रोकियो म्युजिक भिडियोको छायांकन, घरमै थुनिन थाले कलाकार

A+ A A-

कोरोनाको त्रास बढेसँगै सरकारले गत ११ चैतबाट लकडाउन घोषणा गर्‍यो । त्योसँगै चलचित्र तथा म्युजिक भिडियो क्षेत्र पूर्ण रुपमा ठप्प रह्यो ।

तर, सरकारले ‘लुजडाउन’ गरेसँगै म्युजिक भिडियो क्षेत्र निकै चलायमान बन्यो । धमाधम म्युजिक भिडियोको छायांकन चल्यो । म्युजिक भिडियोमा कलाकारहरु व्यस्त बन्न थाले । चलचित्र क्षेत्रको काम सुरु नहुँदा चलचित्रका नायक/नायिका पनि भिडियोमा काम गर्न थाले ।

अहिलेको अवस्था भने निकै गम्भीर बन्दै गएको छ । संक्रमितको संख्या थपिदै जाँदा जोखिम बढिरहेको छ । अस्पताल भरिएका छन्, बिरामी घरमा नै आइसोलेट हुन बाध्य छन् ।

यो अवस्था आएसँगै नेपाल सरकारले विज्ञप्ति जारी गर्‍यो । जसमा छायांकन रोक्न समेत आग्रह गरिएको छ । त्यसैले, अब भने म्युजिक भिडियो छायांकनका लागि पनि म्युजिक भिडियोकर्मीहरु डराएका छन् ।

लुजडाउन सुरु भएसँगै अभिनेता पल शाह निकै व्यस्त बने । उनले यही समय आधा दर्जन भिडियोमा काम गर्न भ्याए । तर, जोखिम बढ्दै गएपछि उनले अब भिडियोमा काम नगर्ने घोषणा नै गरिसकेका छन् ।

आफूले वचन दिएको र सम्पूर्ण तयारी सकिएको भिडियोको गर्ने पलको तयारी थियो । तर, अब भने ती गीतको काम पनि रोकिएको पलले बताए ।

उनले भने, ‘मैले ३ वटा गीत पक्का गरिसकेको थिए । तर, अब त्यसको काम पनि रोकिएको छ । ज्यान रहे काम त पछि गरौला नि ।’ हिजोका लागि तय भएको छायांकन पनि रद्द भएको पलले बताए ।

त्यस्तै, अभिनेता पुष्प खड्का पनि भिडियोमा निकै व्यस्त थिए । २ भदाैदेखि लगातार ४ वटा भिडियोका लागि पुष्पले समय छुट्याएका थिए । तर, अब ती सम्पूर्ण कामहरु पछाडि धकेलिएको पुष्प बताउँछन् ।

उनले भने, ‘सुटिङ भनेपछि यत्तिकै पनि भिडभाड भइहाल्छ । त्यो भिडमा एकजनालाई मात्रै लागेको रहेछ भने पनि गाह्रो हुने भयो । त्यसैले अहिलेलाई काम नगर्ने नै पक्षमा पुगियो ।’

पुष्प अब लकडाउनको सुरुवाती दिनहरु जस्तै घरमा थुनिएर बस्ने बताउँछन् । उनले भने, ‘मलाई त ती ४ महिना अगाडिका दिनहरु याद आइरहेको छ । अब त घरबाट बाहिर निस्किने कुरै छैन ।’

यो बीचमा भएका कामहरुले भने कलाकार तथा प्राविधिकहरुलाई भने ठूलो रहत भएको पुष्प बताउँछन् । उनले भने, ‘४ महिना कामबिहीन हुँदा कलाकार तथा प्राविधिकहरुको अवस्था नाजुक भएको थियो । तर, यो छोटो समयमा नै भएको कामले भने सम्पूर्णलाई राहत भएको छ ।’

