के कोरोनाबाट ६५ चलचित्र प्रभावित भएकै हुन् ?

A+ A A-

दयाराम दाहाल अध्यक्षका रूपमा आइसकेपछि चलचित्र विकास बोर्डले कोभिड-१९ बाट प्रभावित चलचित्रको सूची माग्यो । निर्माता संघले एक सूचना प्रकाशित गरेर निर्माताहरूलाई प्रभावित चलचित्रको फारम भर्न अनुरोध गर्‍यो ।

फारम भर्न अनुरोध गर्दा निर्माता संघले केही सीमित चलचित्रलाई प्रभावित चलचित्रको रूपमा हेरेको थियो । तर, विकास बोर्डमा नाम बुझाउने समयसम्म प्रभावित चलचित्रको सूची निकै लामो बन्यो । निर्माता संघले ६५ चलचित्रको नाम विकास बोर्डमा बुझाएको छ ।

६५ चलचित्र प्रभावित भएको सूची बाहिरिएपछि केही चलचित्रकर्मीहरूले नै यसमा आपत्ति जनाए । यत्तिका धेरै चलचित्रहरू अहिलेको अवस्थामा प्रभावित नभएको चलचित्रकर्मीहरूले टिप्पणी गरे ।

निर्माता संघले बुझाएको सूचीमा रिलिज भइसकेकादेखि निर्माण इजाजत लिएर थन्किएर बसेका चलचित्रसम्म परेका छन् ।

चलचित्र संघ नेपालका पूर्वाध्यक्ष, निर्मात तथा हल सञ्चालक प्रदीपकुमार उदयले यतिका चलचित्र प्रभावित नभएको फेसबुकमा स्टाटस नै लेखे । उनले प्रश्न गर्दै लेखेका छन्, 'के साँच्चिकै यतिका चलचित्र प्रभावित भएका छन् त ?'

प्रदीपले यस सूचीमा वर्षौंदेखि थन्किएर रहेको, डिसहोमबाट रिलिज भइसकेको र चलचित्र बनाउने घोषणा मात्र गरेका चलचित्रहरू पनि समाविष्ट भएको उल्लेख गरेका छन् ।

'के यसरी जथाभावी लिस्ट बनाएर चलचित्र विकास बाेर्डमा बुझाउँदा वास्तविक कोरोना महामारीबाट प्रभावित चलचित्रले न्याय पाऊलान् त ?', प्रश्न सोध्दै प्रदीप लेख्छन्, 'आखिर किन नेपाल चलचित्र निर्माता संघले छानबिन नगरी जथाभावी नाम समाविष्ट गरी प्रभावमा परेको भनेर लिष्ट चलचित्र विकास बोर्डमा बुझायो होला ? जान्न इच्छुक रहेँ । जेहोस्, वास्तविक प्रभावित चलचित्रहरूले न्याय पाऊन् ।'

अन्य धेरै चलचित्रकर्मीहरूले पनि प्रश्न तेर्स्याएपछि निर्माता संघका कोषाध्यक्ष सुशील पोखरेलले निर्माता संघमा आवद्ध निर्माताहरूले भरेको फारमको मूल्याङ्कन गर्ने, नलिने वा लिएको फारम विकास बोर्डमा नबुझाउने गर्ने अधिकार आफूहरूसँग नभएको प्रष्ट पारे ।

उनले लेखेका छन्, 'फारम भर्ने हाम्रा सदस्यहरूले पूर्ण स्वामित्वका साथ आफ्ना चलचित्र कोरोनाबाट प्रभावित रहेको लिखितम दिइसकेपछि सम्बन्धित निकायमा पठाउने हाम्रो दायित्त्व हो र यही दायित्त्व पूरा गर्दै निर्माता संघले ६५ वटा सिनेमाहरू विकास बाेर्डमा सिफारिस गरेको हो । विकास बोर्डले प्रभावित चलचित्र साँच्चै प्रभावित भएको वा नभएको, कुन चलचित्र पहिलो प्राथमिकता दिनुपर्ने भन्ने संकलित विवरणका आधारमा उचित मूल्याङ्कन गर्ने नै छ ।'

