हल सञ्चालनको माग गर्दै हलवाला, फिल्म रिलिज गर्न तयार छैनन् निर्माता !

A+ A A-

कोरोना भाइरसको त्रासका कारण लकडाउन सुरु नहुँदै चलचित्र हलहरू बन्द भए । प्रदर्शनरत चलचित्रहरूको प्रदर्शन रोकियो । रिलिजको तयारीमा रहेका चलचित्रहरूले पनि रिलिज हुन पाएनन् ।

हलमा चलचित्र 'आमा' र 'सेन्टी भाइरस' प्रदर्शनरत थिए । सेन्टी भाइरसले खासै दर्शक पाएको थिएन । आमा हेर्न केही दर्शक हलसम्म पुगिरहेका थिए । तर, हल बन्द हुदा 'आमा'ले पनि व्यापारिक घाटा बेहोर्नुपर्‍यो ।

त्यस्तै, चलचित्र 'म यस्तो गीत गाउँछु-२' रिलिजको अन्तिम चरणमा पुगेको थियो । रिलिजको एक साता मात्र बाँकी रहँदा चलचित्र पूर्ण रूपमा तयार भइसकेको थियो । निर्माण पक्षले चलचित्रको प्रचार-प्रसार पनि गरिसकेको थियो ।

निर्माण पक्षले प्रचार-प्रसारमा खर्च गरेको रकम पनि बालुवामा पानी शहर नै भयो । किनभने अब नयाँ मितिमा चलचित्र रिलिज गर्दा पुन: प्रचार-प्रसार गर्नुपर्ने हुन्छ ।

त्यस्तै, यसै लकडाउनका कारण 'नीरफूल', 'प्रेम गीत-३', 'चपाली हाइट-३', 'हिजो आजका कुरा', 'लक्का जवान'लागयत चलचित्र रिलिज हुन पाएनन् । यी चलचित्रहरूले पनि आर्थिक रूपमा घाटा नै बेहोर्नु परेको निर्माण पक्षले गुनासो गरिरहेका छन् ।

अहिले लकडाउन केही खुकुलो बनिरहेको छ । अन्य क्षेत्र तथा उद्योगहरू केही चलायमान भएका छन् । तर, चलचित्र क्षेत्र अहिले नै सञ्चालन भइहाल्ने अवस्था छैन । सबैभन्दा उच्च जोखिमको क्षेत्र भएकाले पनि यसलाई सरकारले अन्त्यमा खोल्ने योजना बनाएको छ ।

तर, हलवालाहरू अब उच्च सतर्कता अपनाएर हल सञ्चालन गर्नुपर्ने माग गरिरहेका छन् । केही दिनअगाडि हलवालाहरूको छाता संगठन चलचित्र संघले सरकारलाई बुझाएको ज्ञापनपत्रमा पनि हल सञ्चालन गर्ने अनुमतिको माग गरिएको छ ।

संघका कोषाध्यक्ष तथा हल संचलक गोपालकाजी कायस्थ हल संचलनको अनुमति मागेको बताउँछन् । 'कोरोनाको उच्च जोखिममा रहेका अन्य देशहरूमा पनि उच्च सतर्कता अपनाएर हल सञ्चालन भइरहेका छन्,' उनले भने, 'त्यसैले हामीले पनि उच्च सतर्कता अपनाएर हल सञ्चालन गर्ने सोच बनाएका हौँ ।'

सामाजिक दूरी कायम गर्दै दर्शकलाई चलचित्र देखाउन सकिने गोपालको विश्वास छ । 'हामी दर्शकहरूबीच दूरी कायम राखेर नै सिटमा राख्छौँ । त्यसो हुदाँ जोखिम कम हुन्छ,' उनल भने,

चलचित्र वितरक पनि अब चलचित्र हल सञ्चालन गर्नुपर्ने पक्षमा देखिन्छन् । वितरक करण श्रेष्ठ 'क्रेजी' उच्च सतर्कताका साथ हलहरू सुरु गर्न सकिने बताउँछन् ।

