कमेडी च्याम्पियनका 'मणि', जसले हँसाएरै लोभ्याउँदै छन् दर्शकदेखि नेतासम्म

A+ A A-

'हेप्नी, मान्छेलाई डिस हान्नी, औडा अर्नी । यस्तैयस्तै कुरा गर्‍यौ भने नि भाइ, हामी मान्छेहरू कोल्याप्स गर्दिन्छौँ... ।'

पूर्वमन्त्री गोकुल बाँस्कोटाको लवजमा यो संवाद तपाईंले पक्कै सुन्नुभएको होला । यो संवाद गोकुल आफैँले बोलेका होइनन्, कमेडी च्याम्पियनका प्रतियोगी भरतमणि पौडेलले गोकुलको क्यारिकेचर गर्दै यो संवाद बोलेका थिए । जुन संवादले तहल्का नै पिट्यो ।

भरतले यो संवाद बोल्नुपर्ने परिवेश निकै रोचक बनाएका थिए । काठमाडौंमा कोठाभाडामा बस्नेहरूको पीडा र घरबेटीको व्यवहारलाई उनले कमेडीमा साह्रै गहकिलो पाराले बुनेका थिए ।

घरबेटीले कोठा सर्न चेतावनी दिएपछि दुखेको टाउको ठीक गर्न भरत ओछ्यानमा पल्टिन्छन् । निदाउँछन्, सपना देख्छन् । सपनामा उनी कोठा खोज्दै गोकुल बाँस्कोटाको घर पुग्छन् ।

'लौ हजुर मलाई एउटा रुम दिनपुर्‍यो ।'

'भ्रष्‍टाचार गर्न आउँछ ?'

'आउँदैन हजुर ।'

'भ्रष्टाचार गर्न आउँदैन भने छैन ।'

'हैन हजुर, मलाई जसरी पनि रुम चाहिएको छ ।'

'एउटा रुमको ७० पर्छ, तिर्न सक्छौ ?'

'यो त महँगो भयो नि ।'

'महँगो भए छानबिन हुन्छ ।'

'छानबिन हुँदैन, हुँदैन । नेपालमा सत्तापक्षको छानबिन हुनु र दीपाश्री निरौलाको बिहे हुनु एउटै हो । गरे त हुने नि, गर्दै गर्दैनन् ।'

भरतले यो प्रस्तुति दिँदैगर्दा जजहरूमा हाँसो रोकिएको थिएन । 'नहाँस्ने जज'को छवि बनाएका सन्तोष पन्तले पनि हाँस्दा-हाँस्दा गाला रातो बनाइसकेका थिए । ऋचा शर्माको हाँसो रोकिएको थिएन । मनोज गजुरेल र प्रदीप भट्टराईले त उठेर नै ताली बजाइरहेका थिए ।

उनको प्रस्तुतिमा स्ट्यान्डअप कमेडी हास्य र व्यंग्य दुवै पाटोमा सशक्त थियो । त्योसँगै अन्तिम पञ्चलाइनबाट उनले सरकारलाई गरेको व्यङ्ग कुनै धारिलो तरबारभन्दा कम थिएन ।

सोही प्रस्तुतिमा भरतले राजेन्द्र महतोको पनि मिमिक्री गरे । उक्त मिमिक्रीपछि जज गजुरेलले भन्दै थिए, 'अब त बाँच्न देऊ यार, मरिने भइयो हाँसेर ।'

भरतले रामनारायण बिडारी र पूर्वराजा ज्ञानेन्द्र शाहको पनि क्यारिकेचर गरेर दर्शकसँगै जजहरूलाई पनि मूर्च्छा पारे ।

कमेडी च्याम्पियन दोस्रो सिजनको मुख्‍य दाबेदारका रूपमा भरतमणि गनिएका छन् । उनीसँगै प्रतिस्पर्धा गरिरहेका प्रतियोगीहरूले पनि च्याम्पियनको सेटलाई भरतमणिको साम्राज्यका रूपमा स्वीकार्दै आएका छन् ।

नस्वीकारून् पनि कसरी ? भरतमणिले एकपछि अर्को धमाकेदार प्रस्तुति दिइरहेका छन् । उनले दिएका आठवटा प्रस्तुतिमा पाँचवटाबाट त 'पर्फर्मर अफ द राउण्ड' नै जितेका छन् ।

निर्देशक विशाल भण्डारी ठट्यौली शैलीमा भन्छन्, 'पर्फर्मर अफ द राउण्डको अवार्ड हामीसँग भन्दा भरतमणिसँग बढी भइसक्यो ।'

