अन्ना हजारे पुन अनसनमा

A+ A A-

भारतीय समाजसेवी अन्ना हजारेले लोकपाल तथा लोक आयुक्त नियुक्तीमा केन्द्र सरकार उदासिन भएको भन्दै पुन आजदेखि अनसन शुरु गरेका छन् ।

आज बिहान १० बजेदेखि महाराष्ट्रस्थित आफ्नै घर रालेगण सिद्धिमा अनसन शुरु गरेका हुन् । बिबिसी हिन्दीसंगको कुराकानीमा अन्नाले आफुले प्रधानमन्त्री नरेन्द्र मोदीलाई सत्तामा आएपछि ३४ पटक पत्राचार गरेपनि उनले एउटा पनि पत्रको जवाफ नदिएको आरोप लगाएका छन् ।

केन्द्र सरकारमा लोकपाल तथा राज्यहरुमा लोक आयुक्त नियुक्त गर्नुपर्ने आफ्नो पुरानो मागमा सरकार उदासिन भएको उनले बताए । मोदीले बिभिन्न बाहानामा पाँच वर्ष बिताएको तर लोकपाल र लोकआयुक्त नियुक्त गर्न आनाकानी गरिरहेको उनको भनाई छ ।

लोक आयुक्तले प्रधानमन्त्री तथा मन्त्री परिषदका कुनैपनि नेताका विरुद्ध प्रमाण पेश गर्न सक्ने तथा प्रमाणको परीक्षण समेत गर्ने भएकाले यो कानून पारित गर्न संसदले नचाहेको अन्नाको दाबी छ ।

अहिले भ्रष्टाचार कम भएन र ? भन्ने प्रश्नमा उनले आफु विभिन्न स्थानमा जादाँ गरिब जनताले पैसा नदिई सरकारी सेवा प्राप्त गर्नै नसक्ने अवस्था भएको भन्दै भ्रष्टाचार कम नभएको जवाफ दिए ।

स्वामीनाथन आयोगले दिएको प्रतिवेदन कार्यान्वयन गर्न पनि सरकारसंग माग गरेको छ । स्वामीनाथन आयोगले कृषकहरुको बैंकबाट लिएको ऋण मिनाहा गर्न सुझाव दिएको थियो । उनले सत्तामा आएपछि प्रतिवेदन कार्यान्वयन गर्ने प्रतिवद्धता जनाएपनि कार्यान्वयन नगरेको उनको आरोप छ ।