कोरोना संक्रमणका कारण एक सातामा २३ नेपालीको विदेशमा मृत्यु

A+ A A-

गत साता भारतमा २० जना नेपालीको कोरोना भाइरसका कारण मृत्यु भएको छ । त्यस्तै, कतारमा दुई तथा कुवेतमा एक जना नेपालीले कोरोनाका कारण गत साता ज्यान गुमाए ।

गैरआवासीय नेपाली संघले यस्तो जानकारी दिएको हो । संघको स्वास्थ्य समितिका संयोजक डा. सञ्जीव सापकोटाका अनुसार गत साता भारतमा २०, कुवेतमा दुई र कतारमा एक नेपालीको कोरोनाका कारण निधन भएको हो ।

भारतको नयाँ दिल्लीमा कार्यरत स्वास्थ्य समितिका सदस्य तथा अल इन्डिया इन्स्टिच्युट अफ मेडिकल साइन्समा कार्यरत डा. सागर पौडेलका अनुसार नयाँ दिल्लीमा १० र भारतका अन्य क्षेत्रमा थप १० गरी कूल २० नेपालीको निधन भएको हो ।

निधन हुनेमा अधिकांश ५० वर्षभन्दा मुनिका छन् । यससँगै हालसम्म विश्वका २१ मुलुकमा संक्रमणका कारण ३७२ नेपालीको निधन भएको छ । हालसम्म मृत्यु भएकामध्ये २४५ जना मध्यपूर्वका छन् ।

अहिलेसम्म विश्वका ५४ मुलुकमा कोभिड १९ का कारण संक्रमित हुने नेपाली ६८ हजार ५०६ जना पुगेका छन् । कुल संक्रमितमध्ये ९४ दशमलव ६ प्रतिशत अर्थात् ६४ हजार ७४४ संक्रमणमुक्त भएका छन् ।

गत साता भारत, कुवेत, कतार, यूएई, रोमानिया, रुस, फिनल्याण्ड, डेनमार्क, चेक रिपब्लिक र पोल्याण्डमा रहेका नेपालीमा थप कोरोना भाइरसको संक्रमण देखिएको कोभिड १९ उच्चस्तरीय समिति गैरआवासीय नेपाली संघका प्रेस संयोजक चिरन शर्माले जानकारी दिए ।

यसैबीच, नेपालमा हालसम्म २ लाख ९७ हजार ८७ संक्रमित पुगेकोमा ९३ दशमलव ३ प्रतिशत अर्थात् २ लाख ७७ हजार १२३ संक्रमणमुक्त भएका छन् । संक्रमणका कारण शनिबार साँझसम्म ३ हजार १३६ जनाको निधन भएको छ ।

प्रकाशित मिति: सोमबार, वैशाख २०, २०७८ १३:४४