भरतमणिलाई अहिले कमेडी च्याम्पियनका 'मणि' भनेर सम्बोधन गरिन्छ । प्रस्तुतिकै कारण उनले 'मणि' विशेषण पाएका हुन् । उनले कहिले पत्रकार बनेर हँसाए, कहिले एलियन बनेर हँसाए । कहिले नेताहरूमाथि तिखो व्यङ्ग्य गरेर हँसाए, कहिले आफ्नै स्ट्रगल सुनाएर हँसाए ।

अहिले कमेडी च्याम्पियन हेर्ने दर्शकले भरतमणिलाई विजेताको दाबेदार मानिरहेका छन् । युट्युबमा सार्वजनिक हुने हरेक शृंखलाको कमेन्टमा भरतमणि नै विजेता बन्नुपर्ने प्रतिक्रियाहरू धेरै देखिन्छन् । दर्शकबाट भरतमणिलाई राम्रो साथ मिलिरहेको छ ।

भरतमणिले दर्शकको मात्र मन जितेका छैनन् । जसलाई भरतमणिले उडाए, उही पनि भरतमणिकै पक्षमा देखिन्छन् ।

पूर्वमन्त्री बाँस्कोटाले केही समयअगाडि भरतमणिको विषयमा ट्विट लेखेका थिए, 'भरतमणिलाई मनोजकहाँबाट झिक्देर अमिताभ बच्चनको शोतिर नेटा हान्दिन परो कि के हो ?'

यस्तै, पूर्वमन्त्री योगेश भट्टराईले त भरतमणिलाई प्रोत्साहन पुरस्कार नै दिइसके । उनको पहलमा भरतमणिलाई ६ लाख पुरस्कार दिइएको थियो ।

त्यति मात्र होइन, भट्टराईले भरतमणिका लागि भोट गर्न सामाजिक सञ्जालमा स्टाटस नै लेखेका छन् । उनले प्रतिभावान् मान्छेलाई जिताउनुपर्ने भन्दै भोटको अपिल गरेका छन् ।

उपाधि जित्ने जोसले च्याम्पियनमा

पहिलो सिजनमा 'दले दाइ'का रूपमा चिनिएका सुमन कोइरालाले भरतमणिलाई कमेडी च्याम्पियनमा जान अनुरोध गरेका थिएनन् भने ? त्यति अनुरोध गरेका थिएनन् भने सायद दोस्रो सिजनमा भरतमणिलाई देख्न पाइने पनि थिएन । उनी दोस्रो सिजनमा आउनुको सम्पूर्ण जस दले दाइलाई नै जान्छ ।

'मलाई सुमनजीले नै जानैपर्छ भनेर फोर्स गर्नुभयो', भरतमणि भन्छन्, 'सायद उहाँले मज्जाले नभन्नुभएको थियो भने म आउने थिइनँ होला ।'

कमेडी च्याम्पियनबाट भरतमणिले यो चर्चा सोचेकै थिएनन् । अहिले जुन चर्चा पाइरहेका छन्, त्यसमा खुसी छन् भरतमणि ।

'म कमेडी च्याम्पियनमा शतप्रतिशत दिन्छु भन्ने सोचेरै आएको हुँ । तर, यति चर्चा कमाउँछु होला भन्नेचाहिँ सोचेको थिइनँ', भरतमणि भन्छन्, 'यो चर्चाले मलाई ऊर्जावान् बनाएको छ ।'

चर्चा पाएजस्तै ऊर्जा उनलाई पर्फर्मर अफ द राउण्डको अवार्ड चुम्दा पनि आउनुपर्ने हो । तर, अवार्ड पाउँदा उनलाई प्रेसर थपिन्छ, 'ल, अर्को साता के गर्ने त ?'

जब भरतमणि स्टेजमा चढ्छन्, उनले दुनियाँ बिर्सन्छन् । आफ्नो विषयवस्तु राम्रो छ भने उनमा छुट्टै जोस आउँछ । भरतमणि भन्छन्, 'कन्टेन्ट राम्रो छ भने त स्टेजमा म राजाजस्तै हुन्छु । मलाई त स्टेजमा डर नै लाग्दैन ।' आफ्नो विषयवस्तु कमजोर छ भने मात्र उनलाई डर लाग्छ ।