यस्तो समय चलचित्र क्षेत्रका व्यक्तिहरू एकजुट भएर अगाडि बढ्नुपर्ने वितरक श्रेष्ठ बताउँछन् । 'अहिलेको समय भनेको निर्माता, वितरक, हलवालादेखि विकास बोर्डसम्म एकजुट भएर अगाडि बढ्नुपर्छ,' उनले भने, 'एकआपसी समझदारीमा चलचित्र क्षेत्रलाई चलायमान बनाउन जरुरी देखिन्छ ।'

यता, हलवाला तथा वितरकहरू चलचित्र रिलिजको पक्षमा देखिए पनि निर्माताहरू अहिले नै चलचित्र रिलिज गर्ने पक्षमा छैनन् । उनीहरू अहिले हलमा दर्शक नआउने डरले चलचित्र रिलिज गर्न डराइरहेका छन् ।

गत वर्षको २८ चैतमा रिलिज हुने भनिएको चलचित्र 'प्रेम गीत-३'का निर्माता सन्तोष सेन लकडाउन खुले पनि तत्कालै चलचित्र रिलिज गर्ने पक्षमा छैनन् । उनले चलचित्र दशैँमा रिलिज गर्ने लक्ष्य बनाएका छन् । तर, यसमा पनि उनी पक्का भने छैनन् ।

'अहिले नै चलचित्रको रिलिज मिति पक्का गरिहाल्ने अवस्था छैन । अवस्था सामान्य भएछ भने दशैंमा रिलिज गर्नेछौँ,' सन्तोषले भने, 'नत्र, अर्को नयाँ वर्षलाई लक्षित गर्दै चैतमा पुग्नेछौँ ।'

त्यस्तै, चलचित्र 'म यस्तो गीत गाउँछु-२' निर्देशक सुदर्शन थापा पनि चलचित्र तत्काल रिलिज नगर्ने बताउँछन् । चलचित्र क्षेत्र केही चलायमान भएपछि मात्र चलचित्र रिलिज गर्ने उनको लक्ष्य छ ।

'अहिले नै चलचित्रको रिलिजको विषयमा सोचेर टाउको दुखाउने मन छैन । अवस्था सामान्य भएपछि नै यसको बारेमा सोच्नुपर्ला' सुदर्शन भन्छन् ।

चलचित्र 'लक्का जवान'का निर्माता किरण केसी हल खुले पनि अहिले नै चलचित्र रिलिज गर्ने मुडमा छैनन् । 'अहिले रिलिज गरेर को दर्शक आउँछ र हलमा ?' उनी भन्छन् ।

अवस्था सामान्य र हलमा दर्शकको चलायमान सुरु नभएसम्म रिलिजको विषयमा नसोच्ने किरणले बताए ।

विदेशी चलचित्रले बजार चलायमान बनाउला त ?

अहिले नै कुनै पनि नेपाली निर्माताले चलचित्र रिलिजको आँट नगर्दा आस विदेशी चलचित्रको छ । हलिउड तथा बलिउडका चलचित्र रिलिज गरेर चलचित्र क्षेत्रलाई चलायमान बनाउने जोश हल सञ्चालकहरूको रहेको छ ।

चर्चित तथा दर्शकले हेर्न चाहेका केही विदेशी चलचित्र र पुराना हिट नेपाली चलचित्रलाई पुन: रिलिज गरेर हललाई चलायमान बनाउन सकिने उनीहरूको विश्वास रहेको छ ।

निर्माता किरण केसी पनि अहिलेको समय विदेशी चलचित्र र पुराना नेपाली चलचित्र रिलिजको विकल्प नभएको बताउँछन् । 'अरू चलचित्र नभएपछि विदेशी चलचित्र नचलाएर के गर्नु त ! बरु विदेशी चलचित्रले दर्शक तान्यो भने केही चलायमान होला कि !' उनले भने ।

कुनै समय विदेशी चलचित्रलाई कोटा प्रणाली लागू गर्नुपर्छ भन्ने निर्माताहरू अहिले विदेशी चलचित्रले नै चलचित्र क्षेत्रलाई चलायमान गराइदिए हुन्थ्यो भन्ने आस गरिरहेका छन् ।

प्रकाशित मिति: बुधबार, असार १०, २०७७ १५:१२