विपक्षी नेता गुआइदोलाई देश नछोड्न आदेश

A+ A A-

भेनेजुएलाको सर्वोच्च अदालतले विपक्षी नेता हुवा गुआइदोलाई देश छाड्न प्रतिबन्ध लगाएको छ । अदालतले उनको बैंक खातापनि रोक लगाएको छ ।

भेनेजुएलाका महान्यायाधिवक्ता तारेक विलियम शाबले गुआइदोमाथि प्रतिबन्धको आह्वान गरेका थिए जसको पक्षमा त्यहाँको सर्वोच्च अदालतले निर्णय सुनाएको हो ।

गत साता गुआइदोले आफूलाई देशको ’निमित्त नेता’ घोषणायता भेनेजुएलामा सत्ताको लागि संघर्ष चुलिएको थियो । त्यसपछि सर्वोच्च अदालतको यस्तो आदेश आएको बिबिसीले जनाएको छ ।

राष्ट्रपति मडुरोको पक्षमा रहेको सर्वोच्च अदालतले महान्यायाधिवक्ता तारेक विलियम शाबले विपक्षी नेता गुआइदोमाथि लगाउनु पर्ने प्रतिवन्धहरूको आह्वान गरेपछि मंगलबार तुरुन्तै तिनको अनुमोदन गरेको हो । विपक्षी नेता गुआइदोले देशमा शान्ति र सुव्यवस्थामा खलल र्पुयाएका कारण पछिल्लो अवस्थाबारे प्रारम्भिक अनुसन्धान पूर्ण नहुन्जेल देश छाड्न नपाउने महानन्यायाधीश माइकेल मोरेनोले आदेश दिएका छन् ।

संसद्मा उपस्थित भइसकेपछि पत्रकारहरूसँग बोल्दै विपक्षी नेता गुआइदोले अदालतको सो कदम नयाँ नभएको बताएका छन् । गुआइदोलाई भेनेजुएलास्थति अमेरिकी बैंक खाताहरू नियन्त्रणको जिम्मा घोषणा गरेपछि उनीमाथि प्रतिवन्धका विषय उठाइएका हुन् ।

गुआइदोमाथि प्रतिबन्धका खबर बाहिर आएपछि त्यसको प्रतिक्रिया दिँदै अमेरिकी राष्ट्रिय सुरक्षा सल्लाहकार जन बोल्टनले भेनेजुएलाका महान्यायाधिवक्ता शाबलाई ‘पूर्व महान्यायाधिवक्ता’ बताउँदै गुआइदोमाथि कुनै किसिमको हानि गर्नेले गम्भीर परिणाम भोग्न पर्ने चेतावनी दिएका छन् ।

प्रकाशित मिति: बुधबार, माघ १६, २०७५ १०:५६