भारतीय कामदारको क्वारेन्टाइन बन्दै नेपाल, नेपाल भित्रिएकामध्ये १५ प्रतिशतमा कोरोना पोजिटिभ

भारतीय कामदारको क्वारेन्टाइन बन्दै नेपाल, नेपाल भित्रिएकामध्ये १५ प्रतिशतमा कोरोना पोजिटिभ

A+ A A-

खाडीका देश जानका लागि दैनिक ३ सयभन्दा बढी भारतीय नागरिक त्रिभुवन अन्तर्राष्ट्रिय विमानस्थल हुँदै नेपाल प्रवेश गरिरहेका छन् । त्यस्तै स्थल मार्गबाट दैनिक १ हजारभन्दा धेरै भारतीय नेपाल अइरहेको अध्यागमन विभागले जनाएको छ ।

साउदी अरबलगायतका देश जान नेपाल आएका १७ हजारभन्दा धेरै भारतीय काठमाडौंका विभिन्न होटलमा क्वारेन्टाइनमा बसिरहेको होटल व्यवसायीहरू बताउँछन् । खाडीका देशले भारतीय कामदारलाई १५ दिन तेस्रो देशमा क्वारेन्टाइनमा बसेपछि मात्र प्रवेश दिने नियम लागू गरेका छन् ।

गाम्का नेपालका अनुसार क्वारेन्टाइनमा बसेका १७ हजार भारतीयमध्ये २ हजारमा कोरोना पोजिटिभ देखिएको छ । पछिल्लो समय नेपाल प्रवेश गरेकामध्ये १५ प्रतिशत भारतीयमा कोरोना पोजिटिभ देखिएको गाम्का नेपालले जनाएको छ । गाम्का नेपाल खाडीका देश जाने कामदारको स्वास्थ्य परीक्षण गर्दै आएको संस्था हो । यस बारेमा स्वास्थ्य मन्त्रालयलाई पटक–पटक जानकारी गराए पनि चासो नदिइएको सो संस्थाका एक कर्मचारीले बताए ।

उडानमार्फत आएका धेरैमा कोरोना पोजिटिभ देखिएको ती कर्मचारीको भनाइ छ । भारतीय नागरिक खुला रूपमा काठमाडौंमा किनमेलका लागि घुमिरहेका छन् ।

सरकारले सामाजिक दुरी, मास्क, सेनिटाइजर र फेससिल्ड लगाउनुपर्ने निर्देशन दिएको भए पनि त्यसको कार्यान्वयन भइरहेको छैन ।

गौशला, सिनामंगल र ठमेलका होटलमा भारतीयहरू आउन थालेपछि व्यवसायी त्रसित बनेको र्‍याफ्टिङ व्यवसायी संघका पूर्वमहासचिव समेत रहेका होटल व्यवसायी शिव अधिकारीले बताए । ठमेल, न्यूरोड, गौशला र बाघबजारका होटल भारतीय नागरिकले भरिएका छन् । सरकारले तत्काल भारतीय नागरिकलाई नेपाल प्रवेशमा रोक लगाउनुपर्ने अधिकारीले बताए ।

खाडीका देश जान आएका भारतीय कामदारसँगै कोरोना भाइरस फैलने त्रासमा रहेको अधिकारीले बताए ।

नेपाल प्रवेश गरिरहेका भारतीय कामदारलाई रोक्न सम्बन्धित पक्षसँग छलफल भइरहेको गृह मन्त्रालयका सह–प्रवक्ता जनकराज दाहालले बताए । नेपालमा कोरोना जोखिम र संक्रमण फैलिरहेका बेला नेपाल हुँदै खाडीका देश जाने भारतीय कामदार रोक्ने तयारी भइरहेको उनको भनाइ छ ।

कोरोनाको त्रास फैलिएसँगै विमानस्थल र सीमानाका मुख्य भन्सार नाकामा परीक्षण गर्न हेल्थ डेस्क सञ्चालनमा ल्याइएको थियो । तर, पछिल्लो समय ती नाम मात्रका छन् ।

भारतमा दैनिक २ लाखभन्दा धेरैमा कोरोना संक्रमण देखिएका छन् । कोरोना भाइरसको त्रास बढेसँगै धेरै देशले विदेशी नागरिकको आवतजावतमा कडाइ गरेका छन् । सङ्क्रमण नियन्त्रणका लागि धेरै देशले नागारिकलाई अन्य देश जान दिएका छैनन् ।

प्रकाशित मिति: शुक्रबार, वैशाख १०, २०७८ १४:१४