प्रतिपक्षी सांसदको टिप्पणी, सत्ता पक्षद्वारा बचाउको प्रयास

A+ A A-

संघीय संसद्को प्रतिनिधिसभा बैठकमा सरकारको नीति तथा कार्यक्रममाथिको छलफल सोमबार पनि जारी छ । बैठकमा सांसदहरुले सरकारको नीति तथा कार्यक्रममाथि आ-आफ्नो धारणा राखिरहेका छन् ।

संसदमा बौल्दै नेपाली कांग्रेस नेता एवं सांसद ज्ञानेन्द्रबहादुर कार्कीले सरकारको नीति तथा कार्यक्रम सतही भएको टिप्पणी गरे । उनले सरकारको कार्यक्रम महत्त्वकांक्षी, अस्पष्ट, अमूर्त एवं कामभन्दा प्रचार र प्रोपोगान्डामा केन्द्रित भएको बताए । ‘ठूला ठूला आयोजनाको कुरा गरे पनि ठोक कार्यक्रम आएन,’ उनले भने, ‘सरकारले हचुवाका भरमा नीति तथा कार्यक्रम ल्यायो ।

त्यस्तै, कार्कीले सरकारले तथ्यांकमाथि खेलबाड गर्न लागेको आरोप लगाए । उनले सरकारको नीति तथा कार्यक्रममा नेपाल राष्ट्र बैंक, तथ्यांक विभाग जस्ता स्वायत्त संस्थाहरुको कामकारबाहीमा पनि अनावश्यक हस्तक्षेप गरिएको दाबी गरे ।

‘तथ्यांक विभाग, नेपाल राष्ट्र बैंक जस्ता स्वायत्त संस्थाहरुलाई अर्थ मन्त्रालयको शाखाजस्तो गरी चलाउन खोजिएको छ, प्रतिकूल देखिने तथ्यांक लुकाएर अनुकूल तथ्यांक मात्रै बनाउन थालिएको छ, यस्तो कार्यले तथ्यांकीय विश्लेषण प्रणाली कमजोर भयो, तथ्यांकमाथि यो प्रकारको राजनीति नगर्नुस्,’ नेता कार्कीले भने ।

उनले गत वर्ष सरकारले तयार पारेको श्तेतपत्र नै गलत भएको कार्कीको ठम्याइ छ ।

‘सरकारले चालू आर्थिक वर्षका लागि १३ खर्ब १५ अर्ब रुपैयाँको बजेट ल्यायो । असन्तुलित श्वेतपत्रको जगमा बनेको बजेट ठीक हुने कुरै
थिएन । त्यसैले सरकारले मध्यावधि समीक्षामार्फत् बजटेको आकार १ खर्ब ४५ अर्ब रुपैयाँ बजेट घटायो, राजस्व पनि ९ खर्ब ४५ अर्ब रुपैयाँबाट घटाएर ९ खर्ब १७ अर्ब रुपैयाँ बनायो,’ पूर्वअर्थमन्त्री समेत रहेका कार्कीले भने ।

प्रतिपक्षी दलका सांसदको टिप्पणीलाई सत्ता पक्षका सांसदका बचाउ गरेका छन् । नेकपाका सांसद कृष्णभक्त पोख्रेलले नीति तथा कार्यक्रम वस्तुनिष्ठ र वैज्ञानिक भएको तर्क गरे । राष्ट्रिय गौरवका आयोजनाहरु सम्पन्न गर्ने, संघीय संसद् भवन निर्माण, सार्वजनिक जग्गा फिर्तालगायतका अत्यन्तै राम्रा कार्यक्रम समयसीमासहित आएको भन्दै उनले अब कार्यान्वयनका लागि सबैले सहयोग गर्नुपर्नेमा जोड दिए ।

प्रकाशित मिति: सोमबार, वैशाख २३, २०७६ २१:२९