फेरि विवादमा दुर्गेश, किन मच्चाइरहन्छन् एकपछि अर्को लफडा ?

A+ A A-

गायक तथा मोडल दुर्गेश थापाले संगीतिक क्षेत्रमा विवादित छवि बनाएका छन् । उनका प्रायः गीतहरू लफडामा तानिरहन्छन् । कहिले तिहारको गीत विवादमा मुछिन्छ, कहिले तीजको गीत ।

पर्वकेन्द्रित सिर्जना ल्याउने क्रममा यस वर्ष दुर्गेशले तीजका लागि ‘बीच्च बीच्चमा ४ – ख्यास्स पुतली’ बोलको गीत सार्वजनिक गरे । युट्युबमा राम्रो दर्शक पाइरहे पनि यो गीतले सरकारी नियामक निकायको भने कन्सिरी तताएको छ । गीतका शब्दमा आपत्ति जनाउँदै लोक तथा दोहोरी प्रतिष्ठानले दुर्गेशलाई पत्र नै काटेको छ । पत्रमा गीतमा प्रयुक्त ‘ख्यास्स पुतली’ शब्द झिकेर गीत सार्वजनिक गर्न निर्देशन दिइएको छ ।

‘ख्यास्स पुतली’ शब्द भड्किलो भएको र यसले तीज गीतको मर्मलाई मारेको भन्दै संगीत क्षेत्रकै कतिपय अग्रजले समेत दुर्गेशको आलोचना गरिरहेका छन् ।

तर, दुर्गेशले प्रतिष्ठानको पत्रलाई वास्ता गरेका छैनन् । न उनले शब्द फेरे, न प्रतिष्ठानलाई चित्तबुझ्दो जवाफ दिए । उनी आफ्नो गीतमा केही गल्ती नभएको भन्दै अडान लिएर बसिरहेका छन् ।

दुर्गेशले अटेरीपन देखाएपछि प्रतिष्ठान उनलाई बहिस्कार गर्ने तयारीमा पुगेको प्रतिष्ठानका अध्यक्ष रमेश बिजीले शिलात्रपत्रलाई बताए । बिजीका अनुसार यसका लागि आइतबार प्रतिष्ठानमा कार्यसमिति र पूर्वअध्यक्षहरूको बैठक बसेर निर्णय गर्ने तय भएको छ ।

‘महिलाहरूको भवनात्मक चाडलाई यस्ता भड्किला शब्दहरूले बिगारेको छ । त्यसैले उहाँलाई हामीले शब्द फेर्न अनुरोध गरेका थियौँ, मान्नुभएन,’ बिजीले भने, ‘त्यसैले हामी उहाँलाई साधरण सदस्यसमेत नरहने गरी प्रतिष्ठानबाट बहिस्कार गर्न टुंगोमा पुग्ने मोटामोटी सहमत भएका छौँ ।’

बिजीका अनुसार प्रतिष्ठानका पदाधिकारीले सम्पर्क गर्दा दुर्गेशले आफ्नो ‘प्याट्रन’को गीत बनाएको भन्दै त्यसमा प्रतिष्ठानको सरोकार नरहेको जवाफ फर्काएका थिए । 'उहाँले तपाईंहरू जे गरे पनि गर्नुस्, मलाई मतलब भएन । मलाई प्रतिष्ठान नै चाहिन्न भन्नुभयो । त्यसमा हाम्रो आपत्ति हो’, बिजीले भने ।

दुर्गेश भने आफ्नो अडानबाट पछि हट्ने पक्षमा छैनन् । आफूले प्रयोग गरेका शब्द गलत नभएको उनको जिकिर छ । शिलापत्रसँगको कुराकानीमा उनले भने, ‘मैले मेरो गाउँको ठेट भाषा प्रयोग गरेको हुँ । मेरो गाउँमा ख्यास्स भनेको चिप्लेलास् वा लड्लास् भन्ने अर्थमा प्रयोग हुन्छ । लोक गीत भनेको मौलिक भाषा हो । ठेट भाषा प्रयोग गर्दा म के गलत भएँ त ?’

भूगोलअनुसार भाषाको अर्थ फरक हुने बताउँदै दुर्गेशले थपे, ‘पश्चिमका धेरै शब्द पूर्वमा गलत बुझिन्छ । पूर्वका असल अर्थ दिने भाषा पश्चिममा गलत बुझिन्छ । यसमा पनि त्यही भएको हो । मैले गल्ती गरेको होइन ।’

पाइरहेको चर्चाको डाहा गर्नेहरूले आफ्नो विरोध गरिरहेको दुर्गेशको मत छ । ‘यहाँ जसले चर्चा पायो र अलिअलि कमायो त्यसैको विरोध हुन्छ । त्यसैको खुट्टा तानिन्छ,’ दुर्गेश भन्छन्, 'मैले यो कुरालाई बुझिसकेँ । मलाई विवादित बनाएर केही फरक पर्दैन ।’

आफूलाई बहिष्कार गर्ने प्रतिष्ठानको कदमलाई बेवास्ता गरी अगाडि बढ्ने पक्षमा छन् उनी । बहिस्कार नै गरे पनि आफू निरन्तर काम गरिरहेने उनको भनाइ छ । उनले भने, ‘बहिस्कार गरेपछि मैले उहाँहरूको काम पो गर्न नहुने हो त । मेरो काम त म गरिहाल्छु नि । अहिलेचाहिँ मलाई उहाँहरूले गीत बनाउन पैसा दिनुभएको छ र ? आफ्नो लागि म आफैँ गरिहाल्छु नि ।’

