खुल्ला छन् हल, खाली छन् सिट

A+ A A-

काेराेना महामारीका कारण गत वर्ष फागुनको अन्तिमदेखि नेपाली चलचित्र हलहरू करिब नौ महिनासम्म ठप्प बने ।

अवस्था सामान्य बन्दै जाँदासमेत हल खुलाउन सरकारले चासो नदेखाएन । अन्तत: हलवालाहरूको छाता संगठन चलचित्र संघले आफैँ १० पुसदेखि हलहरू पुनः सञ्चालन गर्ने घोषणा गर्‍यो । अनि महिनाैँ घरभित्र थुनिएका दर्शकका लागि सिनेमाघरकाे ढाेका खुल्याे ।

चलचित्र 'आमा' र 'सेन्टिभाइरस' लाई रि-रिलिज गरेर हल पुन: सञ्चालन गरिएको थियो । यी लकडाउनपूर्व प्रदर्शनरत चलचित्र थिए । हल पुन: सञ्चालन हुँदा नयाँ चलचित्र नपाएपछि यिनै चलचित्र रिलिज गर्न बाध्य बने हलवाला ।

तर, रि-रिलिज गर्दा यी चलचित्रले दर्शक पाएनन् । चलचित्र हेर्न हलमा पुग्ने दर्शकको संख्या शून्यजस्तै भयो । हलमा १० जना दर्शक पुर्‍याउन निकै हम्मेहम्मे पर्‍यो ।

१ माघमा फ्रेस चलचित्र 'एउटा यस्तो प्रेम कहानी' रिलिज भयो । शिव श्रेष्ठले निर्माण गरेको यस चलचित्रमा धेरै कहलिएका कलाकार थिए । धेरैलाई यस चलचित्रले सिनेजगतलाई उठाउने आस थियो ।

बिडम्बना, यस चलचित्रले पनि दर्शक पाएन । फ्रेस रिलिज भएको यस चलचित्रमा पनि दर्शकको उपस्थिति न्यून रह्यो । बरु यो चलचित्र रिलिज हुँदाताका केही विवादित बन्यो । कलाकारले चलचित्र नै नसकी रिलिज गरिएकोसम्म आरोप लगाए ।

सोही मितिमा एक दक्षिण भारतीय चलचित्र 'मास्टर' रिलिज भयो । यस चलचित्रले बरु हलमा दर्शकको चहलपहल बढायो । बिजुलीको बिलसमेत तिर्न नसकेका हलवालालाई यस चलचित्रले केही राहत दियो ।

उक्त मितिपछि कुनै फ्रेस नेपाली फिल्म हलमा लागेका छैनन् । हलवाला तथा वितरकहरूले विभिन्न पुराना चलचित्र रिलिज गरिरहेका छन् ।

रोशन भन्छन्, 'नयाँ चलचित्र रिलिज गर्नलाई निर्माताहरू डराइरहनुभएको छ । नयाँ चलचित्र नभएपछि दर्शकलाई हलसम्म तान्न सकिएको छैन । हामीले जुन अपेक्षासहित हल सञ्चालन गरेका थियौँ, त्योअनुसारको दर्शक देख्न पाइएको छैन ।'

२ फागुनमा क्यूएफएक्समा 'सानो संसार' रिलिज भयो । १३ वर्षअगाडि रिलिज भएको यस चलचित्रलाई भ्यालेनटाइन्स डेको छेको पारेर पुन: रिलिज गरिएको थियो । तर, यस चलचित्रमा पनि दर्शकको उपस्थिति शून्य नै रह्यो ।

बीचमा चलचित्र 'कबड्डी कबड्डी कबड्डी'लाई पनि रि-रिलिज गरियो । फ्रेस रिलिजमा राम्रो व्यापार गरेको यस चलचित्रले रि-रिलिजमा भने दर्शक पाएन । क्यूएफएक्सले चलचित्र 'कागबेनी'लाई पनि पुन: हलमा लगायो । याे चलचित्र हेर्ने दर्शक नै भएनन् ।

