वैदेशिक रोजगारीमा रहेकाहरू खोपको दायरामा, कुन देशमा कति नेपालीले लगाए कोरोनाविरूद्धको खोप ?

वैदेशिक रोजगारीमा रहेकाहरू खोपको दायरामा, कुन देशमा कति नेपालीले लगाए कोरोनाविरूद्धको खोप ?

A+ A A-

वैदेशिक रोजगारीमा विभिन्न देशमा कार्यरत १५ लाखभन्दा धेरै नेपाली कामदारले कोरोनाविरुद्धको खोप लगाएका छन् ।

खोप लगाउनेमा सबैभन्दा बढी खाडीका देश र मलेसियामा कार्यरत नेपाली कामदार रहेको त्यहाँस्थित नेपाली कूटनीतिक नियोगहरूले जानकारी दिएका छन् ।

हाल वैदेशिक रोजगारीमा ४५ लाख नेपाली कार्यरत रहेको वैदेशिक रोजगार विभागको तथ्यांक छ । त्यसमध्ये खाडीका देश र मलेसियामा ८० प्रतिशत कामदार रहेको विभागको तथ्यांक छ ।

खाडीका देशमा रहेका ५० प्रतिशत नेपाली कामदारलाई कोरोनाविरुद्धको खोप रोजगारदाता देशले निःशुल्क लगाइदिएको दूतावासहरूले जानकारी दिएका छन् ।

खाडीका कतिपय देशमा रोजगारदाता कम्पनीले रोजगारीमा कार्यरत विदेशी कामदारले अनिवार्य रूपमा कोरोनाविरुद्धको खोप लगाउनुपर्ने व्यवस्था गरेको छ ।

वैदेशिक रोजगारीमा कार्यरत नेपाली कामदारले कोरोनाविरुद्धको खोप लगाउने क्रम जारी रहेका र कतिपयले दोस्रो चरणको खोप लगाउन थालेको दूतावासहरूले जानकारी दिएका छन् ।

मलेसिया

मलेसियामा हाल ५ लाखभन्दा धेरै नेपाली कामदार कार्यरत रहेको मलेसियास्थित नेपाली दूतावासले जनाएको छ । त्यसमध्ये करिब ३ लाखभन्दा धेरै नेपालीले कोरोनाविरुद्धको खोप लगाइसकेको दूतावासले जानकारी दिएको छ ।

मलेसिया सरकारले आप्रवासी श्रमिकले अनिवार्य र निःशुल्क कोरोनाविरुद्धको खोप लगाउनुपर्ने मापदण्ड बनाएको छ ।

मलेसिया ६ हजारभन्दा धेरै नेपाली कामदार कोरोना संक्रमित भएको दूतावासले जनाएको छ । कतिपय निको भएर काममा फर्किएको र केहीको उपचार भइरहेको दूतावासले जानकारी दिएको छ ।

मलेसिया सरकारले विदेशी कामदारलाई कोरोनाविरुद्धको खोप लगाइरहेको र पहिलो चरण लगाइसकेकालाई दोस्रो चरण लगाउन सुरु भएको मलेसियाका लागि नेपाली राजदूत उदयराज पाण्डेले जानकारी दिए ।

कतार

कतारमा साढे ४ लाखभन्दा धेरै नेपाली कामदार कार्यरत रहेको कतारस्थित नेपाली दूतावासले जनाएको छ । कतारमा पछिल्लो समय कोरोना भाइरसको संक्रमण नियन्त्रण हुँदै गइरहेको त्यहाँका स्थानिय सञ्चारमाध्यामले जनाएका छन् ।

कतारमा रहेका ३ लाखभन्दा धेरै नेपाली कामदारले कोरोनाविरुद्धको खोप लगाइसकेको दूतावासले जनाएको छ ।

कतार सरकारले विभिन्न क्षेत्रमा काम गर्न श्रमिकलाई कोरोनाविरुद्धको खोप अनिवार्य लगाउनुपर्ने स्वास्थ्यमापदण्ड नै बनाएको छ । कतारमा कार्यरत नेपाली कामदारले लगभग पहिलो चरणको खोप लगाएका र कतिपयलाई दोस्रो चरणको खोप समेत लगाउन सुरु भएको दूतावासले जनाएको छ ।

कतारमा ४ हजारभन्दा धेरै नेपाली कोरोना संक्रमित भएको दूतावासले जानकारी दिएको छ । कतारमा कार्यरत नेपाली कामदारलाई पनि कोरोनाविरुद्धको खोप लगाउने क्रम जारी रहेको र कतिपयले पहिलो लगाएर दोस्रो चरणको लगाउन थालेको कतारस्थित नेपाली दूतावासका डा. नारदनाथ भारद्वाजले जानकारी दिए ।

यूएई

यूएईमा करिब ४ लाख नेपाली कार्यरत रहेको त्यहाँस्थित नेपाली दूतावासले जनाएको छ । दूतावासका अनुसार यूएईमा कार्यरत २ लाख ५० हजारभन्दा धेरै नेपाली कामदारले कोरोनाविरुद्धको खोप निःशुल्क लगाएका छन् ।

यूएईले पनि कोरोनाविरुद्धको खोप उत्पादन गरेको थियो । हाल यूएईमा कोरोनाविरुद्धको खोप लगाउने काम धामधाम भइरहेको छ ।

साउदी अरब

साउदी अरबमा करिब ४ लाख नेपाली कामदार कार्यरत रहेको साउदीस्थित नेपाली दूतावासले जानकारी दिएको छ । साउदीमा कार्यरत २ लाख ५० हजारभन्दा धेरै नेपाली कामदारले कोरोनाविरुद्धको खोप लगाएको दूतावासले जनाएको छ ।

