भारतीय श्रमिकलाई साउदी उड्ने अनुमतिले रोजगारदाताको 'रेड जोन'मा नेपाल

फाइल तस्वीर

A+ A A-

सरकारले चार्टर उडानको अनुमति दिएसँगै हाल भारतीय कामदारहरू त्रिभुवन अन्तर्राष्ट्रिय विमानस्थलबाट धमाधम साउदी गइरहेका छन् ।

नेपाललाई ट्रान्जिट बनाएर साउदी जान काठमाडौं आएका झण्डै २ हजार भारतीय कामदारलाई चार्टर उडानका लागि सोमबार अनुमति दिएको नागरिक तथा उड्डयन प्राधिकरणले जानकारी दिएको छ ।

भारतीय कामदारलाई चार्टर उडानका लागि अनुमति दिएसँगै कतिपय रोजगारदाता देशले नेपाललाई कोरोना महामारीको रेड जोनभित्र राख्न थालेका छन् । कोरोनाको भारतीय ‘भेरियन्ट’ का कारण यतिबेला खाडीका देश, मलेसिया र युरोपका देशले अन्तर्राष्ट्रिय उडानमा रोक लगाएका छन् ।

युरोपदेखि मध्यपूर्वका सबै देशले भारतसँगको प्रत्यक्ष हवाई उडान बन्द गरेका छन् । तर, नेपालले बेलैमा भारतसँगको हवाई उडान बन्द नगर्दा नेपालमा कोरोनाको उच्च जोखिम रहेको भन्दै मुख्य रोजगारदाता देशले नेपालबाट तत्काल कामदार नलिन नसक्ने जानकारी गराउन थालेको रोजगार व्यवसायी बताउँछन् ।

पछिल्लो समय मुख्य रोजगारदाता देशले नेपालसँग उडान मात्र होइन, कोरोना महामारी संक्रमण धेरै फैलिने देशभित्र राख्दै कामदार आपूर्तिमा रोक लगाउने विषयमा मेल गर्न थालेको वैदेशिक रोजगार व्यवसायी संघका महासचिव सुजितकुमार श्रेष्ठले बताए ।

‘सरकारले नेपालको विमानस्थल प्रयोग गरेर सातामा १० वटा उडान साउदीका लागि अनुमति दिएको छ । भारतीय नागरिक नेपालको विमानस्थल प्रयोग गरेर जाँदा कोरोनाको उच्च जोखिम देशमा नेपाललाई पनि रोजगारदाता देशले देखाउन थालेका छन्,’ उनले भने, ‘अप्रत्यक्ष रूपमा कोरोनाको उच्च जोखिम रहेको भन्दै कतिपय रोजगारदाता देशले कामदार तत्काल नलिने भएका छन् । सरकारका कारण नेपाललाई रोजगाराता देशले 'रेड जोन'भित्र राखे प्रक्रिया पुगेर भिसा लागेका ४० हजारभन्दा धेरै कामदार जान नपाउने सम्भावना बढ्यो ।’

भारतीय कामदारलाई चार्टर ट्रान्जिट दिएका कारण घर बिदामा आएका कामदारसमेत तत्काल जान नपाउने अवस्था सिर्जना भएको उनको भनाइ छ ।

सरकारले समस्या परेका भारतीय कामदारलाई मध्यनजर गर्दै साउदीका लागि चार्टर उडान अनुमति दिएको संस्कृति, पर्यटन तथा नागरिक उड्डयन मन्त्रालयका सह–सचिव तथा प्रवक्ता तारानाथ अधिकारी बताए ।

नेपाल हुँदै तेस्रो देश हिँडेका र नेपालमा रोकिएका भारतीय कामदारलाई स्वास्थ्य मापदण्ड अपनाएर मात्र चार्टर अनुमति दिएको उनले बताए । वैदेशिक रोजगारीबाट घर बिदामा आएका कादारलाई कसरी पठाउने भन्ने विषयमा छलफल भइरहेको उनको भनाइ छ ।

यही साता सरकारले भारतीय दूतावासको आग्रहमा नेपालमा अड्किएका भारतीय नागरिकलाई साउदी लैजान सातवटा नेपाल एयरलाइन्सको विमान तथा तीनवटा हिमालय एयरलाइन्सको उडानको अनुमति दिएको छ । कम्पनीले साउदी अरबको दमामसम्म लैजान प्रत्येक भारतीयबाट ८ सय २० अमेरिकी डलर भाडा निधारण गरेको छ । याे साता १० वटा उडान तय भएकाे छ ।

प्रकाशित मिति: बुधबार, जेठ ५, २०७८ १८:४७