कमेडी च्याम्पियनको उत्कृष्ट पाँचमा परिसकेका छन्, भरतमणि । यसै साता वाइल्ड कार्डबाट दुई जनाले प्रतियोगितामा प्रवेश गर्नेछन् । तसर्थ, अबको प्रतिस्पर्धा सात जनाबीच हुनेछ ।

दर्शक, साथीभाइ तथा ताप्लेजुङवासीबाट पाएको साथ देख्दा भरतमणि उपाधि जित्ने आशामा छन् । उनी भन्छन्, 'जित्ने नजित्ने भन्ने त भोटको खेल हो । तर, मसँग सिङ्गो ताप्लेजुङ छ । कमेडी रुचाउने नेपालभरका दर्शक मसँगै हुनुहुन्‍छ । उहाँहरूको साथले जित्छु भन्ने लाग्‍छ ।'

यस्तो छ भरतमणिको कमेडीयात्रा

ताप्लेजुङमा जन्मिएका भरतमणिले सानो उमेरदेखि नै क्यारिकेचर गर्न सुरु गरे । कहिले माथिल्लो घरको अंकलको नक्कल गरे, कहिले तल्लो घरको दाइको । अन्य छर-छिमेकीको पनि ।

भरतमणिले क्यारिकेचर गर्दा सबै जना हाँस्थे । भरतमणि दंग पर्थे, 'अरे ! अरुलाई हँसाउन त मज्जा पो आउने रै'छ ।'

गाउँमा हुने कार्यक्रममा दाइहरूले नेताको क्यारिकेचर सुनाउँथे । भरतमणिले नेता चिन्दैनथे । तर, क्यारिकेचर दुरुस्तै बनाउँथे । भन्छन्, 'मैले नेता नै नचिनी दाइहरूबाट सुनेर उहाँहरूको क्यारिकेचर गर्दिन्थेँ । र पनि सबै जनाले मैले गरेको क्यारिकेचरलाई मन पराउनुहुन्थ्यो ।'

उमेर बढ्‍दै गयो, भरतमणिलाई कमेडीको रस चढ्दै गयो । उनले पढाइमा कम, कमेडीमा बढी ध्यान दिन थाले । विद्यालयदेखि गाउँमा हुने विभिन्न कार्यक्रमहरूमा उनले थोरै समय मागेर प्रस्तुति दिन थाले, क्यारिकेचर गर्न थाले । उनी गाउँमा सानोतिनो स्टार भइसकेका थिए ।

ताप्लेजुङकै रेडियोमा उनले कार्यक्रम चलाउँथे । उक्त कार्यक्रममा उनले कलाकारहरूसँग अन्तर्वार्ता गर्थे ।

एसएलसी सकेर भरतमणि काठमाडौं आए । उनले काम गर्ने रेडियोका मालिक र हास्‍य कलाकार मनोज गजुरेलको राम्रो सम्बन्ध थियो । रेडियोका मालिकले भरतमणिले हास्य कलाकार बन्ने रुचि गरेको मनोजलाई सुनाए । र आग्रह पनि गरिदिए, 'यो हास्य कलाकार बन्छु भन्छ । यसलाई तपाईंले सहयोग गर्नुपर्‍यो ।'

मनोजले भरतमणिलाई केही गाईजात्रा र प्रहसनहरूमा मौका दिए । भरतमणि भन्छन्, 'सुरुवाती दिनमा मैले मनोज सरबाट धेरै सहयोग पाएको छु ।'

भरतमणिले अन्तर्वार्ता गर्ने क्रममा हरि निरौला 'कक्रोज'सँग राम्रो सम्बन्ध बनाए । कक्रोजकै कारण भरतमणिले 'भद्रगोल'का केही भागहरूमा अभिनय गर्ने मौका पनि पाए । 'मैले भद्रगोलका धेरै भागहरूमा सानो-सानो भूमिकामा काम गरेको छु । त्यो अवसर कक्रोज दाइले दिनुभएको हो', भरतले कक्रोजलई सम्झिए ।

कलाकार बन्नका लागि भरतमणिले धेरै दुःख गरेका छन् । उनले आफ्नो कथा सुनाउने एपिसोडमा भनेका छन्, 'सिरियलमा काम गर्दा बोरामा हालेर कुटाइ खाने सिन पाएँ । म्युजिक भिडियोमा कोरस बनेर नाचेँ । एक महिना लगाएर खिचेको फिल्ममा आफैँलाई देखिनँ । अन्तत: म कमेडी च्याम्पियनको दोस्रो सिजनमा आइपुगेँ ।'

प्रकाशित मिति: शुक्रबार, साउन १५, २०७८ १२:४३