पूर्वमन्त्रीले भाँचिदिए श्रीमतीको नाक, १२ घन्टापछि मृत घोषणा

A+ A A-

कजाकिस्तानका पूर्वअर्थमन्त्री कुआनडिक बिशिमबायेभले कुटपिट गरी श्रीमतीको हत्या गरेको तथ्य बाहिर आएको छ ।

घटना गत वर्ष नोभेम्बरको हो । जतिबेला अल्मैटी शहरको एक रेस्टुरेन्टमा ३१ वर्षीया सन्तनत नुकेनोभाको शव फेला परेको थियो । हालै अदालतमा भएको सुनुवाइका क्रममा रेस्टुरेन्टको ८ घन्टाको सीसीटीभी फुटेज देखाइएको थियो ।

भिडियोमा ४४ वर्षीय बिशिमबायेभ आफ्नी पत्नीसँग रेस्टुरेन्टमा आएको देखिन्छ । जहाँ उनले पत्नीमाथि घुस्सा प्रहार गर्छन् । सीसीटीभी फुटेजमा उनले पत्नीको कपाल समातेर थिच्छन् र अर्को कोठामा लिएर जान्छन् । अर्को कोठामा लगेर कुटपिट गर्छन् ।

महिला पतिबाट बच्नका लागि शौचालयमा लुक्दासमेत ढोका फोडेर बाहिर निकाल्छन् । लगातारको कुटपिटबाट महिला बेहोस हुन्छिन् । घटनाको १२ घन्टापछि पुगेका प्रहरी र स्वास्थ्यकर्मीले महिलालाई मृत घोषित गरेका थिए । पटक–पटक कुटाइका कारण नाकको हड्डी भाँचिएको थियो भने अनुहार, टाउको र हातमा चोट देखिएको थियो ।

अदालतले टर्चर, हिंसा र हत्याको आरोपमा पूर्वमन्त्री बिशिमबायेभलाई २० वर्षको जेल सजाय सुनाएको छ । यो हत्याको घटनाले कजाकस्तानमा घरेलु हिंसालाई लिएर प्रश्न खडा भएका छन् । यो घटनापछि ११ अप्रिलमा कजाकिस्तानको संसदले घरेलु हिंसाविरुद्ध कडा कानुन बनाउन विधेयक पारित गरेको छ ।