दिल्लीका कोरोना संक्रमित नेपाली भन्छन्– अस्पतालकाे बेहाल देख्दा मरिन्छ कि झैँ लाग्छ

दिल्लीका कोरोना संक्रमित नेपाली भन्छन्– अस्पतालकाे बेहाल देख्दा मरिन्छ कि झैँ लाग्छ

A+ A A-

भारतको राजधानी नयाँ दिल्लीमा ६ वर्षदेखि परिवारसँगै बसेर रोजगारी गर्दै आएका थिए, बाँकेका कवीन्द्र शाही । भयावह रूपमा फैलिएकाे कोरोना संक्रमणले उनलाई पनि छाेयाे । संक्रमित भएर बिरामी परे पनि अस्पतालमा बेड नपाएपछि उनी अहिले हाेम आइसाेलेसनमै छन् ।

कोरोना पोजिटिभ देखिएपछि चारवटा अस्पताल धाउँदा पनि बेड नपाएपछि कोठामै फर्किएर औषधि खाइरहेको शाहीे बताउँछन् ।

‘दिल्लीमा धेरै नेपालीहरू कोरोना संक्रमित छन् । उनीहरूलाई उपचार गर्न समस्या भइरहेको छ । नेपाली दूतावासमा सहयोगका लागि सम्पर्क गर्दा फोनसमेत उठाउँदैनन्,’ उनले गुनासाे गरे । भारत सरकारले विदेशी नागरिकका हकमा कोरोना परीक्षण र उपचारका लागि अनिवार्य आधार कार्ड खोज्ने गरेकाे छ । आधार कार्ड नभएका नेपालीले अस्पतालमा बेड पाउँदैनन् । दूतावासले सहयोग नगर्दा धेरै कोरोना संक्रमितले उपचार नपाएकाे शाही बताउँछन् ।

दिल्लीमा कोरोना संक्रमित नेपालीहरू उपचार नपाएर ज्यान गुमाइरहेका छन् । नेपाली दूतावासले कोरोना संक्रमितलाई उपचारका लागि सहयोग नगरेको उनको गुनासाे छ । श्रीमती र छोरासँगै दिल्लीमा बस्दै आएका उनी सेक्युरेटी गार्डको काम गर्छन् ।

यस्तै, कामका लागि माल्टा जान भारतको दिल्ली पुगेका मोरङका दिपराज चौधरी पनि कोरोना संक्रमित छन् । उनले पनि उपचार नपाएको गुनासो गरे ।

नेपालबाट आएपछि पहाडगञ्जको एउटा होटलमा बस्दा ज्वरोसँगै झाडापखाला लागेपछि उनले कोरोना परीक्षण गराएका थिए । परीक्षण गराउँदा कोरोना संक्रमण देखिएको चौधरीले बताए ।

‘हामी नेपालबाट गएका तीनै जनालाई कोरोना देखियो । दिल्लीको गान्धी हस्पिटलदेखि सामान्य क्लिनिकसम्म चहार्दा पनि उपचार पाइएन । अन्तिममा होटलमै आएर सिटामोल खाएर बसेका छौँ,’ उनले भने, ‘भारतको दिल्लीमा कोरोना भाइरसको नाम सुन्दा पनि सर्छजस्तो लाग्ने अवस्था छ । उपचार नपाएर सामान्य अस्पतालको अगाडि मानिस अक्सिजन लिएर पेटीमा पल्टेका देखिन्छन् । त्यो दृश्य देख्दा मरिन्छ कि जस्तो लाग्छ ।’

नेपालीहरू कोरोना संक्रमित भए पनि उपचार गर्न सक्ने अवस्था छैन । दिल्लीका ठूला र सामान्य अस्पतालअगाडि कोरोना संक्रमित ढलेका छन् ।

कोरोना महामारीमा दूतावासले नेपालीलाई उपचारका लागि सहयोग नगरेको र सहयोग माग्न जाँदा पनि सुनुवाइ नभएको उनको गुनासो छ ।

भारतमा दोस्रो लहरको कोरोना महामारी फैलिएसँगै डरलाग्दो र जोखिमपूर्ण अवस्था रहेको त्यहाँ रहेका नेपालीहरू बताउँछन् ।

दिल्लीमा सडकमै कोरोनाबाट मृत्यु भएका संक्रमितको शव भेटिन्छ । त्यो दृश्य देख्दा जीवनकै आशा मारेको दिल्लीमा रहेका मोरङका सागर थारू बताउँछन् ।

दिल्लीका एउटा अस्पतालबाट कोरोनाका कारण मृत्यु भएका व्याक्तिका शव घन्टामा १० वटासम्म हस्पिटलबाट बाहिर ल्याएको आफ्नै आँखाले देखेको उनी मनाेत्रासमा छन् । त्यसपछि डरले कोठामा फर्किएर औषधि खाँदै बसेको उनले बताए ।

दिल्लीमा कोरोना बिरामीको संख्या दैनिक बढ्दो छ । रोजगारी, अध्ययन र तेस्रो देश जान दिल्ली पुगेका नेपालीहरूले समेत कोरोना संक्रमित भएर बिरामी पर्दा अस्पतालको बेड नपाउने गरेको गुनासो थारूको छ ।

आफ्नाे देशका नागरिक कोरोनाको चपेटामा परेर उपचार नपाउँदा भारतमा रहेको दूतावासले बेवास्ता गरेको धेरैको गुनासो छ । दूतावास आफ्नो कर्तव्य र कार्यप्रति गैरजिम्मेवार देखिएको उनीहरूको आरोप छ ।

नयाँ दिल्लीस्थित नेपाली राजदूत नीलाम्बर आचार्यले भने भारतमा रहेका कोरोना संक्रमित नेपालीको उपचारमा समस्या भए सहयोग गर्दै आएको बताएका छन् । कोरोना संक्रमित नेपालीलाई उपचारका लागि सहयोग गरिरहेको र काेरोनाका कारण समस्यामा परेर घर फर्किन चाहने नेपालीलाई स्वदेश फर्काउने व्यवस्थासमेत गर्दै आएको उनको दाबी छ।

भारतमा फैलिएको दोस्रो लहरको कोरोना महामारीका कारण अहिलेसम्म ३० जना नेपालीले ज्यान गुमाइसकेका छन् भने ५ हजारभन्दा धेरै संक्रमित रहेको नेपालीहरूको हकहितका लागि काम गर्दै आएको मिसन नेपाली संघले बताएको छ । भारतमा कोरोनाका कारण अझ धेरै नेपाली संक्रमित भएको तर उनीहरू अस्पताल जान सक्ने अवस्था नभएको समेत संघले जनाएको छ ।

प्रकाशित मिति: मंगलबार, वैशाख २८, २०७८ १८:११