नेपाली सेलेब्रिटीलाई पाठ हुन सक्छ आमिर खान र किरण रावको डिभोर्स

A+ A A-

बलिउड अभिनेता आमिर खानले गत शनिबार पत्नी किरण रावसँगको सम्बन्ध टुङ्ग्याए । १५ वर्ष लामो वैवाहिक सम्बन्धलाई उनीहरूले आपसी सहमतिमा नै पूर्णविराम लगाएका हुन् । डिभोर्सपछि उनीहरूले संयुक्त वक्तव्य नै जारी गर्दै आफूहरू छुट्टिएको जानकारी दिए ।

आमिर र किरणको डिभोर्स शुभेच्छुकहरूका लागि 'सरप्राइज' नै थियो । किनकि यसअघि उनीहरूबीच कुनै पनि विवादको समाचार बनेको थिएन । उनीहरू एकसाथ काम गरिरहेका थिए ।

अहिले पनि आमिर र किरण एउटै फिल्ममा आवद्ध भएर काम गरिरहेका छन् । फिल्म 'लालसिंह चढ्ढा'मा आमिर मुख्य अभिनेता छन् भने किरण यस फिल्मकी कार्यकारी निर्माता हुन् । उनीहरूको डिभोर्सको विज्ञप्ति सार्वजनिक हुँदा पनि आमिर र किरण एउटै सेटमा थिए ।

आइतबार आमिर र किरणले संयुक्त रूपमा भिडियो वक्तव्य पनि दिए । जहाँ उनीहरूले आफूहरू सहमतिमै छुट्टिएको र आगामी दिनहरूमा एकसाथ काम गर्ने प्रस्ट पारेका छन् । सामाजिक काम तथा फिल्मको काममा पनि एक परिवार भएर काम गर्ने उनीहरूले प्रतिवद्धता गरेका छन् ।

आमिर र किरणले संयुक्त रुपमा जारी गरेको वक्तव्य

डिभोर्स यसै पनि राम्रो होइन । तर, आमिर र किरणले जसरी डिभोर्स गरे, यसलाई उदाहरणीय डिभोर्स मान्न सकिन्छ । उनीहरूले आपसी समझदारीमा कुनै भाँडभैलो नगरेर पनि डिभोर्स गर्न सकिन्छ भन्ने गतिलो उदाहरण दिएका छन् । त्यो मात्र होइन, आगामी दिनहरूमा पनि सहकार्य गर्ने भन्दै उनीहरूले दिएको प्रतिवद्धता प्रंशसनीय छ ।

नेपालका सेलेब्रिटी, अनि आम मानिसले यसबाट सिक्न सक्छन् – बिहे गरेपछि डिभाेर्स हुनैपर्छ भनेर हाेइन, बरू असमझदारीलाइ तिक्तताबेगर टुंगाेमा पुर्याउन ।

नेपालका सेलिब्रेटीहरूको डिभोर्सलाई केलाउने हो भने सबैभन्दा पहिला आउने नाम हो, छवि ओझा । निर्माता छवि ओझाले दुई अभिनेत्रीसँग डिभोर्स गरिसकेका छन् । उनक दुवै डिभोर्स सहज भएनन् ।

उमेरले छ दशकनजिक रहेका छवि अहिले पनि डिभोर्सकै लफडामा छन् । अभिनेत्री शिल्पा पोखरेलसँगको वैवाहिक सम्बन्धलाई टुङ्ग्याउन उनलाई सकस परिरहेको छ । छवि र शिल्पाको डिभोर्सको कहानी सुरु भएको दुई वर्ष पुग्यो । तर, शिल्पासँगको डिभोर्सले अन्तिम निर्णय पाएको छैन ।

छवि र शिल्पाबीच असमझदारी बढेपछि विभिन्न मिडियाको प्रयोग गर्दै एक-अर्कालाई आरोप प्रत्यारोप लगाए । शिल्पाले आफूलाई घरेलु हिंसा भएको आरोप लगाइन् । छविले पनि त्यसको जवाफमा शिल्पामाथि विभिन्न आरोप थपिदिए । उनीहरूबीचको आरोप-प्रत्यारोप मिडियामा छताछुल्ल नै भए ।

अहिले शिल्पाले छविसँग माना चामल र अंश मुद्दा दायर गरेकी छिन् । छविको सम्पूर्ण सम्पत्ति रोक्का गरिदिएकी छिन् । अहिले छवि विभिन्न मिडियामा पुगेर न्याय मागिरहेका छन् ।

उनै छविले शिल्पासँग विवाह गर्नका लागि अभिनेत्री रेखा थापालाई डिभोर्स दिएका थिए । लामो समय छुट्टिएर बसेका रेखा र छविको डिभोर्स पनि सहज थिएन । उनीहरूले पनि एक-अर्काविरुद्धमा विभिन्न अन्तर्वार्ता दिएका थिए ।

