यस्तो हुनेछ ओबामाले बनाउने तेञ्जिङ नाेर्गेको कथा

A+ A A-

अमेरिकी पूर्वराष्ट्रपति बाराक ओबामाले पहिलोपटक सगरमाथा सफल आरोहण गरेका तेञ्जिङ नोर्गे शेर्पाबारे फिल्म बनाउँदै छन् । ओबामा दम्पतीको प्रोडक्सन कम्पनी 'हाइयर ग्राउण्ड'ले नेटफ्लिक्ससँगकाे सहकार्यमा तेञ्जिङको साहसलाई स्क्रिनमा उतार्न खोजेका हुन् ।

यो विषय छान्नुकाे कारणबारे नेटफ्लिक्स ओबामासँग प्रस्ट हुन खोज्छ । नेटफ्लिक्सको ओबामालाई प्रश्न छ- 'ह्वाई तेञ्जिङ ?'

'हामीले हाइयर ग्राउण्ड शानदार कथाहरू भन्नको लागि सुरु गरेका हाैँ । र, तेञ्जिङ आफैँमा शानदार छन्', ओबामा नेटफ्लिक्सको जिज्ञासा साम्य पार्छन् ।

तेञ्जिङ र एडमन्ड हिलारी २३ मे १९५३ मा सगरमाथा शिखरमा चढेका थिए ।

ओबामाले निर्माण गर्न लागेको फिल्म एड डग्लसको पुस्तक 'तेञ्जिङ: हिरो अफ एभरेष्ट' मा आधारित छ । फिल्मको नाम नै 'तेञ्जिङ' राखिएको छ । चलचित्रलाई लुक डेभिजले लेखिरहेका छन् । निर्देशन जेनिफर पिडम (शेर्पा)ले गर्नेछिन् ।

यस्तो हुनेछ 'तेञ्जिङ'को कथा

‘तेञ्जिङ: हिरो अफ एभरेस्ट’मा सगरमाथाको सफल आरोहण गरेको पाँच दशकपछि मात्रै तेञ्जिङको बहादुरी र आत्मविश्वासकाे चर्चा विश्वभर हुन थालेको लेखिएको छ । तेञ्जिङको साहसिलो सफलता कति कठिन थियो भन्ने कल्पना मानिसहरू अझै पनि गरिरहने कुरालाई पुस्तकमा समेटिएको छ ।

सगरमाथा आरोहण अहिले साहसिक पर्यटनभित्रै पर्छ । यसको आरोहण व्यावसायिक बनाइएको छ । यो साहसिक पर्यटनमा साहस दिने र हिमाल चढ्न प्रेरणा दिने मानिस हुन्, तेञ्जिङ । चलचित्रले उनकै साहसकाे चित्रण गर्ने जमर्को गर्नेछ ।

‘तेञ्जिङ: द हिरो अफ एभरेस्ट’मा उनका परिवार, साथीभाइ र तेञ्जिङसँग सगरमाथा आरोहण गरेका सदस्यहरूको अन्तर्वार्तामा आधारित छ । त्यहाँ उनको बाल्यकालको चित्रण गरिएको छ । सन् १९५३ मा तेञ्जिङले सगरमाथाको सफल आरोहण गरेका थिए । पुस्तकमा उनको सफलताकाे कथा मात्रै होइन, उनी आरोहणको केन्द्रविन्दुमा किन थिए र बेसक्याम्पबाट टुप्पोसम्म आरोहणमा चाहिने सामग्री कसरी पुर्‍याउँथे भन्ने कथा पनि समावेश छ ।

तेञ्जिङको जीवनी समाविष्ट एड डगल्सको पुस्तक 'तेञ्जिङ: द हिरो अफ एभरेस्ट'

भरियाका रूपमा सगरमाथा चढ्ने युवकले पहिलो पटक सगरमाथा आरोहण गर्ने व्यक्तिका रूपमा विश्वभर कहलिन कसरी सफल भए भन्ने विषयमा फिल्म केन्द्रित हुनेछ ।

