दिल्लीमा ३ हजार नेपाली संक्रमित, दूतावास भन्छ - ६० हजारलाई उद्धार गर्नुपर्छ

A+ A A-

भारतको राजधानी नयाँ दिल्लीमा तीन सातायता कोरोनाको संक्रमण तीव्र गतिमा फैलिइरहेको छ । दिल्ली मात्र होइन, अर्को ठूलो शहर मुम्बईसमेत काेभिड संक्रमणले आक्रान्त छ ।

महामारी फैलिएसँगै दिल्ली र मुम्बईमा रोजगारी, अध्ययन र अन्य पेसा गर्दै आएका नेपाली समुदाय समस्यामा परेका छन् । यी दुई शहरमा समस्या परेका ३० हजारभन्दा धेरै नेपालीलाई तत्काल उद्धार गर्नुपर्ने अवस्था रहेकाे नेपालीकाे हकहितका लागि काम गर्दै आएको संस्था मिसन नेपालले जनाएको छ ।

दिल्लीमा कोरोना लागेर ३ हजारभन्दा धेरै नेपाली उपचारत छन् भने २० जनाकाे ज्यान गइसकेकाे मिसनको तथ्यांक छ । मुम्बईमा समेत कोरोना लागेर २ हजारभन्दा धेरै नेपाली नागरिक अस्पताल भर्ना छन् ।

कोरोना कहरका कारण दिल्लीमा भयावह स्थिति छ । कोरोना संक्रमितले उपचारका लागि अस्पतालमा बेड पाउन मुस्किल छ । हाेम आइसोलेसनमा बसेर उपचार गर्नुपर्ने अवस्था आएकाे मिसन नेपालका अध्यक्ष केबी कार्कीले बताए । 'दिल्ली र मुम्बईमा नेपालीको अवस्था नाजुक र संकटपूर्ण छ,' उनले शिलापत्रसँग भने, 'नेपाल सरकारले तत्काल उद्धार नगरे धेरै बाटोमै ढल्ने अवस्था सिर्जना भएको छ ।'

दिल्लीका निजी तथा सरकारी अस्पतालमा संक्रमितको घुइँचो छ । अस्पताल बिरामीले भरिएपछि कतिपय संक्रमित अस्पतालअगाडि सडकमै लम्पसार र केहीको खुल्ला चौरमै उपचार भइइरहेको अध्यक्ष कार्कीले बताए । ‘खाद्यान्न संकट हुँदै गएपछि नेपालीले गहुँको पिठो पानीमा घोलेर खानुपर्ने अवस्था सिर्जना भएको छ । दिल्लीमा रहेका कतिपय नेपाली चिउरा खाएर बसेका छन्,’ उनले भने, ‘विद्यार्थी, श्रमिक र अन्य दिल्लीमा उपचारका लागि आएका नेपाली बेखर्ची भएर बसेका छन् । उनीहरूलाई सरकारले तत्काल उद्धार नगरेर ठूलो संकट सिर्जना हुन्छ ।’

सुत्केरी, गर्भवती, बालबालिका र नेपालमा आफन्तको निधन भएर आउनुपर्नेहरू भारतमै अड्किएर बसेका छन् । उनीहरू समेत कोरोनाकाे उच्च जोखिममा छन् ।

उपचारको अभावमा सडकमा छटपटाएका बिरामीलाई उठाउन आफन्त, उपचार गर्न डाक्टर र कुरुवासमेत पाइँदैन । यदि दिल्लीमा कोरोना लागेको बिरामीले पानीसमेत खान नपाउने अवस्था भइरहेको उनले बताए । भारतमा नेपालीहरू होटलमा कुक, कम्पनी वर्कर, गाडीचालक, सेक्युरिटी गार्डदेखि घरेलु कामदारका रूपमा समेत कार्यरत छन् ।

६० हजार तत्काल उद्धार गर्नुपर्छ : दूतावास

कोरोना भाइरसका कारण लकडाउन हुँदा भारतको मुख्य शहर दिल्ली र मुम्बईमा ३० हजारभन्दा धेरै नेपाली अलपत्र अवस्थामा रहेको नयाँ दिल्लीस्थित नेपाली दूतावाससमेत जानकार छ । तर, उनीहरूकाे उद्धार कसरी गर्ने भन्ने कुनै याेजना छैन ।

भारतको मुख्य शहर दिल्ली, मुम्बई, गुजरात, महाराष्ट्र, पन्जाब, चेन्नई र राजस्थानमा ६० हजारभन्दा धेरै नेपाली कोरोनाका कारण अलपत्र परेको र उनीहरूलाई तत्काल फकाउनुपर्ने दूतावासले जनाएको छ ।

दूतावासले सञ्चालन गरेको हटलाइन फोनमा आएको गुनासाका आधारमा तत्काल ६० हजार नेपाली उद्धार गरेर स्वदेश फर्कनुपर्ने अवस्थामा रहेको दूतावासका उपनियोग प्रमुख भरतराज रेग्मीले बताए ।

कोरोनाका कारण धेरै नेपाली भारतको विभिन्न स्थानमा अड्किएका छन् । उनीहरूलाई तत्काल स्वदेश फर्काउने विषयमा दूतावासले सरकारसँग छलफल गरिरहेकाे रेग्मीले बताए ।

‘कोरोनाका कारण समस्या झन् जटिल बन्दै गएको छ । भारतमा रहेका नेपालीको उद्धार गर्ने विषयमा दूतावासले भारतको सम्बन्धित निकाय र नेपाल सरकारसँग छलफल गरिरहेको छ,’ उनले भने, ‘स्वास्थ्य मापदण्ड अपनाएर उद्धार गर्नुपर्छ । नेपालीहरू भारतका विभिन्न शहरमा छरिएर बसेका कारणले तत्कालै उद्धार गर्न पनि समस्या छ ।’

दिल्ली र मुम्बईमा जनसंख्या धेरै र बाक्लो बस्ती भएका कारण यी शहरमा कोरोना संक्रमितको संख्या अधिक छ । कोरोनाका कारण दिल्ली छोडेर भाग्नेको संख्या पनि बढ्दो छ । कतिपय भारतीय दिल्ली छाडेर गाउँ पसेकाले गाउँमा पनि कोरोना भाइरसको संक्रमण फैलिएको छ ।

दिल्लीका २ सयभन्दा धेरै ठूला अस्पतालले पछिल्लो समय कोरोना संक्रमण नियन्त्रण गर्न नसकिने भन्दै स्वास्थ्य संकटकाल घोषणा गर्न सरकारसँग अपिल गरेका छन् । दिल्लीनजिकैका अन्य शहरमा पनि कोरोनाको संक्रमण फैलिएको छ ।

भारतमा पछिल्ला दिनमा कोरोना संक्रमण तथा मृत्युदर बढ्दै गएको छ । भारतमा फैलिएको कोरोना भाइरसको प्रभाव सार्क राष्ट्रका अन्य देशमा पनि पर्न थालेको छ ।

प्रकाशित मिति: मंगलबार, वैशाख २१, २०७८ २१:५५