हाल पनि कोरोनाविरुद्धको खोप लगाउने क्रम जारी रहेको दूतावासले जनाएको छ । साउदी सरकारले विदेशी कामदारका हकमा अनिवार्य कोरोना खोप लगाउनुपर्ने स्वास्थ्य मापदण्ड लागू गरेको छ ।

साउदीमा कार्यरत नेपाली कामदारलाई रोजगारदाता कम्पनीले नै कोरोना खोप लगाउने विषेश व्यवस्था गरेको छ ।

साउदीमा ७ हजारभन्दा धेरै नेपाली कोरोना संक्रमित भए । धेरै उपचारपछि काममा फर्किएको र कतिपयको उपचार भइरहेको दूतावासले जनाएको छ ।

कुवेत

कुवेतमा ९० हजारभन्दा धेरै नेपाली कामदार कार्यरत रहेको कुवेतस्थित नेपाली दूतावासले जनाएको छ । कुवेतमा रहेको ६० हजारभन्दा धेरै नेपाली कामदारले कोरोनाविरुद्धको खोप लगाइसकेको दूतावासले जनाएको छ ।

कुवेतमा कार्यरत नेपाली कामदारलाई कोरोनाविरुद्धको खोप लगाउने काम भइरहेको दूतावासले जनाएको छ । कुवेत सरकारले समेत विदेशी कामदारका हकमा अनिवार्य कोरोनाविरुद्धको खोप लगाउनपर्ने व्यवस्था लागू गरेको छ ।

ओमान

ओमानमा करिब ६० हजार नेपाली कामदार कार्यरत रहेको ओमनस्थित नेपाली दूतावासले जनाएको छ । ओमानमा रहेको अधिकांश नेपाली कामदारलाई पहिलो चरण कोरोनाविरुद्धको खोप लगाइसकेको दूतावासले जानकारी दिएको छ ।

ओमानमा कोरोना संक्रमण अन्य देशको तुलनामा कम फैलिएको थियो । ओमान सरकारले पनि विदेशी कामदारका हकमा अनिवार्य कोरोनाविरुद्धको लगाउनुपर्ने व्यवस्था लागू गरेको थियो ।

बहराइन

बहराइनमा रहेका अधिकांश नेपाली कामदारलाई पहिलो चरण कोरोनाविरुद्धको खोप लगाइसकेको बहराइनस्थित नेपाली दूतावासले जानकारी दिएको छ ।

बहराइनमा कोरोना भाइरस नियन्त्रणका लागि त्यहाँको सरकारले तीब्र रुपमा कोरोनाविरुद्धको खोप लगाएको दूतावासले जनाएको छ । हाल बहराइनमा करिब ४० हजार नेपाली कामदार कार्यरत रहेको दूतावासको तथ्यांक छ । बहराइनमा पनि अन्य देशको तुलनामा कोरोना भाइरसको संक्रमण कमै फैलिएको थियो ।

दक्षिण कोरिया

हाल दक्षिण कोरियामा ५० हजार नेपाली कामदार कार्यरत रहेको कोरियास्थित नेपाली दूतावासले जनाएको छ ।

कोरियामा कार्यरत अधिकांश नेपाली कामदारले समेत कोरोनाविरुद्धको खोप लगाएको दूतावासले जनाएको छ ।

कोरिया सरकारले विदेशी कामदारका हकमा अनिवार्य कोरोनाविरुद्धको खोप लगाउनुपर्ने स्वास्थ्य मापदण्ड व्यवस्था गरेको थियो । सोही अनुसार नेपाली कामदारले पनि कोरोनाविरुद्धको खोप लगाएको दूतावासले जनाएको छ ।

जापान

जापानमा अध्ययन र रोजगारीमा गरी करिब ८० हजार नेपाली रहेको जापानस्थित नेपाली दूतावासले जनाएको छ ।

जापानमा पनि कोरोना भाइरसको संक्रमण फैलिदै गएपछि प्राय सबै विदेशी नागरिकलाई कोरोनाविरुद्धको खोप लगाइसकेको दूतावासले जानकारी दिएको छ ।

जापानले पनि स्वास्थ्य मापदण्डभित्र कोरोनाविरुद्धको खोप अनिवार्य गरेको छ । जापानमा अध्ययरत विद्यार्थी र रोजगारीमा कार्यरत कामदारलाई समेत कोरोनाविरुद्धको खोप लगाएको दूतावासले जनाएको छ ।

इजरायल

हाल इजरायलमा करिब २ हजार नेपाली कामदार कार्यरत रहेको इजरायलस्थित नेपाली दूतावासले जनाएको छ । यहाँ रहेको नेपाली कामदारलाई प्राय कोरोनाविरुद्धको खोप लगाइसकेको दूतावासले जनाएको छ ।

इजरायलमा कोरोना भाइरस नियन्त्रणमा आइसकेको छ । इजरायलले नै उत्पादन गरेको कोरोनाविरुद्धको खोप त्यहाँ रहेको विदेशी कामदारलाई लगाएको थियो ।

साइप्रस

साइप्रसमा रहेका नेपाली कामदारलाई पनि कोरोनाविरुद्धको खोप लगाउने काम भइरहेको साइप्रसलाई हेर्दै आएको इजरायलमा रहेको नेपाली दूतावासले जानकारी दिएका छ ।

हाल साइप्रसमा अध्ययन र रोजगारीमा गरी १५ हजार नेपाली रहेको दूतावासले जनाएको छ । जसमा अधिकांशले कोरोनाविरुद्धको खोप लगाएको दूतावासले जानकारी दिएको छ ।

प्रकाशित मिति: बुधबार, जेठ १२, २०७८ ०७:३३