‘प्रख्यात तेञ्जिङको बाल्यकाल र उनको संघर्षको कथा अझै पनि दुनियाँका लागि चासोको विषय छ । फिल्ममा तेञ्जिङबारेका जिज्ञासा मेट्ने कोसिस हुनेछ,' निर्देशक जेनिफर पिडमले भनेकी छिन् ।

पुस्तकमा शेर्पाहरूको रहनसहनबारे उल्लेख रहेकाले त्यस चलचित्रमा शेर्पाहरूका सांस्कृतिक रहनसहनका झलकसमेत समावेश गरिने पिडमको भनाइ छ । 'शेर्पाका सांस्कृतिक रहनसहनका झलक हुनेछन् समग्रमा तेञ्जिङकाे आत्मवृत्तान्त रोचक रूपमा उतारिनेछ,' नेटफ्लिक्ससँगको छोटो संवादमा पिडमले खुलाएकी छिन् ।

हिमाल चढ्नुअघि तेञ्जिङले हिमदेवता मियोलाङसाङमाको पूजा गर्थे । केही कुरा देवतालाई चढाउँथे र आफूसँगै लिएर जान्थे । आरोहण सफल भएपछि केही कुरा टुप्पामा गाढ्थे र तल झरिसकेपछि छोरीलाई पेन्सिल, बिस्कुट र देवतालाई चढाएको प्रसाद दिने गरेको पुस्तकमा उल्लेख छ । हिमाल, तेञ्जिङ, हिमदेवता र छोरीबीचको सम्बन्धलाई समेत चलचित्रमा उतार्ने प्रयत्न हुनेछ ।

आरोहणपछि तेञ्जिङ विवादितसमेत बनेका थिए । तर, उनको साहसले विवादलाई कसरी छायामा पार्‍यो भन्ने कुरा पुस्तकमा लेखिएको छ । यो विषय पनि चलचित्रमा समावेश हुनेछ ।

०००

ओबामा दम्पतीले यसअघि पनि फिल्म, छोटो फिल्म, डकुमेन्ट्री तथा पोडकास्टहरू बनाइसकेका छन् । उनीहरूको प्रोडक्सन कम्पनी ‘हाइयर ग्राउण्ड’बाट बनेको पहिलो डकुमेन्ट्री ‘अमेरिकन फ्याक्ट्री’ले बेस्ट डकुमेन्ट्रीको अवार्डसमेत हात पारेको थियो ।

त्यस्तै, उनीहरूले निर्माण गरेका फिचर फिल्म ‘वर्थ’, डकुमेन्ट्री ‘क्रिप क्याम्प’, ‘बिकमिङ’ ले पनि राम्रो चर्चा कमाएका थिए ।

मिसेल ओबामाले बनाएको पोडकास्ट ‘द मिसेल ओबामा पोडकास्ट’ स्पोटिफाईबाट सार्वजनिक गरिएको थियो । उक्त पोडकास्ट स्पोटिफाईमा सर्वाधिक चर्चित बनेको थियो ।

अहिले ओबामा दम्पतीले तेञ्जिङसँगै छवटा प्रोजेक्टको निर्माण घोषणा गरेका छन् । जसमा पनि उनीहरूले नेटफ्लिक्ससँग सहकार्य गरेका छन् ।

फिचर फिल्ममा ‘तेञ्जिङ’, ‘एक्जिस्ट वेस्ट’, ‘सेटलाइट’, ‘द योङ्ग वाइफ’ छन् भने दुई सिरिज ‘फायरकिपर्स डटर’ र ‘ग्रेट नेसन पार्क’ रहेका छन् ।

हाइयर ग्राउण्ड प्रोडक्सनले निर्माण गर्ने यी फिल्म केही फिक्सन छन् त केही वास्तविक जीवनसँग आधारित । सबै चलचित्रले फरक-फरक कथा बोकेका छन् ।

यी चलचित्रबारे ओबामाले भनेका छन्, ‘हाम्रो उद्देश्य भनेको प्रेरणासहितको फिल्म निर्माण नै हो । यी फिल्मले कुनै न कुनै रूपमा प्रेरणा दिनेछन् । यसमा हामी ढुक्क छौँ ।’