विदेशमा 'अवैध' भएका नेपालीलाई समस्या: न कोरोनाको खोप लगाउन सक्छन्, न स्वास्थ्य परीक्षण गर्न पाउँछन्

विदेशमा 'अवैध' भएका नेपालीलाई समस्या: न कोरोनाको खोप लगाउन सक्छन्, न स्वास्थ्य परीक्षण गर्न पाउँछन्

A+ A A-

५ वर्षअघि वैदेशिक रोजगारीका लागि मलेसिया पुगेका धनकुटाका मनराज राई घर फर्किएका छैन । करार अवधि सकिएको दुई वर्ष भए पनि उनी स्वदेश नफर्किए मलेसियाको जोहोरबारूमा काम गर्छन् ।

अवैध भएर बसेकाले कोरोना भाइरसविरुद्धको खोप लगाउन नपाएको राईले बताए ।

भागेर धेरै कमाउने लोभमा अवैध हुँदा आफू फसेको राई बताउँछन् । ‘कोरोना भाइरस दोस्रो लहरको संक्रमण फैलिएसँगै त्रासमा छु । स्वास्थ्य परीक्षण गर्न जाने अवस्था नै छैन । साथमा राहदानी नभएकाले स्वास्थ्य परीक्षण गराउन समस्या भइरहेको छ,' उनले भने, ‘मलेसियामा रहेको नेपाली दूतावाससँग गुहार माग्न कतिपटक फोन गरेँ उठदैन । कम्पनीलाई कोरोना परीक्षण गराउन आग्रह गर्दै छु । हेरौँ, के हुन्छ ।’

साथमा राहदानी नभएकाले स्वदेश फर्किन सक्ने अवस्था नभएको राईको भनाइ छ । मलेसियाको मुहार, जोहोरबारू, मलेसिया क्यामरुनलगायत क्षेत्रमा थुप्रै नेपालीहरू अवैध भएर काम गरिरहेको उनी बताउँछन् । कोरोना संक्रमित भए उनीहरूलाई पनि उपचारमा समस्या हुने राई बताउँछन् ।

त्यस्तै, ६ वर्षअघि घरेलु रोजगारीका लागि यूएई पुगेकी मोरङकी आसा गौतम (नाम परिर्वतन) पनि स्वदेश फर्किएकी छैनन् । उनी कोरोना भाइरसको महामारीमा रोजगारादाता कम्पनीको सहयोगमा यूएईमै बसिन् ।

उनको करार अवधि सकिएको ४ वर्ष भयो । सरकारले घरेलु महिला कामदार वैदेशिक रोजगारीमा यूएई जान प्रतिबन्ध लगाएपछि पुनः फर्किन नपाउन डरमा स्वदेश नफर्किएको गौतमले बताइन् ।

‘कोरोना परीक्षण गर्न जाऊँ आफूसँग न पासपोर्ट छ, न भिसा छ । बाहिर निस्किदा प्रहरीले पक्राउ गर्ने डरले अस्पताल जान पनि सकेको छैन,’ उनले भनिन्, ‘हामी चार जना नेपाली महिला एक महिला होस्टेलमा सरसफाईको काम गर्छौँ । चारै जना कोरोना भाइरसविरुद्धको खोप लगाउन तथा परीक्षण गराउन अस्पतालसम्म जानसक्ने अवस्था छैन ।’

पक्राउ पर्ने डरले २ वर्षदेखि बाहिर निस्कन नसकेको उनको भनाइ छ । घर फर्किन यूएईस्थित नेपाली दूतावासमा सहयोग मागिरहेका गौतम बताउँछिन् ।

यसैगरी, कतारमा अवैध रूपमा बसेर काम गरिरहेका रामेछापका नरेन्द्र तामाङ पनि कोरोना भाइरसको परीक्षण गराउन समस्या भइरहेको बताउँछन् । सामान्य ज्वरो आए पनि उपचारमा समस्या भइरहेको उनको भनाइ छ । अवैध भएकाले खोप लगाउन र घर फर्किन समस्या भइरहेको उनको भनाइ छ ।

खाडीका देश र मलेसियामा करार अवधि सकिएका नेपाली कामदार कोरोनाको त्रास भए पनि अवैध भएकाले परीक्षण गराउन समस्या भइरहेको बताउँछन् । अवैध भएकाले कोरोना लागीहाले कम्पनीमै औषधि खाएर बस्नुपर्ने बाध्यता भएको उनको भनाइ छ ।

रोजगारदाता देशले करार अवधि सकिएका आप्रवासी कामदारलाई स्वदेश फर्किने अवसर दिए पनि अटेर गरी रोजगारदाता कम्पनीमा शरण लिएर बस्दा समस्यामा पर्ने गरेको सम्बन्धित देशका कूटनीतिक नियोगहरूले जानकारी दिएका छन् ।

मलेसिया सरकारले पटक–पटक करार अवधि सकिएका विदेशी कामदारलाई स्वदेश फर्किन अवसर दिएको मलेसियास्थित नेपाली दूतावासले जानकारी दिएको छ ।

करार अवधि सकिएका कामदार लुकेर काम गर्ने भएकाले उनीहरूका समस्या दूतावाससम्म कमै आउने गरेको र कोरोना संक्रमति भएर उपचार गर्न समस्या हुँदा दूतावासले सहयोग गर्ने उनको भनाइ छ ।

प्रकाशित मिति: मंगलबार, जेठ ४, २०७८ ०७:५५