दुई ठूला प्रतियोगितामा सेलिब्रेटीको विश्लेषण, युरोकप र कोपा अमेरिकाको उपाधि कसले लैजाला ?

दुई ठूला प्रतियोगितामा सेलिब्रेटीको विश्लेषण, युरोकप र कोपा अमेरिकाको उपाधि कसले लैजाला ?

A+ A A-

अहिले युरोकप २०२० र कोपा अमेरिका २०२१ का खेलहरू भइरहेका छन् । विश्वका यी दुई प्रतिष्ठित खेलहरू एकसाथ भइरहेकाले पनि धेरैको ध्यान फुटबलमा छ । यसबाट नेपाली कलाकारहरू पनि अछुतो छैनन् ।

युरोपका २४ देशले खेलेको युरोकप २०२० को फाइनलमा इङ्गल्यान्ड र इटाली पुगेका छन् । आइतबार राति लन्डनको वेम्ली स्टेडियममा यी दुई देश उपाधिका लागि मैदानमा उत्रने छन् ।

त्यस्तै, कोपा अमेरिकामा पनि अहिले धेरैले चासो दिन थालेका छन् । सुरुआती खेलहरूमा खासै ध्यान खिच्न नसकेको यो प्रतियोगिताको फाइनलमा ब्राजिल र अर्जेन्टिना पुगेपछि भने धेरैले महत्वका साथ हेरेका छन् ।

यी दुई देशको भिडन्त ब्राजिलको घरेलु मैदान माराकानामा हुनेछ । नेपाली समयअनुसार आइतबार बिहान ५:४५ मा यी दुई देश उपाधिका लागि मैदान उत्रिने छन् ।

नेपाली सेलेब्रिटीहरू पनि यो खेलप्रति निकै चासो राखिरहेका छन् । केही सेलेब्रिटीहरू सामाजिक सञ्जालमा नै फुटबलसम्बन्धी स्टाटस लेखिरहेका छन् । केहीले आफ्नो समर्थन रहेको टिमलाई जितको शुभकामना दिइरहेका छन् ।

फुटबलको राम्रो विश्लेषण गर्ने कलाकारमा पर्छन्, दीपकराज गिरी । गिरीले सुरुआती समयदेखि नै युरोकपमा इटाली र कोपा अमेरिकामा अर्जेन्टिनालाई समर्थन गरिरहेका छन् । अहिले दुवै टिम फाइनल खेल्ने तयारीमा छन् ।

दीपकराज भन्छन्, 'इटालीको टिम राम्रो छ । अहिलेसम्मको खेलमा निकै राम्रो प्रदर्शन गरेको छ । आशा छ, इटालीले नै कप उचाल्ने छ ।'

दीपकराज इङ्गल्यान्डलाई पनि कमोजर ठान्दैनन् । 'इङ्गल्यान्ड पनि बलियो टिम छ, उपाधि उसैले जित्न पनि सक्छ,' दीपकराज भन्छन्, 'जे होस्, फाइनल खेल रोचक हुनेवाला छ ।'

मेस्सी दीपकराजलाई मन पर्ने खेलाडी हुन् । उनी चाहन्छन्- मेस्सीले आफ्नो देशका लागि ट्रफी जितुन् । 'मेस्सीकै लागि भए पनि अर्जेन्टिनाले फाइनल जितोस् भन्ने लागेको छ,' उनले भने ।

अभिनेत्री केकी अधिकारी पनि निद्रा भुलेर युरोकप तथा कोपा अमेरिकाका खेलहरू हेरिरहेकी छिन् । फाइनल खेलमा उनले युरोकपतर्फ इङ्गल्यान्ड र कोपा अमेरिकातर्फ अर्जेन्टिनालाई समर्थन गरिरहेकी छिन् ।

इङ्गल्यान्डको खेल रणनीति केकीलाई मन पर्छ । उनी भन्छिन्, 'इङ्गल्यान्डले रणनीतिक शैलीमा खेल्ने गर्छ । त्यसैले जित्छ नै जस्तो लाग्छ ।'

कोपा अमेरिकातर्फ केकीलाई मनपर्ने खेलाडी मेस्सीको टिम अर्जेन्टिना फाइनलमा पुगेको छ । उनी मेस्सीकै समर्थनमा छिन् ।

केकी भन्छिन्, 'खेल हो, जित्छ नै भन्ने त हुँदैन । दुवै टिम राम्रो भएर नै फाइनलमा पुगेका छन् । मेरो चाहनाचाहिँ अर्जेन्टिनाले जितोस् भन्ने छ ।'

अभिनेत्री स्वस्तिमा खड्काले पनि युरोकपमा खेलहरू हेरिरहेकी छन् । कोपा अमेरिकाका खेलहरू भने उनले हेर्न पाएकी छैनन् । युरोकपमा कुनै टिमलाई समर्थन नगरे पनि इटालीले जित्छ कि भन्ने स्वस्तिमाको विश्लेषण छ । उनी भन्छिन्, 'मलाई इटालीको खेल आकर्षक लाग्यो । मलाई लाग्छ, यस सिजनको उपाधि इटालीले नै जित्छ ।'

कोपा अमेरिकातर्फ फाइनलमा पुगेका दुवै टिम राम्रा भएकाले यसैले जित्छ भन्न सक्दिनन् स्वस्तिमा ।