दुर्गेश प्रतिष्ठानमा भएका व्यक्तिहरूले निष्पक्ष काम नगर्ने गुनासो गर्छन् । आफूले र आफ्नाले जे गरे पनि वास्ता नगर्ने उनको गुनासो छ । ‘दोहोरीमा कस्ता शब्द प्रयोग भइरहेका छन् भन्ने हामी सबैलाई थाहा छ । तर, उहाँहरूले त त्यसमा केही एक्सन लिनुभएको छैन । मैले आफ्नो गाउँको ठेट भाषा प्रयोग गर्दा उहाँहरूको टाउँको दुखेको छ,’ दुर्गेशले आक्रोश पोखे ।

प्रतिष्ठानले आगमी दिनमा सेन्सरको व्यवस्था गर्नुपर्ने दुर्गेशले बताए । उनले भने, 'गीत तथा भिडियो तयार भएपछि प्रतिष्ठानमा देखाएर सेन्सर पास गरेर मात्र रिलिज गर्ने नियम बन्यो भने मात्र सबैलाई स्वीकार्य हुन्छ । नत्र त यस्तै हो ।’

विवादका पर्याय दुर्गेश

सांगीतिक क्षेत्रमा दुर्गेश विवादित बनेको यो नै पहिलोपल्ट होइन । अक्सर उनी यस्ता विवादमा परिरहेकै हुन्छन् ।

दुर्गेशले २०७६ को तिहारमा 'डन आयो डन...’ बोलको गीत रिलिज गरे । गीतमा प्रयोग गरेका शब्दहरूमाथि चौतर्फी आलोचना भयो । विवाद झांगिँदै जाँदा प्रहरीले उनलाई पक्राउ नै गर्‍यो । हिरासतबाटै आफ्नो गीत यूट्यूबबाट हटाएर मात्र उनी छुटे । छुटेपछि विवादित शब्दहरू झिकेर फेरि अपलोड गरे ।

दुर्गेशले गत वर्षको तीजमा दुई गीत सार्वजनिक गरे, ’बिच्च बीच्चमा २’ र ’बीच्च बीच्चमा ३’ । यी गीत पनि विवादमुक्त हुन सकेनन् ।

‘बीच्चबीच्चमा २’ को अन्तरामा उनले एउटा पुरानो गीतका दुई लाइन हुवहु चोरेको पुष्टि भयो । दुर्गेशको गीतको अन्तरामा रहेको ‘आकाशैमा बादलु डम्मै छ, मनमा के छ भन्नेलाई सम्मै छ..’ भन्ने लाइन प्रेमराजा महत र हरिदेवी कोइरालाले धेरै पहिले गाएको गीतको मुखडा हो । दुर्गेश स्वयंले पनि यो स्वीकारे ।

’बीच्च बीच्चमा ३’ गीतको भिडियोमा दुर्गेश र केही पुरुष कलाकारहरू केटीको भेषमा देखिए । धेरैले उनको यस भिडियोको आलोचना गरे भने यस म्युजिक भिडियोलाई ’गाइजात्रे गीत’ को सज्ञा पनि दिइयो ।

दुर्गेशको विवाद यतिमै कहाँ सकिएको छ र ? एक टीभी शोमा पुगेका उनलाई स्वरसम्राट नारायण गोपलको गीत गाउन लगाइन्छ । उनले गीत सुरु गर्छन्, ’मन जलिरहेछ... ’ ।

नारायण गोपालको फ्यान बताउने दुर्गेशले नारायण गोपालको भन्दै भक्तराज आचार्यको गीत गाए । त्यो पनि स्वर बिगारेर । त्योबेला दुर्गेश ट्रोलको शिकार बनेका थिए ।

अघिल्ला प्रकरणमा गल्ती स्विकारेका दुर्गेश नारायण गोपाल गीत काण्डमा भने अर्कै रूप देखाए । सोही विवादलई केन्द्रमा राखेर उनले गीत बनाए, ’आलुजस्तो गायक’ ।

यी प्रकरणले देखाउँछ, दुर्गेशले गल्ती स्विकार्दै अरु गल्ती गरिरहेका छन् । आखिर उनी विवादबाट टाढा कहिल्यै रहेनन् । दुर्गेशलाई आरोप छ– उनी विवाद रुचाउँछन् । साँच्चै दुर्गेश विवादप्रेमी हुन् ?

यसको केन्द्रमा युट्युबमा भ्युज बढाएपछि हुने फाइदा जोडिन्छ । विवाद मच्चिए गीतको खोजी स्वभाविक रूपमा बढी हुन्छ । त्यसले भ्युज बढ्छ, जुन आम्दानीको स्रोत हो । युट्युबमा भ्युजकै आधारमा कमाइ हुने गर्छ । त्यसैले दुर्गेशलाई भन्ने गरिन्छ, ’पैसाकै लागि दुर्गेशले फण्डा मच्चाउँछ ।’

सायद, यसैको उदाहरण हो – ’ख्यास्स पुतली’ । जतिजति विवाद तन्किँदैछ, उतिउति भ्युज संख्या बढिरहेकै छ ।

यो पनि - ४० हजारले 'युटर्न' गराएको दुर्गेशको करिअर

यस्तो छ गीत :