कतार र चीनको ग्वान्जाउमा हप्तामा एक पटक उडान गर्ने मन्त्रिपरिषद्को निर्णय

A+ A A-

सरकारले कतार र चीनको ग्वान्जाउमा हवाई उडान खुला गर्ने निर्णय गरेको छ । सोमबार बसेको मन्त्रिपरिषद बैठकले कतार र चीनमा साताको एक पटक उडान गर्ने निर्णय गरेको हो ।

कतारमा नेपाल एयरलाइन्स र हिमालय एयरलाइन्सले उडान गर्दै आएको छ । चीनको ग्वान्जाउमा भने चार्टर्ड उडान मात्रै हुँदै आएको छ । सातामा एक–एक उडान गर्नगरी खुला गरिएको परराष्ट्रमन्त्री प्रदिप ज्ञवालीले जानकारी दिए ।

पछिल्लो समय निषेधाज्ञाको कारण अन्तर्राष्ट्रिय उडान बन्द भइरहेका बेला सरकारले स्वास्थ्य सामग्री र मानवीय आपूर्ति नै रोकिएपछि उडान खुला गर्ने निर्णय गरेको मन्त्री ज्ञवालीले बताए । सरकारले आवश्यकता हेरी अन्तर्राष्ट्रिय उडानलाई सहज बनाउँदै लैजाने उनको भनाइ छ ।

अन्तर्राष्ट्रिय उडान बन्द हुँदा साउदी जान नेपालमा रोकिएका भारतीय नागरिकका हकमा समेत उडान खुला गरिएको छ । नेपालमा रोकिएका भारतीय नागरिकलाई १० उडानमार्फत साउदी जान अनुमति दिइएको हो ।

अन्तर्राष्ट्रिय उडान बन्द हुदाँ साउदी हिडेको ३ हजारभन्दा धेरै भारतीय नागरिक नेपालमा रोकिएका नेपालस्थित भारतीय दूतावासले जनाएको छ । दूतावासकै आग्रहमा सरकारले साउदीका लागि १० वटा चार्टर उडान गर्न अनुमति लिएको हो ।

कोरोना भाइरसको दोस्रो लहरको महामारी फैलिएसँगै सरकारले जेठ १७ गतेसम्मका लागि अन्तर्राष्ट्रिय उडानमा रोक लगाएको छ । आन्तरिक उडान अनिश्चितकालका लागि बन्द छ ।

चार्टर र उद्धार उडान हुन सक्ने भनिए पनि सरकारले आफ्ना नागरिकका लागि कुनै देशमा उडान गरेको छैन । उडान कहिलेबाट उडान गर्ने भन्ने मिति भने खुलाइएको छैन ।

प्रकाशित मिति: मंगलबार, जेठ ४, २०७८ ११:३१