भिजिट भिसामा यूएई पुगेका ५ हजारभन्दा बढी कामदार रोजगारी नपाएपछि अलपत्र

A+ A A-

झापा, कमल गाउँपालिकाका सुमन सुवेदी राम्रो रोजगारी पाउने आसमा चार महिनाअघि भिजिट भिसामा यूएई पुगेका थिए । सुवेदीलाई दलालले राम्रो रोजगारीमा लगाइदिने आश्वासन देखाएपछि २ लाख ३० हजार तिरेर यूएई गएको उनले जानकारी दिए ।

यूएईबाट सुवेदीले शिलापत्रलाई भने, 'यूएई आएको चार महिना भयो तर रोजगारी पाएको छैन । यूएई पठाउने एजेन्ट सम्पर्कमा नभएका कारण अलपत्र परेको छु ।'

नेपालबाट एजेन्टले सुरक्षा गार्डमा रोजगारी लगाइदिने प्रलोभन देखाएर यूएई पुगेको उनले बताए । सुवेदीले भने, ‘रोजगारी पाउने कुरा त पर जाओस्, कसरी घर फर्किनु भन्ने चिन्ता थपिएको छ । एकातिर कोरोना महामारीको समस्या कायमै छ । कोरोना महामारीका कारण रोजगारी पाउने सम्भावना छैन ।'

त्यही भएर स्वदेश फर्किनुपर्ने बाध्यता छ,’ उनले भने, ‘हामीलाई यूएई भिजिट भिसामा पठाउने एजेन्ट झापाको कुँवर लिम्बू सम्पर्कबाहिर छन् । एकातिर पैसा खाइदियो भने अर्कोतिर काम नपाएर अलपत्र बस्नुपरेको छ । अब परिवार र यूएईमा रहेका नेपालीसँग सहयोग मागेर घर फर्किन खोज्दै छु ।’ भिजिट भिसामा आएका धेरै नेपाली यूएईमा अलपत्र अवस्थामा बसेको उनको भनाइ छ ।

सुवेदीसँगै अन्य सात जना झापाका युवा पनि भिजिट भिसामा यूएई पुगेका छन् तर उनीहरूले पनि काम पाएका छैनन् । अलपत्र अवस्थामै छन् । उनीहरूले स्वदेश फर्किन यूएईस्थित नेपाली दूतावाससँग सहयोग र गुहार मागिरहेको बताएका छन् ।

यस्तै, पोखरा माछापुच्छ्रे नगरपालिकाकी गौरिका दाहाल पनि भिजिट भिसामा चैत महिनामा यूएई पुगेकी थिइन् । उनलाई एजेन्टले २ लाख ६० हजार लिएर यूएई भिजिट भिसामा पुर्‍याएको भियो ।

रोजगारी नपाएपछि खान र बस्न समस्या भएको छ । नेपालबाट स्टार होटलमा वेटरमा रोजगारी लगाइदिने प्रलोभन देखाएर एजेन्टले यूएई पुर्‍याएको उनी बताउँछिन् ।

‘भिजिट भिसामा यूएई ल्याएका कतिपय महिलालाई एजेन्टले जबर्जस्ती घरेलु काममा लगाउने गरेका छन् । एजेन्टले नेपालमा एउटा काम भनेर यूएई ल्याएपछि अर्कै काममा लगाउँछन् । यो सबैभन्दा ठूलो समस्या हो,’ गौरिकाले भनिन्, ‘भिजिट भिसामा आएका नेपाली समस्या परेका छन् । कतिपयलाई खान–बस्नको समस्या छ । उनीहरूलाई यूएईस्थित नेपाली दूतावासले सहयोग गदैँन ।’

हाल गौरिकासँग अन्य नौ जनाभन्दा धेरै भिजिट भिसामा गाएका नेपाली अलपत्र अवस्थामा यूएईमा बसेका छन् । उनीहरू सबै उद्धारको प्रतीक्षामा छन् ।

