नाइट ब्यान्डका जेसन कुँवरकाे उपन्यासकार अवतार

A+ A A-

जेसन कुँवर गीत गाउँछन्, लेख्छन् । संगीत पनि भर्छन् । चलचित्रमा पार्श्व संगीतको काम पनि गर्छन् उनी ।

पछिल्ला वर्षहरूमा निकै रूचाइएकाे 'नाइट ब्याण्ड' मा आफ्नो परिचय बनाए जेसनले । ब्यान्डमा जेसन लिड भाेकलिस्ट, गीतकार तथा वाद्यवादककाे रूपमा छन् ।

उनै जेसनको परिचय केही फराकिलो बनेकाे छ । उनी अब आख्यानकार पनि । उनले लेखेको उपन्यास 'रमिते' शनिबार 'रेड पाण्डा' प्रकाशन संस्थामार्फत सार्वजनिक गरिएको हो ।

लेख्न रुचाउने जेसन फुर्सदकाे समय खेर जान दिँदैनन् । समयकाे सदुपयाेगले नै 'रमिते' तयार भएकाे उनी बताउँछन् ।

भन्छन्, 'म उपन्यास नै लेख्छु भनेर लेख्न थालेको थिइनँ । लेख्दै जाँदा रमाइलो लाग्दै गयो । अनि उपन्यास बन्यो ।'

'संगीतबाट नाम कमाउनुभएकाे थियाे । पुस्तक लेख्ने रहर कसरी जाग्याे ?'

यसकाे ठ्याक्कै जवाफ जेसनसँग छैन । तर, संगीतबाट भन्न नसकिएका कुरालाई उपन्यासमार्फत् भन्ने सोचले नै आफूले 'रमिते' लेखेकाे बताउँछन् उनी ।

'रमिते' सार्वजनिक गर्दै बालकलाकार

लेख्दै गर्दा नै प्रकाशित गर्ने सोच उनकाे थियाे । उनी साना साना पुस्तिकाहरू निकाल्न चाहन्थे । तर लेख्दैजाँदा उनकाे साेचाइ फेरियाे ।

'सुरुमा सानो-सानो पुस्तकहरू भयो भने पढ्न सजिलो हुन्छ भन्ने लागेको थियो', जेसन भन्छन्, 'निकाल्ने नै भएपछि किन सानो निकाल्ने भन्ने लागेर ठूलै बनाइयो ।'

'रमिते' उपन्यासले वैकल्पिक सभ्यताको विषय उठान गरेको छ । जेसन भन्छन्, 'उपन्यासमा कुनै पूरानो ठाउँको सभ्यतालाई कल्पना गरिएको छ । दुई ठाउँमा भएका सभ्ययताको मेलमिलाप तथा झगडाको विषयलाई यसमा समेटिएको छ ।'

उपन्यासलाई पूरानो कथ्य भाषामा लेखिएको छ । बोलीचालीबाट पनि हटिसकेका शब्दहरूलाई यसमा विशेष जोड दिइएको छ ।

'यो उपन्यास शिलालेखकाे शैलीमा छ । यसमा भएका पात्रले बोल्ने भाषाको नीति अन्य उपन्यासहरूको भन्दा फरक छ', जेसनले सुनाए ।

आफू लेखिरहने मान्छे भएकाले उपन्यास तयार गर्न खासै गाह्रो नभएको जेसन बताउँछन् । भन्छन्, 'हामीले गीत लेख्दा होस् वा कविता लेख्दा, कुनै न कुनै कथा सोचेकै हुन्छौँ । यसलाई पनि एउटा कन्सेप्ट बनाएर नै लेख्ने हो । त्यसैले मलाई खासै लेख्न गाह्रो भएन ।'

लेखक, संगीतकर्मी जेसन कुँवर

तर, 'रमिते' पढ्न भ्याएका केही शुभचिन्तकले भने उपन्यासको भाषा केही गाह्रो भएको प्रतिकृया दिएका उनले सुनाए । धेरैजसोले उपन्यासको भाषालाई बुझ्न गाह्रो पर्ने प्रतिकृया दिएकाे जेसनले सुने ।

पुस्तकमा भएका शब्दलाई सोही उपन्यासबाट बुझाउने प्रयास गरिएको जेसनको भनाइ छ । उनी भन्छन्, 'पृष्ठ १० मा भएका केही शब्द बुझिएन भने त्यसलाई पछिल्ला पृष्ठहरूमा बुझाउने प्रयास गरिएको छ । ध्यान दिएर पढियो भने पक्कै बुझिने छ ।'

जेसनले कुनै लक्षित पाठक चाहेका छैनन् । यसै पुस्ताले मात्रै पढ्नुपर्छ भन्ने पनि उनलाई लाग्दैन । पढ्न रुचि हुने जो कोहीले याे पुस्तक पढ्न सक्ने जेसन बताउँछन् ।

उनलाई उपन्यासबाट खासै ठूले अपेक्षा पनि छैन । यसैबाट नाम वा दाम कमाउने उद्देश्य राखेर उपन्यास नलेखेकाे उनी बताउँछन् । उनका अनुसार मनमा गुम्सिएका कुरालाई शब्दको रूप दिइएका मात्रै हाे ।

जेसन भन्छन्, 'मलाई लाग्दैन, यो पुस्तक पढेर मलाई कसैले चिन्नुहुन्छ । संगीतकै काम गर्दा पनि म कुनै अपेक्षा राख्दिनँ । यो त झन् मेरो भावना मात्र हो । यसबाट मलाई खासै ठूलाे अपेक्षा छैन ।'

रमिते सार्वजनिक कार्यक्रममा सांगीतिक प्रस्तुति

जेसन पुस्तक प्रकाशित हुँदा रमाइलो लागेको बताउँछन् ।

'अनि सन्तुष्टि ?'

उनकाे जवाफ छ, 'उपन्यास सार्वजनिक भयो । आफूले लेखेको उपन्यास बजारमा आउँदा रमाइलो नै लागेको छ । यही नै सन्तुष्टि हाे ।'

उनी अब आफू निरन्तर लेखिरहने बताउँछन् । रमिते उपन्यासलाई उनी सुरुवात भन्न रुचाउँछन् । भन्छन्, 'रमितेकै केही भाग पनि अझै लेख्नुपर्नेछ । अहिले पनि निरन्तर लेखिरहेछु ।'

'रुचिले मात्रै पुस्तक लेख्न सकिन्छ ?'

जवाफमा जेसनले भने, 'रुचिले लेख्न प्रेरित गर्छ । प्रयास गरेपछि पक्कै लेख्न सकिन्छ ।'

प्रकाशित मिति: सोमबार, फागुन ३, २०७७ १७:१९