जिउँदो नफर्किने डरले दिल्लीका कोरोना संक्रमित अस्पतालै जान छाडे

A+ A A-

भोजपुरका दिनेश राई दिल्लीस्थित सर्खेत शहरको एउटा कोलोनीमा सुरक्षा गार्डको काम गर्दै आएका छन् । राईले दैनिक दर्जनौँ मानिस कोरोना संक्रमित भएर आँखैअगाडि मृत्यु भएको देख्ने गरेको सुनाउँछन् ।

दिल्लीमा कोरोना महामारीको असर कस्तो छ भन्ने देख्नेलाई मात्र थाहा हुन्छ । बाहिर जस्तो हल्ला भइरहेको छ, त्योभन्दा धेरै कोभिडको महामारीमा दिल्लीभित्र भएको राईले बताए । ‘दिल्लीमा कोरोना संक्रमितको संख्या घटेको होइन । दिल्लीमा कोरोना संक्रमित भएर उपचार गर्न अस्पताल जाने अवस्था छैन । फेरि, दिल्लीमा कोरोना संक्रमित भएर अस्पताल पुर्‍याइएका धेरै बिरामी घर फर्किंदैनन्,’ उनले भने, ‘दिल्लीमा कोरोना महामारी विगतभन्दा केही सुधार भएको छ । तर, बाहिर हल्ला भएजस्तो कोरोना नियन्त्रण भने भएको छैन । दिल्लीमा धेरै संक्रमितले अस्पताल नगई घरैमा उपचार गर्न थाले ।’

दिल्लीमा अस्पतालबाहिर कोरोनाका कारण मरेका नागरिकको संख्या नगन्य भएको उनको भनाइ छ । कोरोनाका कारण एउटा बस्तीमा दैनिक करिब १०–१५ जनाको मृत्यु भइरहेको देखेको राईले सुनाए । रोजगारीका लागि युरोप हिँडेका राई दलालले फसाएपछि दिल्लीमै सुरक्षा गार्डको काम गर्न थालेका थिए ।

यस्तै, दिल्लीमा कोरोना भाइरस घट्ने–बढ्नेभन्दा पनि परीक्षण र उपचार गराउन अस्पताल जान संक्रमित डराउन थालेको परिवारसँगै दिल्लीमा बसेर औषधि निर्माण कम्पनीमा काम गर्दै आएको कञ्जनपुरका रवि जैसी बताउँछन् ।

दिल्लीमा अहिले पनि पराई अथवा दोस्रो मान्छे देख्यो कि भाग्ने र तर्किने अवस्था रहेको जैसीले बताए । ‘तीन साताअघि श्रीमती र नौ वर्षीय छोरा संक्रमित भए । श्रीमती अस्पताल जान मानिन । घरैमा उपचार गर्‍यो । एकातिर अस्पतालमा बेड पाइँदैन । अर्कोतिर उपचार गर्न अस्पताल पुर्‍याएको बिरामी जिउँदो फर्किन्छ भन्ने टुंगो हुँदैन,’ उनले भने, ‘दिल्लीमा कोरोना संक्रमितको अवस्था नाजुक छ । २० दिनअघि नजिकै बस्ने तीन जना कोरोना संक्रमित अस्पताल भर्ना भएका थिए । भोलिपल्ट मृत्यु भएको सुनियो ।’

दिल्लीमा कोरोना महामारीको अवस्था उस्तै छ । विगतभन्दा उपचार र अक्सिजन समयमा पाइने गरेको उनको भनाइ छ । दिल्लीमा कोरोना संक्रमितलाई परिवारले घरैमा घरेलु र आयुर्वेदिक उपचार धेरै गर्न थालिएको जैसीले जानकारी दिए ।

दिल्लीमा कोरोना संक्रमित अस्पतालभन्दा घरमै चाँडो निको हुन थाले । कोरोना संक्रमण भई उपचारका लागि अस्तपाल गएका छिमेकी घर फर्किन छाडेपछि दिल्लीमा कोरोना भाइरसको त्रास बढेको उनले बताए ।

अहिले नयाँ दिल्लीमा कोरोना महामारी नियन्त्रण हुँदै गइरहेको बताइए पनि संक्रमण भएर लक्षण देखिँदासमेत उपचार र परीक्षण गराउन छोडेको पाइएको छ ।

भारतमा दोस्रो लहरको कोरोना महामारीमा अहिलेसम्म ४० नेपालीले ज्यान गुमाइसकेका छन् भने ६ हजारभन्दा धेरै संक्रमित रहेको नेपालीहरूको हकहितका लागि काम गर्दै आएको संस्था मिसन नेपाली संघले जानकारी दिएको छ ।

भारतमा कोरोनाका कारण अझ धेरै नेपाली संक्रमित भएको तर उनीहरू अस्पताल जान सक्ने अवस्था नभएको समेत संघले जनाएको छ । भारतमा कोरोना संक्रमितहरू भारतस्थित नेपाली दूतावासले सहयोग नगरेको गुनासो गर्दै आएका छन् । भारतमा धेरै नेपालीहरू कोरोना संक्रमित भए पनि आधार कार्ड नहुँदा अस्पताल जान सक्ने अवस्था नभएको उनीहरूको भनाइ छ ।

दिल्लीमा दैनिक कोरोना संक्रमणका कारण दैनिक ५ सयभन्दा धेरैको मृत्यु भइरहेको छ भने २० हजारभन्दा धेरै संक्रमित थपिने गरेका छन् ।

प्रकाशित मिति: आइतबार, जेठ ९, २०७८ १९:१७