अहिले हलमा 'मास्टर' सँगै चिनियाँ सुपर हिरोइन फिल्म ‘मूलन’ र हलिउड फिल्म ‘मोन्स्टर हन्टर’ लाई शो छुट्याइएको छ । तर, यी चलचित्रमा पनि दर्शक छैनन् ।

०००

१ माघदेखि खुलेको अष्ट नारायण हल १ महिना सञ्चालन नहुँदै बन्द भयो । हलमा दर्शकको उपस्थिति नभएपछि सञ्चालकले बाध्य भएर हलमा ताला लगाए ।

अष्ट नारायणका सञ्चालक सोहित मानन्धर भन्छन्, 'हामीले हल सञ्चालन गर्दा त्यहाँको खर्च धान्ने गरी पनि व्यापार गर्न सकेनौँ । त्यसैले हामीले हल बन्द गरेका हौँ ।'

आगामी शुक्रबारदेखि भने हल पुन: सञ्चालनमा आउँदै छ । शुक्रबार चलचित्र 'गोर्खे' रिलिज हुनेछ । तर, यस चलचित्रबाट पनि मानन्धरलाई खासै अपेक्षा छैन । 'हामीले चलचित्र रिलिजकै लागि मात्र हल खोल्न लागेका हौँ । दर्शकको भीड होला भन्ने आस त छैन', उनले बताए ।

'क्यूएफएक्स' चेनका सीईओ रोशन अडिगा आफूहरू अहिले घाटामा नै रहेर हल सञ्चालन गरिरहेको बताउँछन् । नयाँ चलचित्र रिलिज नै नभएका कारण पनि हलमा दर्शकको उपस्थिति नरहेको उनको भनाइ छ ।

रोशन भन्छन्, 'नयाँ चलचित्र रिलिज गर्नलाई निर्माताहरू डराइरहनुभएको छ । नयाँ चलचित्र नभएपछि दर्शकलाई हलसम्म तान्न सकिएको छैन । हामीले जुन अपेक्षासहित हल सञ्चालन गरेका थियौँ, त्योअनुसारको दर्शक देख्न पाइएको छैन ।'

दर्शकको उपस्थिति कम रहे पनि शो नै रद्द गर्नुपर्ने अवस्था नरहेको उनले बताए । उनी भन्छन्, 'हामीले २-३ जना दर्शक भए पनि शो गरेका छौँ । रद्द नै चाहिँ गर्नुपरेको छैन ।'

बानेश्वरको 'वान सिनेमाज'मा शनिबार दर्शकको उपस्थिति राम्रो देखियो । दक्षिण भारतीय चलचित्र 'चक्रका रक्षक' नामक चलचित्रले राम्रै दर्शक तान्यो ।

वान सिनेमाजका सुपरभाइजर अखिलेश श्रेष्ठ शनिबार ६० प्रतिशत अकुपेन्सी रहेको दाबी गर्छन् । उनी भन्छन्, 'हल सञ्चालन भएपछि यो शनिबार सबैभन्दा बढी दर्शक आउनुभएको थियो । शनिबारको व्यापार उत्साहजनक रह्यो ।'

शनिबारको उपस्थिति हेर्दा नयाँ चलचित्र रिलिज भए हलमा दर्शक आउने श्रेष्ठ बताउँछन् । उनी भन्छन्, 'नयाँ फिल्म छ भने दर्शक आउनुहुन्छ । पुरानो फिल्म भएर पनि दर्शक हलमा आउनुभएको छैन ।'

नेपाली चलचित्रक्षेत्र अहिले 'जिरो' भएको वितरक, हल सञ्चालक तथा चलचित्र संघका उप-महासचिव गोपालकाजी कायस्थ बताउँछन् । हल बन्द हुँदाभन्दा खोलेपछि हलवालालाई घाटा लागेको उनको भनाइ छ ।

कायस्थ भन्छन्, 'हल बन्द हुँदा कर्मचारीलाई आधा तलब दिए पनि हुने थियो । अहिले त पूर्ण तलब दिनुपर्छ । दर्शक भए त हुन्थ्यो, दर्शक पनि छैनन् । अहिले हलवालालाई त ठूलो मर्का परेको छ ।'