त्यस्तै, प्रदर्शन तथा वितरण सभापति करण श्रेष्ठ पनि निर्माताले लिखित निवेदन दिएका कारण आफूहरूले विकास बोर्डमा सम्पूर्ण चलचित्रको सूची बुझाउन बाध्य रहेको बताउँछन् ।

उनले भने, 'सरकारले हामीसँग प्रभावित चलचित्रको सूची मागेपछि निर्माताहरूले भर्नुभएको फर्मलाई स्वीकारेर विकास बोर्डमा पठाएका हौँ । यसमा अब को कति प्रभावित भएको छ भन्ने कुरा विकास बोर्डमा समिति बनेको छ, उहाँहरूले गर्नु नै हुन्छ ।' करण यो सूचीमा पनि सेन्सर गर्ने काम विकास बोर्डले गर्ने बताउँछन् ।

प्रभावित चलचित्रको सूचीमा ४२ वटा र छायाङ्कनमा प्रभाव परेका चलचित्र २२ वटा रहेको करण बताउँछन् । उनले भने, 'फागुनदेखि भदौसम्म रिलिज मिति तोकेका चलचित्रहरू पनि प्रभावित चलचित्रको सूचीमा पर्ने भइहाले । त्योसँगै यसबीचमा छायाङ्कन रोकिएका वा छायाङ्कन सुरु गर्न नपाएका चलचित्रहरू पनि त प्रभावित त भएका हुन् नि त ! त्यो त फर्म भर्न पाउनुभयो नि त ।'

सरकारलाई चलचित्र क्षेत्र कति प्रभावित भएको छ त ? कोरोनाले चलचित्र उद्योगलाई कति घाटा पुर्‍याएको छ त भन्ने कुराको जानकारी दिन पनि सम्पूर्ण चलचित्रको सूची दिएको करणले बताए ।

यस्तो समय चलचित्र क्षेत्रका व्यक्तिहरूले एकअर्काको खुट्टा तान्नेभन्दा पनि एकजुट भएर अगाडि बढ्नुपर्ने करण बताउँछन् । उनले भने, 'फेसबुकमा स्टाटस लेखेर चलचित्रकर्मीले नै चलचित्रकर्मीहरूको विरोध नगरौँ । बरु टेबुलटक गरौँ । प्रभावित भएका चलचित्रको विषयमा कोही टेबुलटक गर्न चाहनुहुन्छ भने म तयार छु ।'

१० प्रतिशत छायाङ्कन भएलगत्तै स्थगित भएको चलचित्र '२ नम्बरी'का निर्देशक दीपेन्द्र लामा जुन पायो, त्यही चलचित्रलाई प्रभावितको सूचीमा राखिएको गुनासो गर्छन् । दीपेन्द्रले भने, 'त्यो सूचीमा त विकास बोर्डबाट निर्माण इजाजत लिएका सबै चलचित्र परेको देखेँ । यसले वास्तविक पीडितलाई ओझेलमा पार्ने हो कि भन्ने डर भयो ।'

सूची बुझाउने समयमा नै निर्माता संघले गल्ती गरेको दीपेन्द्रको भनाइ छ । 'फर्म भरेका चलचित्रहरू मध्ये कुनचाहिँ प्रभावित हो भन्ने निर्माता संघले नै बुझ्नुपर्ने थियो', दीपेन्द्र भन्छन्, 'अब विकास बोर्डले सही मूल्याङ्कन गरेर राहत देओस् । त्यही आस छ ।'

चलचित्रको सूची:

१. द होल टाइमर - सुदूरपश्चिमको अछाम जिल्लामा छायाङ्कन भइरहेकोमा १२ चैत २०७६ देखि छायाङ्कन स्थगन
२. पारस - १५ चैत २०७६ देखि छायाङ्कन जाने तयारी

