युरोकप र कोपा अमेरिकामा सेलिब्रेटीको चासो : यस्तो छ 'फुटबल समीक्षा'

A+ A A-

अहिले जताततै फुटबलको चर्चा छ । युरोकप २०२० र कोपा अमेरिकाका खेलहरू चलिरहेका छन् । फुटबलमा रुचि राख्नेहरू युरोकप र कोपा अमेरिका विशेष महत्वका साथ हेर्छन् ।

युरोकप फुटबल विश्वकपपछिको सबैभन्दा ठूलो प्रतियोगिता मानिन्छ । कोपा अमेरिका पनि अर्को ठूलो प्रतियोगितामा गनिन्छ । त्यसैले पनि अहिले फुटबलमा धेरैको ध्यान जानु स्वाभाविक छ । नेपालमा पनि युरोकप र कोपा अमेरिकाका खेललाई निकै चासोका साथ हेरिएको छ ।

नेपालका सेलिब्रेटीहरू पनि विभिन्न देशलाई समर्थन गर्दै युरोकप तथा कोपा अमेरिका हेरिरहेका छन् । खेलको नतिजा अनुमान गर्नेदेखि खेलपछिको समीक्षा गरेर सेलिब्रेटीहरूको फेसबुकमा स्टाटस लेख्ने गरेका छन् ।

कलाकार तथा निर्माता दीपकराज गिरी फुटबलमा विशेष चासो राख्छन् । युरोकप र कोपा दुवै तर्फका विशेष खेलहरू उनले छुटाएका छैनन् । युरोकपमा उनले इटालीलाई मन पराउँछन्, कोपा अमेरिकामा अर्जेन्टिना उनलाई मन पर्ने टिम हो ।

यी दुबै टिमको खेल दीपकराजले छुटाएका छैनन् । उपाधि जित्ने हकमा भने दुवै टिम कमजोर रहेको दीपकको विश्लेषण छ । उनी भन्छन्, ‘युरोकपमा अहिले सबै टिमहरू एकसे एक छन् । केही खेलमा इटालीले राम्रो खेल देखायो । त्यसैले इटालीले जितोस् भन्ने लागेको छ । तर, इटालीलाई गाह्रो छ ।’

दीपक युरोकपमा यस सजिनको मुख्य दाबेदार जर्मनीलाई देख्छन् । फ्रान्स र पोर्चुगलविरुद्ध जर्मनीले जुन खेल देखाएको छ, त्यसबाट दीपकले जर्मनीलाई मुख्य दाबेदार मानेका छन् ।

दीपक भन्छन्, ‘जर्मनीको खेल गज्जब देखिएको छ । सायद यस सिजन उसैको नाममा हो कि भन्ने लागेको छ । तर, अन्य टिम पनि कमजोर छैनन् है ।’

कोपा अमेरिकामा उनले ईच्छा अर्जेन्टिनाको जित हेर्ने छ । तर, त्यो पनि उनले कम सम्भावना देखेका छन् । ‘यस पटक कोपामा ब्राजिलले निकै सानदार खेल देखाइरहेको छ,’ दीपक भन्छन्, ‘सायद, कोपामा अरु देशको सम्भावना देखिन्न ।’

कलाकार दीपक आचार्य ‘काकु’ भने जर्मनीका समर्थक हुन् । उनले पहिलादेखि नै जर्मनीलाई सर्मथन गर्दै आएका छन् । युरोकपमा उनले जर्मनीको विकल्प देखेनन् । उनी भन्छन्, ‘म पहिलादेखि नै जर्मनको फ्यान । युरोकपमा पनि जर्मनकै समर्थनमा छु ।’

समूह चरणका दुई खेलमा जर्मनको प्रदर्शनबाट दीपक सन्तुष्ट थिए । तर, बुधबार हंगेरीविरुद्धको खेलमा भने जर्मनीले दीपकलाई झस्कायो ।

‘हंगेरीविरुद्ध जर्मनीले जित्ने धेरैको अनुमान थियो । मैले पनि जित नै साचेको थिए’, दीपक भन्छन्, ‘तर, सुरुमा नै हंगेरीले लिड गर्दा त झन्डै 'हर्टफेल' नै भएको थियो ।’