कायस्थ हलवालालाई मात्र नभएर निर्मातादेखि वितरकसम्मलाई मर्का परेको बताउँछन् । 'निर्माताले ब्याज तिरिरहनुभएको छ, वितरकको लगानी फसेको छ । सबैलाई तनाव नै तनाव छ', गोपाल भन्छन्, 'यो कोरोनाले त के गर्‍यो गर्‍यो ।'

अष्ट नारायण हलमा सञ्चालक मानन्धर भन्छन्, 'हलमा दर्शक आउनका लागि प्रतीक्षित चलचित्र नै चाहिन्छ । चैतको दोस्रो साता बलिउड चलचित्र सूर्यवंशी रिलिज हुँदै छ । अनि चैतको अन्तिममा केही नेपाली चलचित्र रिलिज हुँदै छन् । त्यो बेला दर्शक आउनेमा हामी ढुक्क छौँ ।'

हलमा दर्शक नआउनुको मुख्य दोषी नेपाल सरकार भएको कायस्थकाे आराेप छ । उनी भन्छन्, 'नेपाल सरकारले ५० प्रतिशत अकुपेन्सीमा हल चलाउने आदेश दिएको छ । जसका कारण निर्माताहरू चलचित्र रिलिज गर्न डराएका छन् । नयाँ चलचित्र नहुँदा हलमा दर्शक छैनन् ।'

अहिले चलचित्र संघ पूर्ण अकुपेन्सीमा चलचित्र चलाउने अनुमति लिनका लागि नेपाल सरकारलाई झकझकाइरहेको छ ।

नयाँ चलचित्रको प्रतीक्षा

अहिले हल सञ्चालकहरू नयाँ चलचित्रको प्रतीक्षामा छन् । चैतको दोस्रो सातादेखि प्रतीक्षित मानिएका चलचित्र रिलिज हुने सेड्युल रहेका कारण त्यो समयदेखि हलमा दर्शक बढ्ने हलवालाको विश्वास छ ।

अष्ट नारायण हलमा सञ्चालक मानन्धर भन्छन्, 'हलमा दर्शक आउनका लागि प्रतीक्षित चलचित्र नै चाहिन्छ । चैतको दोस्रो साता बलिउड चलचित्र सूर्यवंशी रिलिज हुँदै छ । अनि चैतको अन्तिममा केही नेपाली चलचित्र रिलिज हुँदै छन् । त्यो बेला दर्शक आउनेमा हामी ढुक्क छौँ ।'

'क्यूएफएक्स'का हलहरू पनि चैतमा रिलिज हुने चलचित्र नै कुरिरहेका छन् । केही विदेशी र केही नेपाली नयाँ चलचित्र चैतमा रिलिज हुने भएकाले त्यो समय हलमा दर्शक बढ्न सक्ने क्यूएफएक्सका सीईओ अडिगा बताउँछन् ।

'वान सिनेमाज्'का सुपरभाइजर अखिलेश श्रेष्ठ भने आगामी शुक्रबार चलचित्र 'राया' रिलिज भएसँगै दर्शक बढ्ने आशा व्यक्त गर्छन् । 'नयाँ चलचित्र रिलिज हुँदा दर्शक बढिरहनुभएको छ । पक्कै यस चलचित्रले पनि दर्शक बढाउनेछ', अखिलेशले भने ।

अझै डेढ महिना चलचित्रक्षेत्र सुनसान रहने वितरक तथा हल सञ्चालक गोपालकाजी कायस्थ बताउँछन् । उनी भन्छन्, 'अझै डेढ महिना नयाँ चलचित्र लाग्दैन । त्यो समयसम्म हल सुनसान नै रहन्छ । हामीले घाटा नै बेहोर्नुपर्नेछ ।'

चैतको दोस्रो साता बलिउड चलचित्र 'सूर्यवंशी' रिलिज हुँदै छ भने अन्तिम साता ‘लप्पनछप्पन २, मनसँग मन र कृष्णलीला’ ले प्रदर्शन मिति तोकेका छन् । हलवाला पनि यिनै चलचित्रलाई कुरिरहेका छन् ।

प्रकाशित मिति: सोमबार, फागुन १७, २०७७ ०६:४८