प्रकाश सपुत भन्छन्- कोरोनाको लक्षण डर पनि रहेछ, अब बाँच्दिनँजस्तो लागेको थियो

प्रकाश सपुत भन्छन्- कोरोनाको लक्षण डर पनि रहेछ, अब बाँच्दिनँजस्तो लागेको थियो

A+ A A-

गायक प्रकाश सपुत आफ्नो नयाँ गीत 'मेरो पनि होइन र यो देश' सार्वजनिक गर्ने दौडमा थिए । हरेक गीत सार्वजनिक गर्दा प्रकाश निकै उत्साहित हुन्छन् । यो गीत सार्वजनिक गर्न पनि उनमा छुट्टै उत्साह थियो । दर्शक/स्रोताले दिने प्रतिक्रियाको व्यग्र प्रतीक्षामा थिए उनी ।

तर, प्रकाशको त्यो जोसलाई उनको शरीरले साथ दिइरहेको थिएन । सम्पादनको टेबुलमा बस्दादेखि नै उनलाई गाह्रो भइरहेको थियो । ढाड दुख्थ्यो, शरीर गलेको थियो ।

सुरुमा कामको धपडीले होला भन्ने अड्कल काटे । गीत सार्वजनिक गर्न पूर्वनिर्धारित समयभन्दा ढिला भइसकेको थियो । त्यसैले काम रोक्न चाहेनन् । निरन्तर खटिए ।

गीत सार्वजनिक भएको केही दिनमा प्रकाशको शरीर सहनै नसक्ने गरी दुख्यो । छाती पोल्यो । सास रोकिएजस्तो भयो । कोरोनाको दोस्रो लहर फैलिइरहेको समयमा प्रकाशलाई डर लाग्यो- कतै कोरोना नै त होइन ?

१६ वैशाखमा पीसीआर गराए । १७ गते रिपोर्ट आयो- पोजिटिभ ।

प्रकाश आत्तिएनन् । किनभने, उनलाई पहिला नै पोजिटिभ आउन सक्ने शंका थियो । उनी भन्छन्, 'रिजल्ट सोचेजस्तै आएको थियो । त्यसैले आत्तिइनँ ।'

घरमा नै आइसोलेट भएका प्रकाशको मनमा प्रश्न जाग्यो, 'कहाँबाट सर्‍यो होला ?'

प्रकाशले नयाँ गीतको छायांकन लगभग दुई साताअगाडि सकाएका थिए । बाहिरी चहलपहल सामान्यजस्तै थियो । प्रकाश कफी खान निस्किरहन्थे । त्यो मात्र होइन, प्रकाशले यहीबीचमा नयाँ वर्षमा आयोजित केही कार्यक्रममा प्रस्तुति दिन पुगिसकेका थिए ।

अब प्रकाशले जवाफ भेट्ने भएनन् । यसमा धेरै दिमाग खियाउन पनि चाहेनन् । सोचे, 'सायद मेरै सावधानी नपुगेर लाग्यो होला ।'

प्रकाशलाई ज्वरो थिएन । खोकी पनि थिएन । स्वाद र गन्ध पत्तो पाएनन् । शरीर थाम्न नसक्ने गरी गलेको थियो । शरीरसँगै उनी मानसिक रूपमा पनि कमजोर बनिरहेका थिए । छटपटीले निदाउन सकेका थिएनन् ।

प्रकाशले पहिलो चरणको कोरोना फिबरजस्तो मात्रै थियो, दोस्रो चरणकोले शरीर दुख्ने, छटपटी हुने गराउँछ भन्ने पढेका थिए । तर, उनले त पढेभन्दा केही फरक लक्षणहरू पनि महसुस गरे । डर, त्रास, भय । यो पनि कोरोनाको लक्षण हुने उनले बुझे ।

प्रकाश भन्छन्, 'म निकै डराएको थिएँ । अब बाँच्दिनँ होलाजस्तै लागेको थियो । कोरोना लागेपछि यस्तो अलौकिक अनुभूति गर्न पाएँ ।'

प्रकाशको जिब्रो स्वादविहीन बनेको थियो । तर, खानु त पर्‍यो । उनी आफैँलाई जबर्जस्ती गरेर खाना खुवाउँथे । 'स्वाद नै नपाएर खान त रुच्दैन नि', प्रकाश भन्छन्, 'तर, शरीरलाई खानेकुरा चाहिन्छ भन्ने सोचेर जबर्जस्ती पनि खान्थे । झोल पदार्थहरू खान्थे ।'