खेलको दोस्रो हाफमा जर्मनीले बराबरी गर्दा दीपक खुसीले दंग थिए । तर, खुसी मनाउन नपाउँदै हंगेरीले पुनः लिड बनायो । जर्मनीले त्यो गोल खाँदा उनको मनमा चिसो पसेको थियो । अन्त्यमा बराबरी भएर खेल सकिँदा जर्मनी नकआउट चरणमा पुग्यो । अनि दीपकले खुसी मनाए ।

जर्मनीले अबको खेलमा आफूलाई शशक्त रूपमा प्रस्तुत गरे फाइनल पुग्ने दीपकको अनुमान छ ।

कोपा अमेरिकामा भने दीपकले कुनै टिम छनोट गरेका छैनन् । खेलहरू भने हेरिरहेका छन् ।

संगीतकार कालीप्रसाद बाँस्कोटा युरोकपका सबै खेल नछुटाई हेरिरहेका छन् । उनको समर्थन यही टिमलाई भन्ने छैन । तर, स्पेन उनलाई मनपर्ने टिम हो ।

काली भन्छन्, ‘मलाई स्पेन राम्रो लाग्छ । नयाँ खेलाडीको वर्चश्व रहँदा पनि स्पेनले गतिलो खेलिरहेको छ । स्पेनको कमजोर पक्ष भनेको फिनिसिङ टच छैन । अरु राम्रो छ ।’ बुधबार भएको खेलमा भने स्पेनले शानदार खेल देखाएको कालीको विश्लेषण छ ।

मन पर्ने टिम स्पेन भए पनि यस सिजन फ्रान्सले जित्न सक्ने कालीको अनुमान छ । ‘फ्रान्सले रचनात्मक खेल खेलिरहेको छ । मलाई लाग्छ, यस सिजन फ्रान्सले नै लान्छ,’ कालीले भने । कालीले जर्मनलाई पनि मुख्य दाबेदार टिमका रूपमा हेरेका छन् ।

कालीलाई मनपर्ने खेलाडी लियोनल मेस्सी हुन् । कोपा अमेरिकाको प्रतिष्पर्धामा उनले मेस्सीको अर्जेटिनालाई नै समर्थन गरिहेका छन् । उनी भन्छन्, ‘कोपा मेस्सीले जितोस् भन्ने छ । तर, टिम बलियो नहुँदा मेस्सीलाई जित्न गाह्रो छ ।’

संगीतकार अर्जुन पोखरेल युरोकप तथा कोपा अमेरिकामा सबै खेल हेर्ने गर्छन् । उनी खेल सुरु हुनुपूर्व गोलको अनुमानदेखि खेलपछिको समीक्षा पनि गरिरहेका हुन्छन् ।

अर्जुनलाई युरोकपमा मन पर्ने टिम जर्मनी र स्पेन हुन् । उनलाई स्पेन र जर्मनीको खेल चित्तबुझ्दो लागिरहेको छ । यसपटकको उपाधिका मुख्य दाबेदारका रूपमा नै उनले जर्मनी र स्पेनलाई देखेका छन् ।

अर्जुन भन्छन्, ‘बेल्जियम, फ्रान्स र नेदरल्यान्डस् पनि दाबेदार टिम हुन् । तर, मलाई स्पेन वा जर्मनीले जित्छ जस्तो लागेको छ ।’

अर्जुनलाई कोपा अमेरिकामा ब्राजिल र अर्जेन्टिनाको खेल मनपर्छ । कोपा यीनै दुई देशमध्ये एकले जित्ने उनको अनुमान छ ।

अभिनेता पुष्प खड्का खासै युरोकप हेर्दैनन् । आफूलाई मन पर्ने खेलाडी नेइमारको टिम युरोमा नपरेकाले पनि उनले युरोकापलाई धेरै फलो गरेका छैनन् । तर, अलिक चर्चा भएका खेल भने उनी पनि हेर्छन् ।

‘घरमा अरुले हेरेको भएर मैले पोर्चुगल र जर्मनीको खेल हेरेँ । मज्जा आयो,’ पुष्प भन्छन्, ‘अब राम्रो खेल हुँदा हेर्ने सोचमा छु ।’

पुष्प अहिले युरोकपका कुनै टिमको समर्थनमा छैनन् । कोपा अमेरिकामा भने उनले ब्राजिललाई समर्थन गरेका छन् ।

प्रकाशित मिति: शुक्रबार, असार ११, २०७८ ०७:०१