अहिले भने छवि र रेखाको सम्बन्ध सुध्रिएको छ । छवि र रेखा अहिले मिल्ने साथी बनेका छन् ।

यस्तै, हाँस्य कलाकार मनोज गजुरेलको डिभोर्समा पनि भाँडभैलो नै मच्चियो । मनोजकी पत्नी मीना ढकालले विभिन्न युट्युब च्यानलमा अन्तर्वार्ता दिँदै मनोजका बारेमा घिनलाग्दा टिप्पणी गरेकी थिइन् । उनले मनोजमाथि विभिन्न आरोप लगाइन् । तर, मनोज भने यस विषयमा मौन रहे ।

यस्तै, अभिनेता भुवन केसी र अभिनेत्री सुस्मिता केसीले पनि डिभोर्स गरे । छोरा अनमोल केसी हुर्किसकेपछि उनीहरूले वैवाहिक सम्बन्धलाई पूर्णविराम लगाएका थिए ।

डिभोर्सअगाडि उनीहरूका त्यति धेरै विवादहरू सुनिएनन् । तर, डिभोर्सपश्चात् भने सुस्मिताले भुवनमाथि विभिन्न टिक्काटिप्पणीहरू गरिरहिन् । सुस्मिताले भुवनलाई 'सुगर ड्याडी' समेत भन्न भ्याइन् । भुवनले पनि शान्त शैलीमा केही जवाफहरू फर्काए । खासमा उनीहरूको डिभोर्स पनि लफडायुक्त नै थियो ।

गायिका अञ्जु पन्त र गायक मनोजराज सिवाकोटीबीचको डिभोर्स पनि विवादमुक्त हुन सकेन । यस्ता धेरै सेलिब्रेटीहरू छन्, जसले वैवाहिक सम्बन्ध टुङ्ग्याउँदा वा टुङ्‍गिएपछि पनि एक-अर्काको विषयमा भद्दा टिप्पणी गरे ।

समाजशास्त्रीहरू दुवै पक्ष सबल हुन नसकेको खण्डमा यस्तो विवाद मच्चिने बताउँछन् । प्राध्यापक चैतन्य मिश्र भन्छन्, 'यदि दुवै जना आफ्नो-आफ्नो खुट्टामा उभिन सक्ने भए भने आफ्नो-आफ्नो गरेर खान्छु भन्ने आँट गर्छन् । उनीहरू कसैको दमन सहेर बस्दैनन् । यदि दुवै पक्ष सबल नभएकै कारण कलह मच्चिएर अवस्था डिभोर्ससम्म पुगेको हुन सक्छ ।'

आमिरको डिभोर्सको उदाहरण दिँदै मिश्रले थपे, 'उनीहरू एक-अर्कामा सक्षम थिए, सजिलै छुट्टिए । नेपालमा दुवै पक्ष सबल नभएरै किचलो भएको हो कि ?'

मिश्र सेलिब्रेटीको विवादित डिभोर्सले मात्र स्थान पाइरहेकाले पनि बढी किचलो देखिएको तर्क गर्छन् । 'साम्य रूपमा डिभोर्स भएका उदाहरणहरू पनि होलान्', मिश्र भन्छन्, 'तर, साम्य भएका समाचारहरू धेरै आउँदैनन् । विवादित समाचारहरू आइरहेका हुन्छन् । त्यसैले पनि नराम्रो देखिएको हो ।'

डिभोर्स नयाँ कुरा नभएको भन्दै यसलाई महत्त्वका साथ हेरिने कुराको विरोध गर्छन्, मिश्र । उनी भन्छन्, 'पहिलापहिला पनि श्रीमान्-श्रीमती छुट्टिएर बस्ने गर्थे । तर, उनीहरूले डिभोर्स गर्दैनथे । त्यसलाई सामान्य मानिन्थ्यो । अहिले हुने कुराहरूलाई पनि सामान्य रूपमा नै लिऊँ ।'

०००

सेलिब्रेटीको सिधा अर्थ हो- धेरैको नजर पर्ने/धेरैले चिन्ने । यसअर्थमा, उनीहरूलाई पछ्याउनेको संख्या धेरै हुन्छ । उनीहरूको नक्कल गर्नेहरू पनि धेरै हुन्छन् । वैवाहिक सम्बन्धलाई टुङ्ग्याउन लागेकाहरूका लागि आमिर-किरण उदाहरण बनेका छन् । नेपाली सेलिब्रेटीहरूले पनि यसबाट पाठ सिक्ने कि ?

प्रकाशित मिति: सोमबार, असार २१, २०७८ १९:३५