गायक प्रमोद खरेल पनि निद्रा भुलेर खेल हेरिरहेका छन् । सामाजिक सञ्जालमा खेलको विषयमा विभिन्न टिकाटिप्पणी पनि गरिरहन्छन्, प्रमोद । युरोकपमा उनले इटालीलाई जितको दाबेदार देखेका छन् । अहिलेसम्म अपराजित खेल खेल्दै आएकाले पनि इटाली यस पटकको दाबेदार रहेको प्रमोद बताउँछन् ।

उनी भन्छन्, 'मेरो समर्थन पनि पहिलादेखि नै इटालीलाई नै हो । यस सिजनमा इटालीले कुनै पनि खेलमा हार व्यहोरेको छैन । त्यसैले पनि इटालीलाई दाबेदार ठान्छु ।'

प्रमोद इङ्गल्यान्डलाई पनि उपाधियोग्य टिम मान्छन् । 'इङ्गल्यान्डको खेल निकै आक्रामक छ । स्टेर्लिङ र केनजस्ता राम्रा खेलाडी त्यहीँ छन्,' प्रमोद भन्छन्, 'थोरै गोल खाएर फाइनल आइपुगेको इङ्गल्यान्डले पनि आफूलाई दाबेदारको रूपमा प्रस्तुत गरेको छ ।'

प्रमोदलाई मन पर्ने टिम ब्राजिल र मन पर्ने खेलाडी मेस्सी कोपा अमेरिकामा फाइनल भिड्दै छन् । तर, आफूलाई मन पर्ने खेलाडीले नै कोपाको उपाधि चुमोस् भन्ने प्रमोदको इच्छा छ ।

प्रमोद भन्छन्, 'ब्राजिलको टिम निकै राम्रो छ । अर्जेन्टिनाका लागि उक्त टिम भारी पर्ने छ । तर, खेल हो जे पनि हुन सक्छ । अर्जेन्टिनाले उपाधि उचाले मेस्सीलाई मीठो उपहार हुने थियो । हाम्रो अपेक्षा मेस्सीमै छ ।'

संगीतकार अर्जुन पोखरेलले युरोकप र कोपा अमेरिकाका कुनै पनि खेल हेर्न छुटाएका छैनन् । उनी सामाजिक सञ्जालमा खेलको पूर्वअनुमानदेखि खेलपछि विश्लेषणसहितका स्टाटसहरू पोस्ट गरिरहन्छन् ।

युरोकपमा फाइनल भिड्दै गरेका दुई देशमा उनी इङ्गल्यान्डले जितोस् भन्ने चाहन्छन् । उनी भन्छन्, 'राम्रो टिम हुँदाहुँदै पनि इङ्गल्यान्डले युरोकपको उपाधि जित्न सकेको छैन । यस पटक जितेर इतिहास बनाओस् भन्ने मेरो इच्छा छ ।'

कोपा अमेरिकातर्फ अर्जुन अर्जेन्टिनालाई समर्थन गरिरहेका छन् । कारण, उनलाई मनपर्ने खेलाडी मेस्सी अर्जेन्टिनाका कप्तान हुन् । यस पटक मेस्सीकै लागि भए पनि अर्जेन्टिनाले कोपा जितोस् भन्ने अर्जुनको चाहना छ ।

'मेस्सी यो शताब्दीका उत्कृष्ट खेलाडी हुन् । तर, पनि उनले देशका लागि कुनै उपाधि दिलाउन सकेका छैनन्,' अर्जुन भन्छन्, 'मेस्सीकै समयमा अर्जेन्टिनाले कुनै उपाधि जित्यो भने मेस्सी र उनका समर्थकलाई आत्मसन्तुष्टि मिल्ने थियो । त्यसैले अर्जेन्टिनाले जित्नुपर्छ ।'

अभिनेत्री रेखा थापा युरोकपतर्फ रोनाल्डोको टिम पोर्चुगलको समर्थनमा थिइन् । पोर्चुगल बाहिरिएपछि उनी कुनै टिमको समर्थनमा छैनन् । उनी खेलको मज्जा लिइरहेकी छिन् ।

इटाली र इङ्गल्यान्डबीच हुने फाइनल खेल यसले जित्छ भन्दिनन्, रेखा । उपाधिका लागि मैदानमा पुगेका हरेक खेलाडीलाई उनी विजेता मान्छिन् । रेखा भन्छिन्, 'खेल देशले जित्ने होइन, खेलाडीले जिताउने हो । म खेलाडीलाई निकै सम्मान गर्छु । खेलका लागि मैदानमा उत्रिने हरेक खेलाडी मेरा लागि विजेता हुन् ।'

रेखालाई मनपर्ने देश ब्राजिल कोपा अमेरिकाका लागि अर्जेन्टिनाविरुद्ध मैदानमा उत्रिँदै छ । आफूलाई मन पर्ने देश फाइनलमा भए पनि रेखा दुवै देशलाई उपाधिका लागि योग्य ठान्छिन् ।

'जसले जिते पनि खेलाडीकै जित हुने हो,' उनले भनिन् ।

यो पनि...

युरोकप र कोपा अमेरिकामा सेलिब्रेटीको चासो : यस्तो छ 'फुटबल समीक्षा'

प्रकाशित मिति: शुक्रबार, असार २५, २०७८ ०६:३१