म्यानमारमा बढ्दै सेनाको अत्याचार, सम्पत्तिपछि अब छोरीचेली जोगाउने चिन्ता

A+ A A-

म्यानमारको मिचिना शहरमा व्यापार गर्दै आएका भारतीय मूलका दुई परिवार गत साता भागेर भारत पसे । उनीहरू कोरोना भाइरसको त्रासका कारण म्यानमार छाडेका होइनन् ।

ती भारतीय मूलका व्यापारी तीन छोरीमाथि हुन सक्ने यौन हिंसाबाट जोगिनका लागि म्यानमार छाड्न बाध्य भएको मिचिना शहरमा उनीहरूसँगै फलफूलको व्यापार गर्दै आएका एक नेपालीभाषीले जानकारी दिए ।

उनीहरू भारतस्थित आसाममा रहेका आफन्तको सहयोगमा भागेको ती नेपालीभाषीले बताए । ‘उनीहरूको घरआसपास दिनहुँ गस्तीमा खटिएका सेना घुम्न थाले । त्यसपछि ती व्यापारी मंगलबार राति नै भागे,’ उनले भने, ‘म्यानमारका सेनाले सम्पत्तिभन्दा हुर्किएकी छोरीमाथि कुदृष्टि लगाउन थालेपछि उनीहरू भागेका हुन् । म्यानमारका सेनाले कति बेला घरभित्र पसेर आन्दोलनकारी भन्दै छोरी समाउने हुन्, थाहा हुँदैन ।’

गत साता म्यानमारको सेनाले राति गस्ती गर्ने क्रममा मिचिना शहरनजिकैको एउटा बस्तीमा पसेर महिला र युवतीलाई आन्दोलनकारी भन्दै घरभित्रै बलात्कार गर्ने प्रयास गरेको थियो । त्यसपछि घरमा चारवटासम्म ताला लगाएर सर्वसाधारणले आफ्ना छोरी–चेली जोगाउन थालेको उनको भनाइ छ । म्यानमारका सेनाले बलात्कारसँगै सम्पत्ति लुट्दा प्रतिकार गर्न खोज्नेलाई गोली हानेर मार्ने गरेको उनको भनाइ छ ।

यस्तै, दुई साताअघि म्यानमारको सान शहरनजिकै तरकारी व्यापार गर्ने बस्तीमा मध्य राति सेना पसेर लुटपाटसँगै युवती र महिलामाथि हातपात गरेको थियो । यो बस्तीमा छापा मार्ने नाममा सेनाले सुन र पैसा लुटेपछि धेरै मानिस भागेर गाउँ पसेको त्यहाँ बसोबास गरेका नेपाली भाषी बताउँछन् ।

सेनाले बिजुलीको लाइन काटेर बस्तीभित्र पसेर युवती र महिलालाई जबर्जस्ती कानमा लगाएको सुन खोल्न लगाएको थियो । कतिपय ओछ्यानमा सुतिरहेका महिला र युवतीहरूलाई हातपात गरे पनि उनीहरू सेनाले गोली हान्ने डरले चुपचाप बस्न बाध्य भएको ती नेपालीभाषीले बताए ।

‘सेनाले पैसा मात्र होइन, आन्दोलनकारी भन्दै परिवारकै अगाडि छोरी–चेलीलाई बलात्कार गर्न खोज्छन् । सेना गस्तीमा आएपछि छोरी–चेलीहरू घरभित्र ठूलो चाबी लगाएर बस्न थालेका छन्,’ उनले भने, ‘कति बेला म्यानमारको सेना घरभित्र पसेर छोरी–चेली बलात्कार गर्ने हो, थाहा छैन ।’

म्यानमारमा के भइरहेको छ कसैलाई थाहा छैन । यहाँ सेनाले जे गरे पनि कोही बोल्न नसक्ने उनको भनाइ छ ।

सोमबार म्यानमारको मोगोक शहरमा एक सुन व्यापारीलाई सेनाले जबर्जस्ती पसल खोल्न लगाएर सुन लुटे । सुन व्यापारी पिउयू चिले सेनाले २० तोलाभन्दा धेरै सुन लुटेर लगेको बताए । ‘बिहान पसलअगाडि उभिएको थिएँ । सेनाले आन्दोलनका लागि आएको हो भनेर सोधे, होइन सुन पसल सफा गर्न आएको भन्नेबित्तिकै पसल खोल्न लगाएर सुन लागे,’ उनले भने, ‘सेनाले शहरमा गरिरहेको लुटपाटको उजुरी गर्ने अवस्था छैन । केही भन्यो सिधै तातो गोली खाइन्छ । त्यही भएर लुटियो भनेर बोल्न पाइँदैन ।’

म्यानमारमा सेनाले लुट्छन् । लुटेमात्र त हुन्थ्यो कति बेला गोली हान्ने हुन् थाहा नहुने उनको भनाइ छ । शिलापत्रले म्यानमारमा बसोबास गर्दै आएका एक नेपालीभाषीको सहयोगमा उनीसँग कुराकानी गरेको हो ।

म्यानमारमा निर्दोष नागरिकमाथि सेनाले बर्बर दमन गरिरहेको छ । दुई महिनादेखि उनीहरू कति बेला सेनाले गोली हानेर मार्छ भने डरमा बाँचिरहेका छन् । म्यानमारभित्र सेनाले गरेको वास्तविक अत्याचार र दमन बाहिर आउँदैन ।

सैन्य शासनको अत्याचारले सीमा नाघे पनि बर्मेलीहरू विरोध गर्न सक्ने अवस्थामा छैनन् । सेनाले जे गरे पनि चुपचास सहेर बस्नुको विकल्प नभएको उनीहरू बताउँछन् ।

म्यानमारको सेनाले गत फेब्रुअरीमा सत्ता कब्जा गरेको थियो । त्यसयता म्यानमारमा प्रदर्शन भइरहेको छ । शान्तिपूर्ण आन्दोलनमा अन्धाधुन्ध गोली हान्दा बालबालिकासमेत मारिएका छन् ।

सैन्य ‘कु’को विरोधमा दुई सातायता खासै बर्मेली नागरिक आन्दोलनमा उत्रिएका छैनन् । गत साता एकैदिन एक सयभन्दा बढी प्रदर्शनकारीलाई सुरक्षा फौजले गोली हानेर मारेको अन्तर्राष्ट्रिय सञ्चारमाध्यमले बताएका छन् ।

यो रिपोर्ट म्यानमारमा बसोबास गर्ने नेपालीभाषीको सहयोगमा तयार पारिएको हो ।

प्रकाशित मिति: शुक्रबार, वैशाख १७, २०७८ ०७:११