दिल्लीमा कोरोना संक्रमण भयावह : सडकमै ढल्छन् संक्रमित, न उपचार न उठाउने आफन्त

दिल्लीमा कोरोना संक्रमण भयावह : सडकमै ढल्छन् संक्रमित, न उपचार न उठाउने आफन्त

A+ A A-

भारतको राजधानी दिल्लीमा दुई सातायता कोरोनाको संक्रमण तीव्र रूपमा फैलिरहेको छ । दिल्लीका निजी तथा सरकारी अस्पतालमा संक्रमितको घुइँचो छ । अस्पताल भरिएपछि कतिपय संक्रमित अस्पतालअगाडि सडकमै लम्पसार परेका छन् । उपचारको अभावमा सडकमा छटपटएका बिरामीलाई उठाउन आफन्त, उपचार गर्न डाक्टर र कुरुवा नहुने गरेको त्यहाँ रहेका नेपालीहरू बताउँछन् ।

यो भन्दा नाजुक अवस्था हुने ठाँउ नभएको दिल्लीमा रहेका मिसन नेपालका अध्यक्ष केबी कार्कीले बताए । दिल्लीमा कोरोनाको संक्रमणको अवस्था कस्तो छ भनेर सामाजिक सञ्जालमा सार्वजनिक भएका तस्वीरले प्रष्ट पार्ने उनले बताए ।

‘कोरोना संक्रमितका आफन्तसमेत बिरामीलाई स्याहार गर्न आउँदैनन् । कोरोना लागेको व्यक्ति भाग्यले मात्र बाँचिरहेका छन्,’ कार्कीले भने, ‘कोरोना भाइरसका कारण दिल्लीमा मानिस बाहिर निस्किदैनन् । घरभित्र बसेका धेरैमा कोरोना संक्रमण छ । यहाँका मुख्य शहरमा कोरोना अझै फैलन सक्छ ।’

भारतमा एकै दिन थपिए ३ लाख २३ हजार कोरोना सङ्क्रमित, २७७१ को मृत्यु

कोरोनाका कारण दिल्ली छोडेर भाग्नेको सङ्ख्या पनि बढेको कार्कीले बताए । कतिपय भारतीय दिल्ली छाडेर गाउँ पसेकाले गाउँमा पनि कोरोना भाइरस फैलने जोखिम बढेको उनले बताए । दिल्लीका २ सयभन्दा धेरै ठूला अस्पतालले पछिल्लो समय कोरोना संक्रमण नियन्त्रण गर्न नसकिने भन्दै स्वास्थ्य संकटकाल घोषणा गर्न सरकारसँग अपिल गरेका छन् । दिल्ली नजिकैका अन्य शहरमा पनि कोरोनाको संक्रमण फैलिएको छ ।

भारतको दिल्लीमा रहेका नेपाली नेपाल फर्किन बाटो कुरेर बसेका छन् । लकडाउन खुकुलो भए धेरै नेपाली स्वदेश फर्किने तयारीमा छन् । भारतमा पछिल्ला दिनमा कोरोना संक्रमण तथा मृत्यु दर बढ्दै गएको छ । भारतमा फैलिएको कोरोना भाइरसको प्रभाव सार्क राष्ट्रका अन्य देशमा पनि पर्न थालेको छ ।