३. २ नम्बरी - कोभिडले छायाङ्कन स्थगन
४. म यस्तो गीत गाँउछु २ - ३० फागुन २०७६ मा रिलिज मिति तोकिएको र प्रदर्शन हुन नपाएको
५. घनचक्कर - २०७६ काे चैते दसैँलाई रिलिज मिति तोकेको र रिलिज हुन नपाएको
६. मनको बाँध - २५ चैत २०७६ देखि छायाङ्कनमा जाने तयारीमा रहेको
७. हिरो रिटर्न्स - २८ वैशाख २०७६ लाई रिलिज मिति तोकेको र रिलिज हुन नपाएको

८. माया बस्छ कि के हो - १५ असार २०७७ लाई रिलिज मिति तोकेको र रिलिज हुन नपाएको
९. झिँगे दाउ - ५ मंसिर २०७६ देखि छायाङ्कन सुरु भई १२ चैतमा स्थगन
१०. उल्झन - २६ वैशाख २०७७ लाई रिलिज मिति तोकेको र रिलिज हुन नपाएको
११. पोखराकी काली - १५ असार २०७७ लाई रिलिज मिति तोकेको र रिलिज हुन नपाएको

१२. प्रेमगीत ३ - २८ चैत २०७६ लाई रिलिज मिति तोकेको र रिलिज हुन नपाएको
१३. सिमानामा काँडेतार - १० प्रतिशत छायाङ्कनपछि छायाङ्कन रोकिएको
१४. मन्त्र - २०७७ वैशाखकाे पहिलो सातालाई रिलिज लक्ष्य बनाएको
१५. हली - १५ असार २०७७ लाई रिलिज मिति तोकेको र रिलिज हुन नपाएको

१६. सम्हालिन्छ कहिले मन - ५ भदाै २०७७ लाई रिलिज मिति तोकेको/६ फागुनदेखि पोष्ट सुरु भई ११ चैतमा स्थगन
१७. हिजो आजका कुरा - १२ वैशाख २०७७ लाई रिलिज मिति तोकेको र रिलिज हुन नपाएको
१८. लक्का जवान - २१ चैत २०७६ लाई रिलिज मिति तोकेको/पोष्ट प्रोडक्सन रोकिएको
१९. मन परेसी - १० चैत २०७६ देखि छायाङ्कनमा जाने तयारी

२०. लिम्बो - १५ प्रतिशत छायाङ्कन सकिएर रोकिएको
२१. मेरो आफ्नो - २० जेठ २०७७ लाई रिलिज मिति तोकेको र रिलिज हुन नपाएको
२२. आकासे खेती - २६ वैशाख २०७७ लाई रिलिज मिति तोकेको र रिलिज हुन नपाएको

२३. एक - १२ चैत २०७६ मा पोष्ट प्रोडक्सन कार्य स्थगन भएको
२४. डेसान - २० फागुन २०७६ देखि छायाङ्कन प्रारम्भ भई १२ चैत २०७६ मा स्थगन भएको
२५. शिरफूल - ९ जेठ २०७७ लाई रिलिज मिति तोकेको र रिलिज हुन नपाएको
२६. उफ यो मन - १४ चैत २०७६ लाई रिलिज मिति तोकेको र रिलिज हुन नपाएको
२७. के घर के डेरा - १५ चैत २०७६ देखि छायाङ्कनमा जाने तयारी
२८. तीन जन्तु - २० फागुन २०७६ देखि छायाङ्कन प्रारम्भ र १२ चैत २०७६ मा स्थगन
२९. षट्कोण - १९ वैशाख २०७७ लाई रिलिज मिति तोकेको र रिलिज हुन नपाएको
३०. नालापानी - २०७७ वैशाखमा रिलिजको तयारी

३१. हेल्लो काशिराम - पोष्ट प्रोडक्सन कार्य हुँदाहुँदै रोकिएको
३२. आरूषी - २ जेठ २०७७ लाई रिलिज मिति तोकेको र रिलिज हुन नपाएको
३३. यो माया कस्तो माया - २०७७ जेठकाे पहिलो सातालाई रिलिज मिति तोकेको
३४. पानी फोटो - ३० साउन २०७७ लाई रिलिज मिति तोकेको र रिलिज हुन नपाएको

