निषेधाज्ञामा संगीतकार : कोही बेचैन, कोही काममा फर्किने तयारीमा

A+ A A-

संगीतकार वसन्त सापकोटाले दुई दिनअगाडि फेसबुकमा एउटा फोटो पोस्ट गरे । फोटोमा उनी गीत रेकर्डिङ गरिरहेका देखिन्छन् । क्याप्सनमा उनले लेखेका छन्- 'विस्तारै काममा फर्किँदै ।'

कोरोनाको दोस्रो लहर सुरु भएसँगै नेपाल सरकारले काठमाडौंलगायत केही जिल्लाहरूमा निषेधाज्ञा जारी गर्‍यो । जसका कारण काठमाडौं केन्द्रित रहने नेपाली गीत-संगीतको काम पनि सुस्ताउन पुग्यो । केहीले गोप्य रूपमा रेकर्डिङको काम गरे पनि धेरैजस्तो गायक/गायिका घरमा नै थुनिन पुगे ।

घरमा फुर्सदको समय पाउँदा संगीतकार सापकोटाले भने आधा दर्जनभन्दा बढी गीतको शब्द लेखे । त्यसैमा धुन भरे । उनी भन्छन्, 'यो निषेधाज्ञामा मैले आठवटा गीत तयार गरेको छु ।'

घरमा थुनिएर तयार गरेका यी गीतलाई अब उनी रेकर्डिङ गर्ने तयारीमा छन् । एउटा गीत उनले आफ्नै स्वरमा रेकर्ड गराइसके । बाँकी गीतहरू पनि अब रेकर्डिङ गराउने तर्खर गरिरहेका छन् उनी ।

वसन्त भन्छन्, 'कति समय घरमा नै थुनिएर बस्नु ? अब त सावधानी अपनाएर काम गर्नैपर्ने अवस्था आइसक्यो । मैले त सुरु पनि गरिसकेँ ।'

वसन्तले केही तीजका गीतहरू पनि बनाएका छन् । तीज नजिकिएसँगै ती गीतको रेकर्डिङ पनि गरिहाल्नुपर्ने दबाबमा उनी छन् । चाँडै तीजगीत पनि रेकर्ड गर्ने उनी सुनाउँछन् ।

त्यस्तै, संगीतकार अर्जुन पोखरेलले पनि निषेधाज्ञाको समयलाई भरपूर सदुपयोग गरे । उनले योबीचमा एक दर्जनभन्दा बढी गीतको धुन बनाए । जसमा आधा दर्जनभन्दा बढी गीतका शब्द पनि उनैले लेखे ।

अर्जुन निषेधाज्ञाले आफूलाई काम गर्न कुनै असर नगरेको बताउँछन् । उनी भन्छन्, 'म त काम गर्नुपर्छ भन्ने भएपछि काम गरिरहन्छु । निषेधाज्ञाको समयमा त झन् सेड्युल नै बनाएर काम गरेँ ।'

बिहानको खाना खाएपछि उनको संगीतिक सेड्युल सुरु हुन्छ । '११ बजेतिर खाना खान्छु । अनि आधा घण्टा सामाजिक सञ्जालमा भुलिन्छु । त्यसपछि ३ घण्टा अरु केही नसोची संगीतमा लाग्छु', अर्जुन भन्छन्, 'त्यसपछि खाजा खाएर पनि बेलुका ७ बजेसम्म संगीतलाई नै समय दिन्छु ।'

अर्जुन अहिलेको समयमा आफूलाई धेरै कामको अफर आइरहेकाले पनि अल्छी नगरी काम गरिरहेको बताउँछन् । उनी भन्छन्, 'यो समय बाहिरका कामहरू धेरै आएका छन् । त्योसँगै आफ्नै कम्पनीका लागि पनि काम गरिरहेको छु ।'

