सैन्य कु र कोरोना भाइरसको दोहोरो मारमा बर्मेलीहरू : न सेनाले बोल्न दिन्छ, न कोरोनाको उपचार

सैन्य कु र कोरोना भाइरसको दोहोरो मारमा बर्मेलीहरू : न सेनाले बोल्न दिन्छ, न कोरोनाको उपचार

A+ A A-

म्यानमारमा सैन्य कुविरुद्धको आन्दोलन अहिले पनि जारी छ । त्यहाँ सेनाले चलाएको गोली लागेर कति बेला मरिने हो भन्ने त्रास अझै हटिसकेको छैन ।

बुधबार म्यानमारको मानडले याटाउन शहरमा सैनिक कुविरुद्ध आन्दोलनमा उत्रिएका तीन जनाको सेनाको गोली लागेर मृत्यु भयो । म्यानमार देशीय गोर्खा संघका अनुसार नौ जना गम्भीर घाइते भए ।

सन् २०२० को नोभेम्बरमा भएको निर्वाचनमा धाँधली भएको भन्दै म्यानमारको सेनाले १ फेब्रुअरीमा सत्ता नियन्त्रणमा लिएको थियो । त्यसयता निरन्तर आन्दोलन भइरहेको छ । संघका अनुसार सैन्य कुविरुद्धको आन्दोलनमा हालसम्म ९ सय १४ जनाले ज्यान गुमाएका छन् ।

सैन्य कुविरुद्ध आन्दोलन भइरहेको म्यानमारमा कोरोना भाइरसको त्रास पनि उत्तिकै छ । कोरोना महामारीका कारण उपचार नपाएर कतिबेला परिवारमा रहेका सबैको मृत्यु हुने हो भन्ने त्रास रहेको बताउँछन् बर्मामा रहेका नेपालीहरू ।

म्यानमारमा कोरोना महामारी घरपिच्छे फैलिएको छ । कोरोना संक्रमणले कति बेला कसको ज्यान जाने हो टुंगो छैन । अस्पतालहरूमा पनि राम्रो उपचार भइरहेको छैन । अस्पताल पुगेका कोरोना संक्रमित बर्मेलीहरूले अक्सिजन नपाएर ज्यान गुमाउनु परिरहेको बताउँछन् मानडले शहरमा रहेका देवेन्द्र रिजाल ।

रिजालका अनुसार फेब्रुअरीयता बर्मेलीहरू राम्ररी निदाउन सकेका छैनन् । एकातिर सेनाको गोलीले जनताको आवाज दबाइरहेको छ भने अर्कातिर कोरोना संक्रमण फैलिरहेको छ ।

घरैपिच्छे कोरोना संक्रमित भए पनि उपचारका लागि बाहिर जान सक्ने स्थिति नभएको रिजाल बताउँछन् । उनका अनुसार म्यानमारका कलेनगर, म्यान्टा, म्यानछाङ, मानडेललगायतका शहरमा सेनाले दैनिक गोली चलाउँछ ।

म्यानमारमा रहेका एक नेपाली भाषीका अनुसार कोरोनाका कारण मृत्यु भएकाहरूको शवको लाइनै लागेको छ । बिहीबार बिहान कोरोना संक्रमित छोरीको औषधि किन्न मेडिकल पुग्दा मृतकहरूको शव देखेर आफू आत्तिएको बताउँछन् उनी । औषधि किन्न मानडले शहरको घाट हुँदै जाँदा ती शवहरू देखेको उनको भनाइ छ । उनका अनुसार कोरोनाका कारण मृत्यु भएकाहरूको शव व्यवस्थापनमा समस्या भइरहेको छ ।

दुई महिनाअघि यही सडकमा सैनिक कुविरुद्ध आन्दोलनरत बर्मेलीलाई सेनाले गोली हानेर मारेको देखेको उनले बताए । ‘त्यो बेला पनि बर्मेलीका लास सडकमा छरपस्ट भएको देखिन्थ्यो । आन्दोलनमा गोली लागेर मरेको बर्मेलीको शव आफन्तलाई हप्ता दिनसम्म सैनिकले उठाउन दिदैन थिए,’ उनले भने, ‘अहिले कोरोनाका कारण उपचार गर्न अस्पताल पुगेको बर्मेलीहरू अक्सिजन नपाएर सकडपेटीमै मरिरहेका छन् । कोरोना फैलिने र सर्ने त्रासले मृतकको शव उठाउन आफन्त अस्पतालसम्म पुग्ने अवस्था छैन ।’

कोरोना संक्रमणका कारण मृत्यु भएका एक नेपाली भाषी समाजसेवीको सव पनि मानडले शहरको मसान घाटमा देखेपछि आफूलाई आफ्नै आँखाअगाडि मृत्यु घुमिरहेको जस्तो लागेको उनले बताए ।

म्यानमारमा एकातिर कोरोना संक्रमण बढीरहेको छ भने अर्कातिर सैनिक कुविरुद्ध आन्दोलन भइरहेको छ । सेनाले आन्दोलन दबाउन दमन गर्न छाडेको छैन । जसका कारण कोरोना संक्रमितहरू सेनाको गोली छल्दै उपचारका लागि अस्पताल पुग्नुपर्ने बाध्यता रहेको बताउँछन् म्यानमार देशीय गोर्खा संघका पूर्वमहासचिव लक्ष्मण न्यौपाने ।

न्यौपानेका अनुसार म्यानमारका जनताले अहिलेसम्म कोरोनाविरुद्धको खोप पाएका छैनन् । खोपको त कुरै छाडौँ संक्रमितहरूले अक्सिजन नपाएर ज्यान गुमाउनु परिरहेको बताउँछन् न्यौपाने ।

कोरोना संक्रमणका कारण धेरैको मृत्यु भएको छ भने शवहरूको व्यवस्थापन हुन नसक्दा अवस्था थप भयावह बनेको छ । त्यसमाथि सैन्य कुका कारण बर्मेलीहरू 'जीउँदै लास' जस्तै भएको बताउँछन् उनी ।

प्रकाशित मिति: शुक्रबार, साउन १५, २०७८ ०७:३०