नेपालमा कार्यरत विदेशी कामदारको अनुभव- कोरोना कहरमा नेपाल नै बढी सुरक्षित

A+ A A-

पाँच वर्षदेखि नेपालमा ग्रिलको काम गर्दै आएका भारत केरला दुधानगरका जीवन्तराज राजा कोरोना महामारीमा सुरक्षित रहेको बताउँछन् । महामारीमा भारतभन्दा नेपाल सुरक्षित रहेको उनको भनाइ छ ।

‘कोरोना महामारीमा गत वर्ष पनि नेपाल छाडिनँ । लकडाउन हुँदा काभ्रेमा एक महिना बसेँ । त्यहाँका मानिसले आफ्नो परिवारजस्तो गरेर राखे,’ उनले भने, ‘नेपालीहरूले विदेशी नागरिक अथवा कामदार भनेर भेदभाव पनि गर्दैनन् । नेपालमा बस्न र काम गर्न भारतमा भन्दा सहज छ । हामीले यहाँ धेरै सूरक्षित अनुभव गरेका छौँ ।’

आफूले भारतबाट ल्याएका अन्य कामदारहरूले सुरक्षित रूपमा उपत्यकाका विभिन्न स्थानमा काम गरिरहेको उनको भनाइ छ । राजासँग केरलाका ४० जनाभन्दा धेरै श्रमिक कार्यरत छन् ।

यस्तै, चिनियाँ नागरिक तुइपी चुई पनि कोरोना महामारीमा नेपालमा सुरक्षित रहेको बताउँछिन् । चीनको हुवाइ मोवाइल कम्पनीमा कार्यरत चुई कोरोना भाइसको महामारीमा पनि स्वदेश नफर्किएको बताउँछिन् ।

‘कोरोना भाइरसको संक्रमणको त्रास चीनभन्दा नेपालमा कम छ जस्तो लाग्छ । त्यही भएर पनि नेपालमै बसेको हुँ । मलाई नेपालमै बस्न रमाइलो र आफ्नो देशभन्दा पनि सुरक्षित अनुभव हुन्छ,’ उनले भनिन्, ‘कोरोना भाइरसले यो देश वा त्यो देश भन्दैन । त्यही भएर जहाँ बसे पनि आफू सजग र सुरक्षा अपाउनुपर्छ । म नेपालमै सुरक्षित छु । कोठामै क्वारेन्टाइनमा बसेर काम गरिरहेको छु ।’

नेपालीहरूमा सद्भावको भाव भएकाले आफ्नो देशजति नै प्यारो लाग्ने उनको भनाइ छ । सात वर्षदेखि नेपालमा कार्यरत उनी अझै तीन वर्ष बस्ने सोचमा छिन् ।

६ वर्षदेखि जापानिज भाषा पढाउँदै आएका सिउत्ये सिचु पनि कोरोना महामारीमा आफू नेपालमा सुरक्षित रहेको बताउँछन् । ‘अहिले म कोठामा क्वारेन्टाइनमा बसिरहेको छु । केही अप्ठयारो छैन । घरमा बसेजस्तो भएको छ । नियमित स्वास्थ्य परीक्षण गराइरहेको छु,’ उनले भने, ‘नेपालीहरूले समस्या पर्दा विदेशी नागरिक नै नभनी आफ्नै परिवारको सदस्य जस्तो व्यवहार गर्छन् । त्यसैले पनि विदेशी नागरिकले नेपालमा आफूलाई सुरक्षित महसुस गर्छन् । गत वर्षको कोरोनामा नेपालमा सेफ भएँ ।’

कोरोना भाइरसको महामारीमा पनि रोजगारीका लागि नेपाल आउने विदेशी कामदार र श्रम स्वीकृति नवीकरण गरेर नेपालमै बस्ने विदेशी श्रमिकको संख्यामा गिरावट आएन ।

८९ देशका कामदार नेपालमा

श्रम तथा व्यवसायजन्य विभागका अनुसार सार्क राष्ट्रबाहेकका देशबाट वार्षिक २ हजारभन्दा बढी कामदार नेपाल आउने गरेका छन् । नेपालमा रोजगारीका लागि ८९ देशका नागरिक कार्यरत छन् । नेपालमा साइकल बनाउनदेखि इन्जिनियरसम्ममा विदेशी नागरिक कार्यरत रहेको विभागले जनाएको छ ।

नेपालका विकास आयोजनामा इन्जिनियर, विमान कम्पनीमा पाइलट तथा विभिन्न विशेष प्राविधिक दक्षता हासिल गरेका विदेशी कामदार कार्यरत रहेको विभागले जनाएको छ ।

नेपालमा भारत, बंगलादेश, श्रीलंका, दक्षिण कोरिया र चीनबाट रोजगारका लागि धेरै कामदार आउने गरेका छन् । श्रम विभागका अनुसार अस्ट्रेलिया, फ्रान्स, जर्मनी, इटाली, जापान, कोरिया, फिलिपिन्स, अमेरिकालगायतका देशबाट कामदार भिसामा नेपाल आउनेहरू धेरै छन् ।

कोरोना महारमारीमा समेत नेपालमा श्रम स्वीकृति लिएर काम गर्न आउने विदेशी कामदारको संख्या गिरारवट नआएको र नेपालमा कार्यरत विदेशी कामदार समस्या नपरेको विभागका प्रवक्ता मणिनाथ गोपले जानकारी दिए ।

रोजगारीका विभिन्न देशमा पुगेका नेपाली श्रमिक भने विदेशी भूमिमा अलपत्र अवस्थामा छन् । तर, नेपालमा रोजगारीका लागि आएका विदेशी श्रमिक भने समस्यामा नपरेको विभागले जानकारी दिएको छ । नेपालमा कति विदेशी श्रमिक छन् भन्ने यकिन तथ्यांक नभएको विभागले जनाएको छ ।

प्रकाशित मिति: सोमबार, वैशाख २०, २०७८ १०:४८