निषेधाज्ञाको समयमा आफूले सन्तुष्ट हुनेगरी काम गर्न पाएको अर्जुन बताउँछन् ।

यता संगीतकार दीपक शर्मा पनि धुन बनाउन व्यस्त छन् । निषेधाज्ञाको समयलाई सदुपयोग गर्दै उनले पनि १० वटा गीत तयार गरिसके ।

दीपक भन्छन्, 'पाँचवटाजति पहिला नै लिएका कामहरू थियो । त्यो गरेँ । बाँकी समयमा अरु गीतका धुनहरू बनाएर राखेको छु । कसैले मन पराएछ भने बेच्नेछु ।'

निषेधाज्ञामा दीपकले खासै फेसबुक चलाएका छैनन् । फेसबुकमा आउने कोरोना संक्रमण र त्यसबाट मृत्यु भएका समाचारहरूले उनलाई दिक्दार लाग्छ । म्यासेन्जरमा आएका म्यासेजहरू रिप्लाई गर्छन् । फुर्सद मिले युट्युबमा भिडियोहरू हेरेर बस्छन् ।

दीपक भन्छन्, 'फेसबुकमा आएका कुराहरूलाई हेर्न थाल्यो भने त मान्छे डिप्रेसनमा जान्छ । त्यो भएपछि काम गर्नै सकिन्न नि । त्यसैले मैले त बन्द नै गरिदिएँ ।'

अर्का संगीतकार राजनराज सिवाकोटीलाई संगीतका काम गर्न ध्यान नै गएको छैन । कोरोनाको यो महामारीमा मन शान्ति मनले काम गर्न नसकिएको उनले बताए ।

उनी भन्छन्, 'निषेधाज्ञा सुरु हुँदैगर्दा केही कामहरू गरेको थिएँ । पछि आफ्नै चिनेजानेका साथीभाइहरू कोरोनाले मरेका समाचारहरू सुन्दा काम गर्ने मुड नै बनेन । अहिले त म पूर्ण रेस्टमा छु ।'

गत लकडाउनमा संगीत सिर्जनामा जोड दिएका राजनराज अहिलेको निषेधाज्ञामा भने संगीत सिर्जनाभन्दा पनि सहयोग गर्नतिर लागे । उनी भन्छन्, 'अहिले त सिर्जना गर्नेभन्दा पनि कसलाई के समस्या परेको छ भन्नेतिर ध्यान दिन जरुरी थियो । त्यसैले त्यतै ध्यान दिइयो ।'

त्यस्तै, संगीतकार वसन्त थापा अहिले आफ्नो पारिवारसँगै समय बिताइरहेका छन् । उनी संगीत सिर्जनाको काम नै बन्द गरेर पारिवारसँग रमाइरहेका छन् ।

'अहिले एकदमै असामान्य परिस्थिति छ । यस्तो परिस्थितिमा कसैको मन शान्त छैन', उनी प्रश्न गर्छन्, 'बेचैन मन लिएर कसरी सिर्जना गर्नु र ?'

सामाजिक सञ्जालमा आउने मृत्युको समाचारले वसन्तलाई तर्साएको छ । उक्त कुराले उनको मनलाई बेचैन गराएको छ । भन्छन्, 'अहिले सामाजिक सञ्जालमा सबैभन्दा बढी कपी-पेस्ट हुने शब्द नै हार्दिक श्रद्धाञ्जलि रै'छ । त्यसले मनमा डर पैदा गरिदिएको छ । काममा ध्यान दिन नै सकिएको छैन ।'

बरु यो समयमा वसन्त फिल्म हेरिरहेका छन् । किताब पढिरहेका छन् । हिन्दी फिल्महरू हेर्न रुचाउने उनले यो अवधिमा धेरै हिन्दी फिल्म हेर्न भ्याए । सफल मान्छेहरूको जीवनी र आध्यात्मिक किताबहरू उनको रोजाइमा परेका छन् ।

प्रकाशित मिति: बुधबार, जेठ २६, २०७८ १८:०८