टिकट र क्वारेन्टाइनमै सकिन्छ विदेशिनेको तीन महिनाको कमाइ

A+ A A-

इलामका जीवन अधिकारी गत फागुनमा साउदी अरबबाट घर बिदामा आए । उनी तीन महिनाको बिदामा आए पनि कोरोनाका कारण समयमै साउदी फर्कन नपाएका उनी बुधबार जाँदै छन् ।

सामान्य अवस्थामा साउदी अरब जान ३५ हजार हवाई भाडा लाग्ने गरेकोमा यस पटक हिमालय एयरलाइन्समा १ लाख १५ हजार रुपैयाँ तिरेर टिकट लिएको उनले बताए । उनी सात वर्षदेखि साउदीमा कार्यरत छन् । मासिक ५५ हजार कमाइ हुने उनी बताउँछन् ।

‘करिब चार महिनाको कमाइ त फर्किनकै लागि खर्च हुने भयो,’ उनले भने, ‘हवाई भाडा र क्वारेन्टाइनका नाममा विदेश जाने कामदारमाथि आर्थिक भार थपियो ।’

कतारबाट घर बिदामा आएका चितवनका राजीव धमला पनि सामान्य अवस्थाभन्दा तीन गुणा बढी भाडा तिरेर फर्कंदै गरेको बताउँछन् । ७५ हजारमा टर्किस एयरलाइन्सको टिकट लिएर कतार जान लागेको उनले बताए ।

‘विदेशिने कामदारसँग त पैसाको बोट नै छजस्तो गर्छन् । कतारमा गएर क्वारेन्टाइन बस्नुपर्छ, फेरि त्यहाँ पनि पैसा तिर्नुपर्छ,’ उनले भने, ‘देशमा रोजगारी पाइँदैन । विदेश जाँदा पाइलैपिच्छे ठगिनुपर्छ । योभन्दा दु:खदाग्दो कुरा अरु के होला र ?’

धमला र अधिकारी मात्र होइन, घर बिदामा आएकाहरू महँगो हवाई भाडा र क्वारेन्टाइन खर्च व्यहोरेर विदेशिन बाध्य छन् ।

सामान्य अवस्थामा नेपालबाट खाडीका देश र मलेसिया जान ३५–४० हजार हवाई भाडा लाग्छ । तर, कोरोना महामारीमा घरबिदामा आएका अथवा नयाँ श्रम स्वीकृति लिई वैदेशिक रोजगारीमा जाने कामदारसँग विभिन्न एयरलाइन्सले ४ गुणासम्म बढी भाडा असुल्ने गरेका छन् ।

वैदेशिक रोजगार व्यवसायी संघका सचिव मेघनाथ भुर्तेल एयरलाइन्सहरूले विदेशिनेहरूलाई २ लाखसम्ममा टिकट बिक्री गर्ने गरेको बताउँछन् ।

हिमालय एयरलाइन्सले साउदीदेखि काठमाडौंसम्मको हवाई टिकट ८६ हजार र काठमाडौंबाट साउदी जाने कामदारसँग १ लाख २० हजारसम्म लिएको गुनासो आएको भुर्तेलको भनाइ छ ।

विश्व ट्रेड युनियन महासंघ (डब्लूएफटीयू) नेपाल समन्वय समितिले समेत विदेशबाट अलपत्र परेर फर्केका श्रमिकसँग उद्धारको नाममा महँगो शुल्क लिइरहेको प्रति आपत्ति जनाएको थियो । यसबारेमा डब्लूएफटीयूले सम्बन्धित निकायको ध्याकर्षण गराएको थियो ।

सरकारले विदेशबाट कडा स्वास्थ्य मापदण्ड पूरा गरेर आएका श्रमिक तथा अन्य नागरिकका लागि क्वारेन्टाइन बस्नुपर्ने तथा पीसीआर परीक्षण गर्नुपर्ने व्यवस्था गरेको छ । असार ७ गते अन्तर्राष्ट्रिय हवाई यात्रुको होटल क्वारेन्टाइनसम्बन्धी मापदण्ड २०७८ लागू गरेर होटलमा बस्नुपर्ने र पीसीआर गर्नुपर्ने नियम बनाइएको थियो ।

रोजगारदाता देशबाट रोजगारी गुमाएर फर्किएकाहरू नेपालमा प्रतिदिन १ हजार ५ रुपैयाँ होटेल क्यारेन्टाइन तथा पीसीआरमा थप खर्च गर्नुपरेको गुनासो गर्छन् ।

अनुगमन कसले गर्ने ?

कोरोना महामारीमा वैदेशिक रोजगारीमा जाने कामदारसँग चर्को हवाई भाडा लिइरहेका एयरलाइन्सहरूको अनुगमन गर्ने जिम्मेवारी संस्कृति, पर्यटन तथा नागरिक उड्डयन मन्त्रालय र श्रम, रोजगार तथा सामाजिक सुरक्षा मन्त्रालयको हो ।

तर, कोरोनाका कारण वैदेशिक रोजगारीमा जाने र फर्किने कामदारसँग नेपालबाट अन्तर्राष्ट्रिय उडान भर्दै आएका एयरलाइन्सले चर्को भाडा लिएको विषयमा दुवै मन्त्रालयले चासो दिएका छैनन् ।

सरकारले निर्धारण गरेको हवाई भाडाभन्दा बढी लिएर अन्तर्राष्ट्रिय उडान भर्दै आएका एयरलाइन्सहरूको अनुगमन हुने भए पनि मन्त्रालयमा अहिलेसम्म गुनासो नआएको संस्कृति पर्यटन तथा नागरिक उड्डयन मन्त्रालयका प्रवक्ता तारानाथ अधिकारीले बताए । अन्तर्राष्ट्रिय उडान भर्दै आएका एयरलाइन्सले सरकारले निर्धारण गरेभन्दा बढी भाडा लिएको पाइए कानुनी कारबाही हुने अधिकारीको भनाइ छ ।

श्रम मन्त्रालयले पनि कामदारसँग महँगो भाडा लिएको विषयमा केही प्रतिक्रिया दिएको छैन ।

प्रकाशित मिति: बुधबार, साउन ६, २०७८ १७:१८