कोरोना प्रभाव : शून्य चलचित्र क्षेत्र, चकाचक म्युजिक भिडियो

A+ A A-

कोभिड-१९ का कारण चलचित्र क्षेत्र शून्य भएको यस समय म्युजिक भिडियोको क्रेज गज्जब देखिएको छ । गीत रेकर्डिङदेखि छायांकनसम्म कलाकारलाई भ्याई नभ्याई नै भएको छ । तीजगीतबाहेक नै एक सातामा दर्जनभन्दा बढी म्युजिक भिडियो सार्वजनिक भइरहेका छन् ।

चलचित्रको काम रोकिएको यस समयमा चलचित्रका कलाकार पनि भिडियोप्रति निकै आकर्षित भइरहेका छन् । प्राय: कलाकारहरू अहिले म्युजिक भिडियोमा देखिन थालेका छन् ।

चलचित्रमा निरन्तर काम हुँदा पनि अभिनेता पल शाहले म्युजिक भिडियोका लागि समय छुट्याउँथे । चलचित्रबाट फुर्सद मिल्यो कि म्युजिक भिडियोमा काम गरिहाल्ने पलको बानी थियो ।

अहिले कोरोनाका त्रासका कारण चलचित्रको काम पूर्ण रूपमा रोकिएको छ । चलचित्रजन्य कुनै पनि काम नहुँदा पलले ढुक्कसाथ भिडियोमा समय दिन पाएका छन् । उनी अहिले भिडियोमा निकै ब्यस्त बनिरहेका छन् ।

पलले अझै चलचित्रको काम ३-४ महिना नहुने बुझेका छन् । त्यसैले म्युजिक भिडियोमा उनको झुकाव बढिरहेको छ । शिलापत्रसँग कुरा गर्दै पलले भने, 'मेरो सुरुवात भनेको नै म्युजिक भिडियो हो । अहिले चलचित्रमा काम नहुँदा मैले पूरा समय म्युजिक भिडियोमा दिन पाएको छु । आफ्नो कामलाई निरन्तरता दिन पाएको छु ।'

पलले आफ्नो म्युजिक भिडियोलाई कुनै चलचित्रको भन्दा कम प्रचार गर्दैनन् । सुटिङदेखि रिलिजसम्मका विभिन्न खुराकहरू उनले सामाजिक सञ्जालमा पोष्ट गरिरहेका हुन्छन् ।

यस विषयमा पल भन्छन्, 'फुर्सदको समय काम गरेको छु । त्यसैले आफ्नो कामको प्रचार त गर्नैपर्‍यो नि !'

लकडाउनकै बीचमा छायांकन भएको पलका २ भिडियो सार्वजनिक भए । दुवै भिडियोले युट्युबमा धमाकेदार भ्युज पाए, जुन कुराले पललाई झनै उत्साहित बनाएको छ ।

पल भन्छन्, 'पहिलो गीतले ४० दिनमा नै करोड भ्युज पाएको छ भने दोस्रो गीतले एक सातामा ३५ लाख भ्युज पाएको छ । दर्शकले देखाउनुभएको यो मायाबाट म निकै उत्साहित भएको छु ।'

पलले अर्को एउटा भिडियोको छायांकन सकाइसकेका छन् भने यस साताका लागि उनका ५ वटा गीतको सेड्युल तयार भएको छ ।

त्यस्तै, म्युजिक भिडियो हुँदै चलचित्र क्षेत्रमा पनि आफ्नो पहिचान बनाएका अभिनेता पुष्प खड्का पनि म्युजिक भिडियोमा ब्यस्त बनिरहेका छन् । लकडाउन खुकुलो भएसँगै उनले ५ वटा भिडियोमा काम गरिसकेका छन् ।

दर्शकलाई मनोरञ्जन दिन उच्च सावधानीका साथ भिडियोमा काम गरिरहेको उनले बताए । उनले भने, 'हामी कलाकारको काम भनेकै दर्शकलाई मनोरञ्जन दिनु हो । यो समय चलचित्र हलहरू बन्द भएको अवस्था छ । त्यसैले म्युजिक भिडियोबाट भए पनि दर्शकलाई मनोरञ्जन दिने प्रयासमा छौँ ।'

दर्शकलाई मनोरञ्जन मात्र नभएर कलाकार तथा प्रविधिकहरूलाई आर्थिक रूपमा सहयोग हुने भएकाले पनि भिडियोमा काम गर्नुपरेको पुष्प बताउँछन् ।

'केही महिना काम रोकिँदा कलाकारहरू आर्थिक हिसाबले पनि अप्ठ्यारोमा परिसक्नुभएको थियो । सर्भाइभ हुन गाह्रो भइसकेको थियो,' पुष्प थप्छन्, 'अहिले काम गर्न पनि पाउनुभएको छ । आर्थिक पक्षबाट पनि टिक्न सक्ने हुनुभएको छ ।'

चलचित्र क्षेत्रकी ब्यस्त अभिनेत्री स्वस्तिमा खड्का पनि अहिले धमाधम भिडियोमा काम गरिरहेकी छिन् । यसबीचमा उनले ३ वटा भिडियोमा काम गरिसकेकी छन् भने केही भिडियोमा कुरा भइरहेको स्वस्तिमा बताउँछिन् ।

चलचित्रबाट नै कलाकारितामा प्रवेश गरेकी स्वस्तिमाले केही समय म्युजिक भिडियोमा पनि काम गरिन् । तर, पछिल्लो समय निरन्तर चलचित्रमा काम मिलेपछि उनले भिडियोबाट विश्राम लिएकी थिइन् ।

