नेपालहुँदै भारतीय कामदार धमाधम साउदीतिर, १० दिन नेपाल बसेकाले पनि पेस गर्छन् भारतकै पीसीआर रिपोर्ट

नेपालहुँदै भारतीय कामदार धमाधम साउदीतिर, १० दिन नेपाल बसेकाले पनि पेस गर्छन् भारतकै पीसीआर रिपोर्ट

A+ A A-

नेपालहुँदै साउदी अरब जाने केही भारतीय कामदार कोरोना संक्रमित भेटिएका छन् । गत सातादेखि सरकारले भारतीय कामदारलाई चार्टर्ड उडानमार्फत साउदी जान अनुमति दिएको थियो ।

हाल, नेपालबाट दैनिक २५० जनाभन्दा धेरै भारतीय कामदार साउदी गइरहेको त्रिभुवन अन्तर्राष्ट्रिय विमानस्थल कार्यालयले जानकारी दिएको छ ।

नेपाल र भारतबीच भएको एयर बबल सम्झौताअनुरुप दुई मुलुकको उडान नियमित कायमै छ । भारतीय नागरिकका हकमा साउदीका लागि सातामा १० वटा चार्टर्ड उडान भइरहेको विमानस्थलले जनाएको छ । चार्टर्ड उडानको अनुमति दिइएसँगै भारतीय कामदारहरू धमाधम साउदी जान थालेका हुन् ।

तर, साउदी हिँडेका धेरै भारतीयले नक्कली पीसीआर रिपोर्ट पेस गरेको गल्फ एप्रुभल मेडिकल सेन्टर (गाम्का) का एक कर्मचारीले बताए । साउदी हिँडेका भारतीय कामदार कोरोना संक्रमित भएको र नक्कली पीसीआर रिपोर्ट बनाएको विषयमा स्वास्थ्य र परराष्ट्र मन्त्रालयलाई जानकारी गराएको गाम्काका ती कर्मचारीले जानकारी दिए ।

यद्यपि मन्त्रालयहरूले यस विषयमा चासो नदिएको उनको भनाइ छ । ‘नेपाल आएर १० दिन बसेका भारतीय कामदारले २४ घण्टाअगाडि भारतकै मेडिकलमा कोरोना पीसीआर गरेको रिपोर्ट पेस गर्छन्,’ ती कर्मचारीले भने, ‘यसको असर नेपालमा पर्छ । नेपालमा राम्रो कोरोना परीक्षण हुँदैन भन्ने साउदी सरकारलाई भ्रम पर्छ ।’

नेपालहुँदै साउदी जाने भारतीयले नेपालको सरकारी अस्पतालमा परीक्षण गरेको पीसीआर रिपोर्ट पेस गरेपछि मात्र उडान अनुमति दिनुपर्ने उनको भनाइ छ । गाम्काले वैदेशिक रोजगारीमा साउदी अरब, बहराइन र ओमान जाने कामदारको स्वास्थ्य परीक्षण गर्दै आएको छ ।

साउदी जाने भारतीय कामदारलाई पीसीआर परीक्षणको रिपोर्ट भए मात्र यात्रा अनुमति दिन सम्बन्धित पक्षलाई निर्देशन दिइएको स्वास्थ्य मन्त्रालयका प्रवक्ता जोगेश्वर गौतम (समाचार तयार पार्दा गौतम स्वास्थ्य मन्त्रालयको प्रवक्ता थिए) बताउँछन् ।

नक्कली पीसीआर रिपोर्ट देखाएर गइरहेको सम्बन्धमा स्वास्थ्य मन्त्रालय जानकार नभएको भन्दै उनले गौतमले यस विषयमा स्वास्थ्य सम्बन्धित पक्षसँग जानकारी लिने बताए ।

कोरोना भाइरसको दोस्रो लहर सुरु भएसँगै खाडीका देश, मलेसिया तथा युरोपका देशले अन्तर्राष्ट्रिय उडानमा रोक लगाएका छन् । भारतीय कामदारलाई चार्टर्ड उडानका लागि अनुमति दिएसँगै कतिपय रोजगारदाता देशले नेपाललाई कोरोना महामारीको रेड जोनमा राख्न थालेका छन् ।

रोजगारदाता देशका कम्पनीले घर बिदामा आएका नेपाली कामदारलाई समेत प्रवेशमा अनुमति दिन छाडेको वैदेशिक रोजगार व्यवसायीले बताइरहेका छन् ।

सरकारले भारतीय कामदारलाई साउदी जान चार्टर्ड उडानको अनुमति दिए पनि घर बिदामा आएको नेपाली श्रमिकलाई चार्टर्ड उडानको विषयमा केही निर्णय नगरेको उनीहरूको गुनासो छ । हाल साउदीबाट घरबिदामा आएका ३ हजारभन्दा धेरै कामदार रोकिएको व्यवसायीहरू बताउँछन् ।

नेपाललाई ट्रान्जिट बनाएर साउदी जान काठमाडौं आएका ३ हजार भारतीय कामदारलाई चार्टर्ड उडानका लागि गत सोमबार अनुमति दिइएको नागरिक उड्डयन प्राधिकरणले जानकारी दिएको छ ।

कोभिड महामारी नियन्त्रण तथा रोकथामका लागि सरकारले २३ वैशाखदेखि अन्तर्राष्ट्रिय हवाई उडानमा रोक लगाएको छ । हाल सरकारले भारत, साउदी, कतार र चीनसँग चार्टर्ड उडान गरिरहेको छ ।

हालसम्म ७० वटा चार्टर उडान भएको टीआईएले जानकारी दिएको छ ।

प्रकाशित मिति: मंगलबार, जेठ ११, २०७८ १०:३१