अन्तर्राष्ट्रिय उडान बन्द हुँदा स्वदेश फर्किने तयारीमा रहेका १० हजार कामदार विदेशमै रोकिए

अन्तर्राष्ट्रिय उडान बन्द हुँदा स्वदेश फर्किने तयारीमा रहेका १० हजार कामदार विदेशमै रोकिए

A+ A A-

वैदेशिक रोजगारीबाट फर्किने तयारीमा रहेका कामदार एक साता सम्बन्धित देशमै रोकिने भएका छन् । सरकारले वैशाख २३ देखि लागू हुने गरी अन्तर्राष्ट्रिय हवाई उडान बन्द गर्ने निर्णय गरेसँगै उनीहरू सम्बन्धित देशमै रोकिने भएका हुन् । बिहीबारदेखि वैदेशिक रोजगारीमा कामदार जान र फर्किन ठप्प भएको छ ।

कोरोना भाइरस नियन्त्रण गर्न अन्तर्राष्ट्रिय उडान बन्द गर्दा वैदेशिक रोजगारीबाट फर्किन टिकट लिएर बसेको १० हजारभन्दा धेरै नेपाली प्रभावित हुने श्रम, रोजगार तथा सामाजिक सुरक्षा मन्त्रालयले जनाएको छ । अन्तर्राष्ट्रिय उडान बन्द भएसँगै स्वदेश फर्कने तयारीमा रहेका कामदारले सम्बन्धित देशका कुटनीतिक नियोग गुहार्न थालेका छन् ।

वैदेशिक रोजगारीबाट सातामा १० हजार कामदार फर्किने गरेको वैदेशिक रोजगार विभागको तंथ्याक छ ।

उडान बन्द भएर स्वदेश फर्किन समस्या भए सम्बन्धित देशका दूतावासले सहजीकरण गर्ने श्रम, रोजगार तथा सामाजिक सुरक्षा मन्त्रालयका सह–सचिव तथा प्रवक्ता दिपक काफ्लेले जानकारी दिए । कोरोना महामारीमा स्वदेश फर्किदाँ कामदारलाईसमेत जोखिम हुने र एक साता अन्तर्राष्ट्रिय उडान बन्द हुँदा खासै समस्या नहुने उनले बताए ।

नेपाली कामदारको मुख्य रोजगार गन्तव्य देश मलेसिया, साउदी अरब, यूएई, कतार, ओमान, बहराइन, कुवेत र जोर्डनबाट घर विदामा, करार अवधि सकिएर र कोरोनाका कारण रोजगारी गुमाएका कामदार दैनिक ५ देखि ७ सय फर्किने गरेको विभागको तथ्यांक छ ।

त्रिभुवन अन्तर्राष्ट्रिय विमानस्थलबाट आन्तरिक तर्फ १० हेलिकोप्टरसहित २० तथा अन्तर्राष्ट्रियमा तीन नेपालीसहित २० हवाई सेवा प्रदायक कम्पनीले उडान भर्दै आएका छन् ।

सरकारले तत्काल कोरोना भाइरस नियन्त्रण गर्न वैशाख मसान्तसम्म अन्तरराष्ट्रिय उडान प्रतिबन्ध लगाएको हो । कोरोना भाइरसको महामारी फैलिए सरकारले अन्तरराष्ट्रिय उडानको प्रतिबन्ध लम्बिने संकेत गरेको छ ।

पछिल्लो समय नेपालमा कोरोना संक्रमितहरूको संख्या बढ्दै जाँदा अवस्था सामान्य हुन केही समय लाग्न देखिएको छ । जसका कारण अन्तर्राष्ट्रिय उडानको प्रतिबन्ध थपिने वैदेशिक रोजगारी व्यवसायीले बताएका छन् ।

गत वर्ष २०७६ चैत ९ देखि कोरोनाका कारण बन्द भएको नियमित अन्तर्राष्ट्रिय उडान २०७७ भदौ १७ देखि मात्र खुलेको थियो । सरकारले कोरोनाका कारण विदेशमा समस्यामा परेका कामदारलाई नियमित नभइ चार्टर्ड उडानबाट उद्धार गरी स्वदेश फर्काएको थियो ।

सरकारले राजधानीमा लगाएको निषेधाज्ञाको अवस्थामा वैदेशिक रोजगारीमा जान श्रम स्वीकृति जारी गरिने विभागले जनाएको छ । विभागले वैदेशिक रोजगारीमा जाने कामदारलाई अनलाइनबाटै पुनःश्रम स्वीकृति वितरण गरिरहेको जानकारी दिएको छ ।

कोरोनापछि लयमा फर्किदै गरेको वैदेशिक रोजगारी क्षेत्र फेरि दोस्रो लहरको कोरोनाले बन्द भएको छ । जसका कारण रोजगारदाता देशले दिएको डिमाण्डसमेत गुम्ने थालेको रोजगारव्यवसायीले चिन्ता गर्न थालेका छन् ।

कोरोना भाइरसका कारण रोजगारी व्यवसायी धरापमा पर्दा समेत सरकारले सहयोग नगरेको व्यवसायीको गुनासो छ । चालू आर्थिक वर्षको चैत मसान्तसम्म ६ खर्ब ४२ अर्ब रुपैयाँभन्दा बढी रेमिट्यान्स नेपाल भित्रिएको छ ।

प्रकाशित मिति: शुक्रबार, वैशाख २४, २०७८ ०८:२८