अहिले फुर्सद मिलेका कारण भिडियोलाई समय दिन पाएको स्वस्तिमा बताउँछिन् । उनले भनिन्, 'भिडियोका लागि म नयाँ मान्छे भने होइन । बीचमा अलिक बढी समय चलचित्रलाई दिएकी थिएँ । त्यो बेला दर्शक झुक्किने डरले भिडियोमा काम गरिनँ । अहिले चलचित्रको काम नहुँदा भिडियोमा काम गरेकी हुँ ।'

स्वस्तिमा आफूले पैसाकै लागि मात्र काम नगरेको बताउँछिन् । 'म्युजिक भिडियोमा काम गर्दा आर्थिक हिसाबमा राम्रो त हुने नै भयो । तर, पैसाकै लागि भनेर मैले जस्तो पनि गीतमा भने काम गर्दिनँ,' उनले भनिन् ।

गीत र टिम हेरेर मात्र भिडियोमा काम गर्ने गरेको स्वस्तिमाले बताइन् ।

यी त केही प्रतिनिधि कलाकार मात्रै हुन् । त्योसँगै चलचित्र र म्युजिक भिडियोमा पनि काम गरिरहेका अभिनेत्री आँचल शर्मा, केकी अधिकारी, नाजिर हुसेनलगायतको ब्यस्तता पनि कम छैन । चलचित्र क्षेत्रमै रमाइरहेका अभिनेता दयाहाङ राई, विपिन कार्कीहरू पनि म्युजिक भिडियोमा आकर्षित भइरहेका छन् ।

'किन म्युजिक भिडियोमा आकर्षित भए चलचित्रका कलाकार ?' भन्ने प्रश्नमा निर्देशक मिलन चाम्सले भने, 'एउटा कलाकार अभिनय नगरी बस्न सक्दैन । कलाकारमा सधैँ अभिनयको भोक हुन्छ । त्यसलाई पूरा गर्न चलचित्रमा काम नभएकाले अहिले भिडियोमा आकर्षित भएका हुन् ।'

आर्थिक हिसाबमा पनि सहयोग हुने भएकाले कलाकारले भिडियोलाई रोजिरहेको मिलनको बुझाइ छ ।

मिलन आफैँमा चलचित्र निर्देशक हुन् । म्युजिक भिडियोहुँदै चलचित्रमा आएका उनलाई अहिले चलचित्र निर्देशककै रूपमा चिन्ने धेरै छन् । काेराेना कहरसँगै चलिचत्र निर्माण सुस्ताएपछि उनी पनि अहिले भिडियो निर्देशनतिर मोडिएका छन् ।

आफ्नो धरातल नै म्युजिक भिडियो भएकाले म्युजिक भिडियोको काम गरिरहेको मिलनले बताए । उनले भने, 'म्युजिक भिडियो भनेको आज योजना बनाएर भोलि काम गर्न सकिने काम हो । त्यसैले पनि अहिलेको समयमा संकटमा परेका प्राविधिकहरूलाई प्रोत्साहित गर्न र चलचित्रमा काम गर्ने वातावरण बनाउनका लागि पनि मैले भिडियोमा काम गरिरहेको हुँ ।'

निर्देशक चाम्सले पनि यो समयमा ३ वटा भिडियोमा काम गरेका छन् ।

अहिलेको समय सबैभन्दा ब्यस्त भिडियो निर्देशकको रूपमा चिनिन्छन्, शान थापा । उनी पनि अहिले काममा फर्किसकेका छन् । लकडाउन खुकुलो भएसँगै उनी काममा फर्किएका हुन् । उनले यो समय ५ वटा भिडियोको छायांकन सकाएका छन् ।

म्युजिक भिडियोका कलाकारहरू चलचित्रमा जाने वा चलचित्रका कलाकारहरू म्युजिक भिडियोमा आउनु कुनै नौलो कुरा नहुने थापाकाे भनाइ छ । उनले भने, 'चलचित्रका कलाकार भिडियोमा आउनु नौलो कुरा होइन । तर, अहिले त भिडियोलाई गन्दै नगन्ने कलाकारहरू पनि भिडियोमा काम गर्न थाल्नुभएको छ ।'

चचित्रमा काम नभएर बेरोजगार हुनुपरेपछि चलचित्रका कलाकारहरू भिडियोतर्फ आकर्षित भएको थापाको बुझाइ छ । उनी भन्छन्, 'अहिले भिडियोमा पनि पहिलाको जस्तो पारिश्रमिक छैन । तर, बेरोजगार बस्नुभन्दा कम पैसामा भए पनि काम गर्ने सर्तमा चलचित्रका कलाकार भिडियोमा आइरहनुभएको छ । त्यसलाई नराम्रो भनिहाल्न पनि मिल्दैन ।'

चलचित्रका कलाकार म्युजिक भिडियोमा आउन थालेपछि म्युजिक भिडियोमा काम गरिरहेका कलाकारकाे राेजिराेटी खोसिएको त छैन ? भन्ने प्रश्नमा थापा भन्छन्, 'सबैले आ–आफ्नो ग्राहकसँग काम लिने हो । आ-आफ्नो परिश्रम बेच्ने हो । त्यसैले यहाँ एकले अर्काको काम खोस्ने भन्ने कुरै हुँदैन ।'

प्रकाशित मिति: सोमबार, साउन १२, २०७७ १५:४१