म्युजिक भिडियोमा निकै व्यस्त बनेका सागर लम्सालले पनि केही समयको लागि विश्राम लिने निधो गरेका छन् । आफ्नो स्वस्थ्य भन्दा ठूलो केही नभएको भन्दै उनले केही समय काम नगर्ने निधो गरेका हुन् ।

सागर भन्छन्, ‘हामी आफैँमा एक जिम्मेवार नागरिक हौँ । त्यसैले यो संकटको समयमा आफैँ सचेत हुन जरुरी छ । त्यसैले केही समयको लागि काम नगर्ने निधो गरेँ ।’

सागरले पनि ४ वटा भिडियो साइन गरिसकेका थिए । तर, सम्पूर्ण कामलाई उनले पछि सारेका छन् । उनी पनि अब घरमा नै सुरक्षित रहेर बस्ने विकल्प रोज्दैछन् ।

‘मेरो प्राय: गीतहरु डान्सिङ नै हुन्छ । त्यसको लागि कोरसहरु धेरै चाहिने । त्यो हुँदा एकदमै धेरै डर हुनेभयो’, सागर भन्छन्, ‘यो अवस्थामा घर बस्नुको विकल्प छैन ।’

त्यस्तै, पछिल्लो समय भिडियोमा निकै व्यस्त बनिरहेकी रियाशा दाहाल पनि आफूले तत्कालको लागि काम रोकेको बताउँछिन् । काठमाडौं उच्च जोखिममा रहेका कारण काम गर्न डर भएको रियाशाले बताइन् ।

उनी भन्छिन्, ‘काम रोक्नुको मुख्य कारण भनेको नै डर हो । सुटिङमा हुने भिडभाडले गर्दा संक्रमणको डर भयो । त्योसँगै सरकारले नै काम रोक्नु भनेर विज्ञप्ति जारी गरेपछि हामीले त्यसलाई नकारेर काम गर्ने कुरै रहेन । त्यसैले केही समयको लागि ‘पज’ गरेका छौँ ।’

लुजडाउन भएसँगै धेरै भिडियोमा देखिएकी रियाशाले ४ वटा भिडियोमा काम गर्ने सम्झौता गरिसकेकी थिइन् । अब भने त्यो काम केही समय पछाडि धकेलिएको छ ।

म्युजिक भिडियोमा निकै व्यस्त मानिने छायांकार अर्जुन तिवारी पनि अहिले तत्काल काम नगर्ने पक्षमा छन् । सरकारको विज्ञप्तिलाई स्वीकार गर्दै अहिलेलाई काम रोकिएको अर्जुनले बताए ।

‘सरकारको विज्ञप्तिलाई पनि हामीले मान्नै पर्ने हुन्छ । त्योसँगै आफ्नो स्वस्थ्यको ख्याल पनि गर्नैपर्‍यो,’ अर्जुनले भने, ‘अब सरकारबाट अर्को सूचना नआएसम्मको लागि काम रोकेका छौँ ।’

अर्जुनले १ दर्जन बढी भिडियोको काम लिइसकेका थिए । तर, अहिलेलाई त्यो सम्पूर्ण काम पछि सारेको उनको भनाई छ ।

निर्देशक निकेश खड्काले पनि ५ वटा भिडियो छायांकन गर्ने तयारी गरिरहेका थिए । तर, ३ वटा गीत डान्सिङ भएकाले कोरस राखेर गर्नुपर्ने थियो । जसका कारण निकेशमा काम गर्ने वा नगर्ने दोधार थियो । सरकारको विज्ञप्तिपछि भने उक्त कामलाई रोकिएको निकेशले बताए ।

उनले भने, ‘हामी काम गर्ने वा नगर्ने भन्ने दोधारमा नै थियौँ । सरकारको विज्ञप्तिले भने हामीलाई निर्णय लिन सजिलो भयो ।’ आफ्नो लागि प्राथमिकता स्वस्थ्य नै भएका कारण भिडियोको काम रोकिएको निकेशले बताए ।

प्रकाशित मिति: आइतबार, साउन ३२, २०७७ १९:३८