बलिउड छिर्ने दाैडधुपमा निर्माता सन्ताेष सेन, भारतका हजार हलमा देखाइँदै 'प्रेमगीत ३'

बलिउड छिर्ने दाैडधुपमा निर्माता सन्ताेष सेन, भारतका हजार हलमा देखाइँदै 'प्रेमगीत ३'

A+ A A-

निर्धारित मितिलाई हेर्ने हो भने २८ चैत २०७६ मा नै 'प्रेमगीत ३' फिल्म रिलिज हुनुपर्ने हो । तर, सोचेजस्तो सधैँ कहाँ हुन्छ र !

कोरोना महामारी सुरु भएसँगै फिल्मको रिलिज रोकियो । एक वर्ष पार गरिसक्दा पनि फिल्मकाे रिलिज डेटबारे अन्याेल कायमै छ ।

यसबीचमा फिल्मका निर्माता तथा निर्देशक सन्तोष सेनमा आफ्नो फिल्मलाई नेपालका सय हलमा मात्र सीमित नराख्ने सोच पलायो । उनलाई लाग्यो, 'मेरो फिल्मलाई भारतमा पनि रिलिज गर्छु ।'

सेनले फिल्मको 'सो रिल' तयार गरे, जसमा शिशिर वाङ्देलले आवाज दिए । त्यही बोकेर आफ्नै फिल्मका हिरो प्रदीप खड्कासँग उनी मुम्बईतिर लागे ।

सन्तोष भन्छन्, 'भारतमा अन्य भाषाका फिल्महरू पनि हिन्दीमा डब भएर करोडौं कमाइरहेका छन् । हामीले सय करोड नकमाए पनि ५-७ करोड कमाउन सकिएला नि भन्ने लागेर भारतीय बजारमा फिल्म रिलिज गर्न लागेको हुँ ।'

तर, मुम्बईमा फिल्म रिलिज गर्न सजिलो पक्कै थिएन । उनले धेरैवटा वितरण कम्पनीहरूलाई 'शो रिल' देखाए । उनीहरूले वितरण गर्ने आश्वासन त दिए, मिनिमम ग्यारेन्टी दिन सकेनन् । त्यहाँको प्रोडक्सनको सम्पूर्ण खर्च आफैँले गर्नुपर्नेभयो, जुन कुरा सन्तोषका लागि पटक्कै चित्तबुझ्दाे थिएन ।

अन्तत: लामो संघर्षपछि सन्तोषले एउटा वितरण कम्पनी भेटे, जसले उनलाई ४ करोड एमजी दिन तयार देखियो । सन्तोष भन्छन्, 'पूर्ण फिल्म तयार गरेर दिँदा उहाँले ४ करोड एमजी दिने भएपछि हामीले काम सुरु गर्‍यौं ।'

सन्तोषले फिल्मको डबिङ सकाइसके । हलिउड, बलिउडदेखि साउथसम्मका धेरै हिट फिल्ममा डबिङ गरेका आर्टिस्टलाई लिएर उनले फिल्मको डबिङ गरेका छन् । डबिङ आर्टिस्टले फिल्मको तारिफ गरेको सुन्दा दंग छन्, उनी ।

'डबिङ गर्दा उहाँहरूले निकै राम्रो प्रतिक्रिया दिनुभएको छ । फिल्मको कथा, कस्ट्युम, लोकेसनदेखि धेरै कुरा उहाँहरूले मन पराउनुभएको छ', उनी भन्छन्, 'धेरै भाषाको फिल्ममा डब गरिसकेका कलाकारले दिनुभएको यस्तो प्रतिक्रियाबाट म उत्साहित छु ।'

सेन हिन्दी डब भएपछि फिल्म नै अर्को स्तरमा पुगेको दाबी गर्छन्, 'हिन्दीमा डब भएपछि त फिल्म नै अर्कैजस्तो भएको छ ।'

अहिले फिल्मको साउण्ड तथा ब्याकग्राउण्ड स्कोरको काम भइरहेको छ । अक्षय कुमारको 'सूर्यवंशी', सलमान खानको 'राधे' जस्ता प्रतिक्षित बलिउड फिल्ममा काम गरेका प्राविधिकले सन्तोषको फिल्ममा काम गरिरहेका छन् । हिन्दी भाषाका लागि फिल्मको ट्रेलर 'सूर्यवंशी' फिल्म सम्पादन गरिरहेका सम्पादकले काटिरहेका छन् ।

प्रविधिकहरूबाट पनि फिल्मबारे उत्साहजनक प्रतिक्रिया पाइरहेकाे सन्ताेषले बताए । उनले भारतमा रिलिज गर्ने होडमा ३ गुणा बढी लगानी गरिसके । तर, कामाइनेमा भने उनी त्यति विघ्न विश्वस्त छैनन् ।

सन्तोष भन्छन्, 'भारतबाट त वितरकले दिएको एमजी उठाइदियो भने हुन्छ । अहिले नै ठूलो आशा केही छैन । तर, पछिल्ला फिल्महरूलाई यहाँ सहज रिलिज गर्ने बाटो बन्यो भने त्यसैलाई सफलता मान्नेछु ।'

फिल्म नै राम्रो बनेको खण्डमा राम्रो कमाइ गर्न सकिने विश्वास उनमा छ । वितरकले यस फिल्म भारतको ५ सयदेखि १ हजार हलमा रिलिज गर्ने निर्माता सेनलाई आश्वासन दिइरहेको छ । 'प्रेमगीत ३' भारतमा भने फरक नाममा रिलिज हुनेछ ।

'यहाँ त फिल्मको नाम चेन्ज हुन्छ । तर, नाम के राख्ने भन्ने तय भएको छैन । फिल्मको काम सकिएपछि यहाँको कम्पनीले पत्रकार सम्मेलन गरेर नै घोषणा गर्ने बताएको छ', सन्तोषले सुनाए ।

०००

सन्तोष मुम्बईमा फिल्म रिलिजका लागि एक्लै संघर्ष गरिरहेका छन् । नेपाल वा फिल्‍म क्षेत्रबाट कुनै सहयोग नरहेकाे उनले बताए । 'मैले अपेक्षा पनि गरेकाे छैन', उनले भने, 'म नेपालमा हुँदा पनि खुलेर सहयोग माग्ने मान्छे होइन । अहिले पनि मैले कसैसँग सहयोग मागेको छैन । तर, पछिल्लो समय शुभकामना दिनेहरू धेरै हुनुहुन्छ । यसैलाई सहयोगको रूपमा हेरेको छु ।'

सन्तोषको फिल्म 'प्रेमगीत ३' त भारतमा रिलिज हुन लगभग तयार छ । तर, उनको सपना आफ्नो फिल्म रिलिज गर्ने मात्र होइन, उनी त चाहन्छन्– भारतका वितरकले नेपाली फिल्म खोजी-खोजी रिलिज गरून् ।

प्रकाशित मिति: शनिबार, वैशाख ४, २०७८ ०६:४७