कलाकारका दु:ख; स्यानिटाइजर दल्याे सुटिङ गर्‍याे

A+ A A-

लकडाउनका कारण नेपाली हाँस्य टेलिसिरियलहरु रोकिएका थिए । छायांकन गर्न सक्ने अवस्था नभएपछि सिरियलहरुको प्रशारण रोकिएको थियो । केही सिरियलले भने एकै पटक तीन एपिसोडसम्म खिचेर 'स्टक' राखेका थिए । तर, लकडाउन तीन महिनासम्म भएपछि उक्त 'स्टक'ले पनि धान्न सकेन ।

अहिले भने लकडाउन केही खुकुलो बनेको छ । खेल र मनोरञ्जन बाहेकका उद्येग तथा व्यापार-व्यवसाय सुरु भइसकेको छ ।

लुजडाउन सुरु भएपछि केही सिरियलहरुले पनि छायांकन तथा प्रशारण सुरु गर्न थालेका छन् । केही सिरियलहरु प्रशारणको अन्तिम तयारी गरिरहेका छन् ।

लकडाउन सुरु भएको तीन सातासम्म प्रशारण भएको 'मेरी बास्सै' पनि केही समय रोकियो । केही समयको विश्रामपछि अहिले पुन: मेरी बास्सैको प्रशारण सुरु भएको छ । 'मेरी बास्सै'ले अहिले नयाँ ७ भागको प्रशारण सकाइसकेको छ ।

मेरी बास्सैका निर्देशक मनराज श्रेष्ठ उच्च सतर्कता अपनाएर सिरियल छायांकन गरिएको बताउँछन् । उनले भने- 'हामीले हाम्रो लोकेशनलाई पनि नजिक सारेका छौँ । गाडीदेखि स्पोर्टसम्म माक्स र सेनिटाइजरको प्रयोग गरेर काम गरिरहेका छौँ ।'

कलाकारहरुलाई एक-एक गर्दै पालैपालो छायांकन गराइएको निर्देशक श्रेष्ठको भनाई छ । उनले भने- 'आर्थिक स्थिति कमजोर भएका कारण पनि हामीले काम गर्नै परेको हो ।'

त्यस्तै, सिरियल 'हल्का रमाइलो'ले आफ्नो प्रशारण सुरु गरेको तीन साता भइसक्यो । दर्शकको उच्च माग भएका कारण यस सिरियलको प्रशारण सुरु गर्नुपरेको निर्देशक मरिचमान श्रेष्ठ 'बल्छी धुर्बे' बताउँछन् ।

उनले भने- 'हामी रोकिएको लामो समय भएकाले नयाँ भाग चाहिएको माग गर्दै दर्शकहरु निकै म्यासेज गर्न थाल्नुभयो । उहाँहरुको माग पूरा गर्नलाई पनि हामीले सुरु गरेका हौँ ।'

सिरियल सुरु गर्नुको अर्को कारण कलाकारको आर्थिक अवस्था पनि भएको मरिचमान बताउँछन् । उनले भने- 'अहिले सबै कलाकारहरुको आर्थिक अवस्था नाजुक भइसकेको छ । त्यसैले पनि हामीले सुरु गरौँ ।'

मरिचमान उच्च सतर्कता अपनाएर तथा सामाजिक दुरी कायम गरेर छायांकन गरिएको बताउँछन् ।

घरमा बस्दा वक्का भएका मरिचमान अहिले आफू सिरियलको कामले व्यस्त हुन पाएकोमा खुसी छन् । उनी भन्छन्- 'घरमा बस्दा बस्दा जो कोही दिक्क हुनुभएको थियो । म यता काम गरेर फ्रेस भइरहेको छु भने दर्शकलाई सिरियलबाट फ्रेस गराउने प्रयासमा छु ।'

मरिचमानले यसै लकडाउनको समयमा अर्को सिरिज पनि सुरु गरे, 'लकडाउन' । यस सिरिजमा भने मरिचमान र उनकी श्रीमति करुणा फिचर हुन्थे । अहिले पनि त्यसको प्रशारण चलिरहेको छ ।

यस विषयमा मरिचमान भन्छन्- 'हामीले यसलाई रोक्दैनौँ । श्रीमती व्यस्त भइन् भने अर्को कोही कलाकार राखेर नाम परिवर्तन गरेर भए पनि यसलाई निरन्तरता दिनेछाै‌ं ।'

यहीँ बीचमा 'अत्ति भो', 'गोलमाल' लगायतका सिरियलहरुले पनि आफ्नो प्रशारण सुरु गरिसकेका छन् ।

सिरियलहरुमा निकै चर्चित रहेको सिरियल 'सक्किगोनी'का टिम पनि अब सुरु गर्ने तरखरमा छन् । उनीहरु अहिले योजना बनाउनमा व्यस्त छन् ।

निर्देशक अर्जुन घिमिरे 'पाडेँ' अब छिट्टै 'सक्किगोनी'को नयाँ भाग हेर्न पाउने बताउँछन् । उनले भने- 'हामी अहिले कसरी गर्न सकिन्छ भन्ने तयारी गरिरहेका छौँ । केही दिनमा नै टुंगो लगाएर काम सुरु गर्नेछौँ ।'

सक्किगोनीको नयाँ भागलाई दर्शकले निकै प्रतिक्षा गरिरेका छन् । जुन सक्किगोनी टिमलाई आउने म्यासेजबाट पनि पत्तो पाउन सकिन्छ । अर्जुन भन्छन्- 'दर्शकहरु पूरानो एपिसोड सात पटक हेरिसकेँ, नयाँ एपिसोड चाहियो भन्दै म्यासेज गर्नुहुन्छ । त्यहीँ कारण पनि हामी सुरु गर्ने तयारीमा छौँ ।'

अर्को हाँस्य सिरियल 'भद्रगोल' भने तत्काल सुरु हुने पक्षमा छैन । अझै केही सातापछिमात्र यसको प्रशारण सुरु हुने निर्देशक अशोक धिताल बताउँछन् । उनले भने- 'हाम्रो साउन १ गतेबाट प्रशारण सुरु गर्ने भन्ने कुरा भएको छ । हेरौँ कतिसम्म सफल हुन्छौँ ।'

प्रकाशित मिति: शुक्रबार, असार १२, २०७७ १७:००