३५. माइकल अधिकारी - २८ चैत २०७६ लाई रिलिज मिति तोकेको र रिलिज हुन नपाएको
३६. कठपुतली - २६ वैशाख २०७७ लाई रिलिज मिति तोकेको र रिलिज हुन नपाएको
३७. देवी - २८ कात्तिक २०७७ लाई रिलिज मिति तोकेको र रिलिज हुन नपाएको
३८. फेक फ्रेन्ड - २१ चैत २०७६ लाई रिलिज मिति तोकेको र रिलिज हुन नपाएको

३९. कोपिला - १० साउन २०७६ लाई रिलिज मिति तोकेको र रिलिज हुन नपाएको
४०. परदेशी २ - १६ फागुन २०७६ देखि सुरु भई २१ चैतमा स्थगन भएको
४१. सम्झना बिर्सना - २ जेठ २०७७ लाई रिलिज मिति तोकेको र रिलिज हुन नपाएको
४२. सुस्केरा - १६ जेठ २०७७ लाई रिलिज मिति तोकेको र रिलिज हुन नपाएको/पोष्ट प्रोडक्सन रोकिएको

४३. तु - २०७७ साल दसैँलाई रिलिज मिति तोकेको
४४. विच्छेद - ६ चैत २०७६ देखि छायाङ्कन सुरु भई १५ चैतमा स्थगन भएको
४५. गुञ्जन - २०७६ भदाै महिनादेखि दोस्रो सेड्युल सुरु भई १२ चैतमा स्थगन भएको
४६. चालबाज - १२ असार २०७७ लाई रिलिज मिति तोकेको र रिलिज हुन नपाएको

४७. हेलो जिन्दगी - २०७६ फागुनबाट छायाङ्कन सुरु भई १२ चैतमा रोकिएको
४८. इन्काउन्टर - १४ चैत २०७६ लाई रिलिज मिति तोकेको र रिलिज हुन नपाएको
४९. नीरफूल - ३० फागुन २०७६ लाई रिलिज मिति तोकेको र रिलिज हुन नपाएको
५०. चिसो एस्ट्रे - १६ जेठ २०७७ लाई रिलिज मिति तोकेको र रिलिज हुन नपाएको

५१. अनटाइटल - रेखा थापाको चलचित्र - वैशाखकाे पहिलो हप्ताबाट छायाङ्कनमा जाने तयारी
५२. बद्री बहादुर - १६ चैत २०७६ लाई रिलिज मिति तोकेको र रिलिज हुन नपाएको
५३. वडा अध्यक्ष - ३० जेठ २०७७ लाई रिलिज मिति तोकेको र रिलिज हुन नपाएको
५४. चपली हाइट ३ - २८ चैत २०७६ लाई रिलिज मिति तोकेको र रिलिज हुन नपाएको

५५. जारी - २३ जेठ २०७७ लाई रिलिज मिति तोकेको र रिलिज हुन नपाएको
५६. आमा - प्रदर्शनताका कोभिडको बन्दाबन्दीले स्थगन भएको
५७. सेन्टी भाइरस - प्रदर्शनताका कोभिडको बन्दाबन्दीले स्थगन भएको
५८. आई एम ट्वान्टी वान - वैशाखकाे पहिलो साताबाट छायाङ्कनमा जाने तयारी

५९. लप्पन छप्पन २ - १२ वैशाख लाई रिलिज मिति तोकेको र रिलिज हुन नपाएको
६०. निम्तो - २०७६ जेठमा रिलिजको तयारी
६१. ऐना झ्यालको पुतली - पोष्ट प्रोडक्सन भइरहेको
६२. मेरो हजुर ४ - २७ फागुन २०७६ देखि छायाङ्कन सुरु भई १२ चैतमा स्थगन भएकाे

६३. गोर्खे - २ जेठ २०७७ लाई रिलिज मिति तोकेको र रिलिज हुन नपाएको
६४. लै बरी लै - २ जेठ २०७७ लाई रिलिज मिति तोकेको र रिलिज हुन नपाएकाे
६५. हृदयभरि - प्रभावित

प्रकाशित मिति: शुक्रबार, असार २६, २०७७ ०६:३८