनेत्री गौरी मल्ललाई महानायिकाको उपाधि भिराइदिएका छन् । 'डाँडाको बरपीपल' फिल्मको गीत रिलिज कार्यक्रममा उनीहरूले गौरीलाई महानायिका बनाइदिएका हुन् । आफूलाई महानायिका सम्बोधन गरेको सुन्दा गौरी केही भावुक बनिन् ।

उपाधि भिराउने होड यतिमै रोकिएन । भुवनले त शिव श्रेष्ठलाई पनि महानायकको पहरी लगाइदिए । भुवनले निर्धक्क बोले, 'जसले पाकिस्तानदेखि नेपाल थर्कायो । थुप्रै सुपरहिट चलचित्र दिएको छ । ऊ महानायक नभएर को हुन्छ ?’

नेपाली फिल्म क्षेत्रको बिडम्बना, यहाँ जसले जसलाई पनि महानायक वा महानायिका बनाइदिएका छन् । आफूलाई मन पर्ने कलाकारलाई नै यी उपाधि भिराउनेहरूको जमात बाक्लो छ ।

'डाँडाको बरपीपल' फिल्मको कार्यक्रममा गौरी, शिव र भुवन ।

के-का आधारमा महानायक वा महानायिका चुन्ने ? यसको मपदण्ड यहीँ हो भन्ने छैन । त्यसैले त यहाँ महानायक-महानायिकाको उपाधि सधैँ विवादित छ ।

विवादको सिलसिला अभिनेता राजेश हमाललाई 'महानायक' भनेदेखि नै सुरु भएको हो । एक टिभी अन्तर्वार्तामा प्रस्तोताले राजेश हमाललाई महानायक सम्बोधन गरे । पछि चलचित्र प्रविधिक संघको ९औँ वार्षिक उत्सवमा पनि राजेशलाई महानायक सम्बोधन गरियो । त्यसयता कतिपयले राजेशलाई नै महानायक स्वीकारे ।

तर, कतिपयलाई त राजेशको 'महानायक' उपाधि पाएको पचेन । कतिपयले भुवन केसीलाई महानायक भने, कतिले अन्य विभिन्न अभिनेताको नाम लिए । त्यसमा पनि राजेश र भुवनबीच नै प्रतिस्पर्धा रोचक बन्यो ।

अहिलेसम्म पनि राजेशलाई महानायक नस्वीकार्नेहरू धेरै छन् । जसको एउटा उदाहरण भुवन आफैँ हुन् । त्यसैले त उनले शिवलाई महानायक भनिरहेका छन् । लकडाउनका समयमा निर्देशक दीपाश्री निरौलाले पनि राजेश हमालको महानायक उपाधिमाथि प्रश्न गरेकी थिइन् । जसका कारण दीपाश्रीले राजेशका समर्थकबाट नमीठो गाली भेटिन् । अन्तत: दीपाले माफी नै माग्नुपर्‍यो ।

दीपाश्रीले माफी मागेपछि पनि केही फिल्मकर्मीले यसलाई विषय बनाइरहे । जसको उदाहरण थिए, निर्देशक सोभित बस्नेत । शोभितले भन्ने गरेका छन्, 'औचित्य नै नभएको संस्थाले महानायक बनाएर हामीले त्यसलाई स्वीकार्दैनौँ । असली महानायक त भुवन केसी हो ।'

आफ्नो 'महानायक' उपाधिमाथि प्रश्‍न उठिरहँदा राजेश हमाल भने मौन रहे । उनले आफूलाई दिएको महानायक उपाधि गुमाउन चाहेनन् । बरु उल्टै आफ्ना समर्थकलाई सम्बोधन गर्दै दीपाश्रीलाई माफी दिन बोले ।

एउटै स्टेजमा शिव, राजेश र भुवन

यता आफूलाई महानायक बनाइदिने फिल्मकर्मीसँग भुवन दंग छन् । तर, भुवनलाई महानायक तिनैले बनाएका छन्- जसको राजेशसँग रिसिइबी छ । त्यो नभए, भुवनसँग निकट व्यक्तिले नै उनलाई महानायक भनिरहेका छन् ।

कुरा महानायकमा मात्र कहाँ सीमित रह्यो र ? अहिले त अभिनेत्रीहरूलाई पनि 'महानायिका' बन्ने रहर जागेको छ । केही समयअघि एक संस्थाले अभिनेत्री करिश्मा मानन्धरलाई 'महानायिका'को उपाधि दियो । अभिनेता राजेश हमालले नै करिश्मालाई महानायिकाको ब्याज लगाइदिएका थिए ।

करिश्मालाई महानायिकाको स्यास लगाइदिँदै राजेश हमाल ।

आफूलाई महानायिका घोषणा गरिदिँदा करिश्मा मख्ख परिन् । तर, उनलाई दिइएको यो पदवी धेरैलाई स्वीकार्य भएन । धेरैले यसको आलोचना गरे ।

करिश्मालाई नै महानायिका नस्वीकारेका बेला भुवन र शिवले गौरीलाई महानायिका बनाइदिएका छन् । भुवन र शिवले आफूलाई महानायिका घोषणा गर्दा गौरी पनि मख्ख हुने नै भइन् । तर, आफ्नो बचाउमा उनले भनिन्, 'यो देशमा उपाधिको कुनै औचित्य छैन । मान्छेलाई विभिन्न किसिमका उपाधिले सिंगारेको देख्छु । तर, मलाई उपाधि चाहिँदैन ।'

गौरीलाई महानायिका घोषणा गरेका भुवन र शिवमाथि अहिले धेरैले प्रश्न उठाइरहेका छन् । कतिपयले त हावाकै भरमा महानायिका घोषणा गरिदिएको भन्दै उनीहरूको आलोचना गरेका छन् ।

महानायिकाकै प्रसंगमा कतिपयले अभिनेत्री रेखा थापालाई महानायिका बनाउनु पर्ने कुरा नउठाएका होइनन् । लामो समय फिल्म क्षेत्रमा राज गरेकी रेखालाई महानायिका स्वीकार्न केही फिल्मकर्मीहरू नै तयार छन् । नायिका भएर पनि रेखाले फिल्म क्षेत्रमा नायकत्व देखाएको कुरा नकार्न कसैले सक्दैन । कोही अभिनेत्रीले नै हलसम्म दर्शक तान्न ल्याकत राख्न सक्थ्यो भने त्यो रेखा थापा नै थिइन् । त्यसैले उनलाई महानायिका घोषणा गर्नुपर्ने फिल्मकर्मीहरूले नै माग गरेका थिए ।

यस विषयमा रेखा थापा भने मौन छिन् । उनी पनि आफ्नो बचाउमा नै जवाफ दिन्छिन्, 'मलाई कुनै उपाधिको मोह छैन ।' गौरी मल्ले भनेजस्तै, नेपालमा कुनै उपाधिको औचित्य छैन । यसको एउटै कारण हो- फिल्मकर्मीले नै गरेको खेलाँची । एउटा फिल्मको गीत रिलिज कार्यक्रममा नै 'महानायक' वा 'महानायिका'को उपाधि भिराउने गरिन्छ । त्यो पनि एउटै उपाधि दुई-तीन जनालाई ।

निश्चित कुनै आधारविना नै मनलाग्दी कलाकारलाई उपाधि भिराउने प्रतिस्पर्धाले कसैको भलो गर्दैन । नेपाली फिल्‍मकर्मीबीचको एकरुपतामा पनि यो ठूलो प्रश्न चिह्न हो ।

प्रकाशित मिति: सोमबार, असोज ४, २०७८ १७:२८