भिजिट भिसामा यूएई भनेर ओमान, कुवेत, इराक, बहराइन, इरानलगायत खाडीका देशहरूमा घरेलु काममा लगाइने गरेको भिजिट भिसामा गएका महिलाले नै उजुरी गरिरहेको वैदेशिक रोजगार विभागको उजुरी शाखाले जनाएको छ ।

सामाजिक सञ्जालमा भिजिट भिसामा कामदार पठाउने प्रायः म्यानपावरका एजेन्ट र वैदेशिक रोजगारीमा गएका नेपाली रहेका छन् । भिजिट भिसामा कामदार पठाउने सञ्जाल यूएईदेखि नेपालको गाउँसम्म फैलिएको विभागका महानिर्देशक कृष्णप्रसाद दवाडीले जानकारी दिए ।

भिजिट भिसामा नबुझी गएका धेरै कामदार यूएईमा समस्यामा परेको गुनासो विभागमा आउने गरेको उनको भनाइ छ ।

१५ हजार नेपाली भिजिट भिसामा यूएई पुगे

यूएईस्थित नेपाली दूतावासका कर्मचारीका अनुसार ५ हजारभन्दा बढी भिजिट भिसामा यूएई पुगेका नेपाली कामदार रोजगारी नपाएपछि अलपत्र अवस्थामा बसेका छन् ।

रोजगारीको प्रलोभनमा परी एजेन्टमार्फत यूएई भिजिट भिसामा आएका नेपालीहरू अलपत्र परेको समस्या लिएर दूतावास धाउने गरेका छन् । यूएईका विभिन्न शहरमा भिजिट भिसामा आएका ५ हजारभन्दा बढी नेपाली रोजगारी नपाएपछि अलपत्र परेको सूचना पाएको दूतावासका ती कर्मचारीले बताए ।

गत भदौ महिनायता भिजिट भिसामा यूएई १५ हजार ५ सय जना नेपाली गएको अध्यागमन विभागका तथ्यांकमा छ । भिजिट भिसामा सबै प्रक्रिया पुगेका नागरिकलाई मात्र अध्यागमन अनुमति दिँदै आएको विभागका सूचना अधिकारी झाङ्कनाथ ढकालले बताए ।

भिजिट भिसामा प्रक्रिया नपुगेका र शंका लागेका व्यक्तिलाई विभागले फर्काउने गरेको उनको भनाइ छ ।
विभागले भिजिट भिसामा यूएई हिँडेका र कागजात नपुगेका ७ सयभन्दा बढी व्यक्तिलाई फर्काएको जानकारी दिएको छ ।

एयर अरेबिया र अध्यागमनका कर्मचारीले भ्रमणको उद्देश्य नखुले पनि भिजिट भिसामा भएकालाई बोर्डिङ पास र प्रस्थान अनुमति (डिपार्चर) दिँदै आएको छ । यसरी भिजिट भिसामा जाने कामदारलाई सेटिङमा राति २ बजेको एयर अरेबियाको उडानमार्फत पठाउने गरेको पाइएको अनुसन्धानबाट खुलेको वैदेशिक रोजगार विभागले जनाएको छ ।

भिजिट भिसामा यूएई जाने व्यक्तिसँग टिकटसहित सेटिङका लागि प्रतिव्यक्ति २ लाख ५० हजार रुपैयाँ म्यानपावरसँग एजेन्टले लिएर पठाउने गरेका छन् । म्यानपावर, कन्सल्टेन्सी, ट्राभल र एजेन्टले सबैभन्दा धेरै भिजिट भिसामा यूएई नेपाली पठाइरहेको पाइएको छ ।

यूएईसँग खाडीका अन्य देशमा समेत ट्राभल एजेन्सी, कन्सल्टेन्सी, म्यानपावर कम्पनी र तिनैका प्रतिनिधि एजेन्टले भिजिट भिसाका नाममा रोजगारीमा कामदार पठाइरहेको पाइएको हो ।

प्रकाशित मिति: आइतबार, साउन १७, २०७८ १६:२२