प्रकाशले कुनै औषधि भने प्रयोग गरेनन् । तातो पानी नै उनको औषधि बन्यो ।

आइसोलेट हुँदा प्रकाश व्यायाम गर्थे । जिममा गर्ने अभ्यासहरू उनले आफ्नै बन्द कोठामा गरे । त्योसँगै उनले योगा पनि गरे । प्रकाश भन्छन्, 'योगा त मैले जानेको थिइनँ । युट्युबमा भिडियोहरू हेर्दै त्यस्तै गर्ने प्रयास गरेँ ।'

प्रकाशले शरीरको दुखाइ भुलाउन हरप्रयास गरिरहन्थे । उनलाई साथ दियो, नेटफ्लिक्सले । नेटफ्लिक्समा कहिले उनले फिल्म हेर्थे, कहिले सिरिज हेर्थे । सिरिज हेर्दा उनी यसरी डुब्थे कि, शरीरको दुखाइ नै भुल्थे ।

'म किताब पढ्न रुचाउने मान्छे । तर, यस पटक मैले किताब पढ्न सकिनँ । शरीरलाई थेगेर, मनलाई स्थिर बनाएर किताब पढ्ने जोस मलाई आएन', प्रकाशले भने ।

प्रकाश सामाजिक सञ्जाल र मिडियाबाट भने टाढा रहे । त्रसित समाचारहरू उनले पढ्दै पढेनन् । बरु उनले नयाँ गीतमा दर्शकले गरेको कमेन्ट पढे । प्रकाश भन्छन्, 'ती सकरात्मक प्रतिक्रिया र प्रशंसा पनि मेरा लागि औषधि बने ।'

पोजिटिभ रिपोर्ट आएको पाँचै दिनमा भने प्रकाश केही तङ्ग्रिए । शरीर गल्न छोड्यो । ढाड पनि दुखेन । मानसिक रूपमा पनि उनले आफूलाई हल्का महसुस गरे ।

छैटौँ दिनमा उनले पुन: पीसीआर गराए । अन्तत: कोरोना रिपोर्ट नेगेटिभ आयो ।

सन्तानसँग दूरी कायम गर्दा…

प्रकाश सपुतकी एक छोरी छिन्, प्रविष्टी । प्रकाश छोरीलाई निकै प्रेम गर्छन् । फुर्सद हुँदाको हरेक समय छोरीसँगै बिताउँछन् । घरमा हुँदा छोरीलाई काखमा लिइरहन्छन् ।

तर, कोरोना पोजिटिभ भएपछि न उनले छोरीलाई काख राख्न पाए, न छोरीको गालामा गाला जोडेर बात मार्न नै । कोरोनाले भन्दा त उनलाई छोरीसँग कायम गर्दा गाह्रो भएको थियो ।

प्रकाश भन्छन्, 'एउटै घरमा भएर पनि छोरीलाई अँगाल्न सकेको थिइनँ । उसलाई काखमा लिन सकेको थिइनँ । त्यो बेला मलाई निकै पीडा भयो ।'

अहिले प्रकाशकी आमा कोरोना संक्रमित छिन् । उनी आफ्नै गाउँमा वडा कार्यलयले बनाइदिएको आइसोलेसन वार्डमा आइसोलेट भएकी छिन् ।

प्रकाशलाई लाग्यो- 'सायद आमाले हामीलाई खोजिरहनुभएको छ ।'

आफूसँगै संक्रमित भएका भाइ देवेन्द्र बल्लुसँगै प्रकाश मातातिर्थ औँसीको छेको पार्दै बगलुङ पुगेका छन् । प्रकाश भन्छन्, 'हामीले सामाजिक दूरी कायम गरेर आमाको मुख हेर्‍यौँ । छेउमा आएको छोरालाई छुन नपाउँदा आमाले नि त्यस्तै महसुस गर्नुभयो होला, जस्तो मैले प्रविष्टीलाई छुन नपाउँदा महसुस गरेको थिएँ ।'

बुधबार प्रकाशकी आमालाई पनि आइलोसेलनबाट घर जान अनुमति दिइएको छ । तर, संक्रमणमुक्त नभएकाले प्रकाश र उनको परिवार केही दिन बागलुङको आफ्नै घरमा आइसोलेट हुनेछन् ।

प्रकाशित मिति: बुधबार, वैशाख २९, २०७८ १८:२८