गाजामा इजरायली विनाशको कहरः खण्डहर बनेको गाजाको पुनर्निर्माण कहिले होला सम्भव ?

गाजामा इजरायली विनाशको कहरः खण्डहर बनेको गाजाको पुनर्निर्माण कहिले होला सम्भव ?

तस्वीरः एएफपी ।

A+ A A-

इजरायल र हमासको युद्धमा सबैभन्दा ठूलो नोक्सानी गाजापट्टीले झेल्नुपरेको छ । ७ महिना लामो युद्धका क्रममा गाजा लगभग ध्वस्त भइसकेको छ ।

संयुक्त राष्ट्रसंघको रिपोर्टअनुसार गाजालाई पुनः उभ्याउन वर्षौं लाग्नेछ । रिपोर्टमा करिब ७ महिनाको इजरायली बमबारीमा गाजाका भवनहरू भग्नावशेषमा परिणत भएका छन् । जुन युद्धमा गाजाले अर्बौं डलरको क्षति भोगेको छ ।

राष्ट्रसंघको तथ्यांकअनुसार गाजामा करिब ८० हजार घर नष्ट भएका छन् । सन् २०२३ अक्टोबरमा इजरायलमाथि हमासको हमलापछि इजरायलले आफ्नो पूरै शक्ति लगाएर गाजालाई धूलोमा परिणत गरिदिएको छ । रिपोर्टअनुसार गाजामा आजै युद्ध अन्त्य भएर इजरायली बमबारी र जमिनबाट गरेको हमलाबाट नष्ट भएका घरहरू निर्माण गर्न सुरु गर्ने हो भने पनि पूर्ण रूपमा अहिलेको अवस्थामा ल्याउन सन् २०४० सम्मको समय लाग्नेछ ।

स्याटेलाइट तस्वीरका आधारमा तयार गरिएको रिपोर्टमा गाजामा ८५.८ प्रतिशत स्कुल ध्वस्त भएका छन् । जसमध्ये ७० प्रतिशत अब नयाँ बनाउनुपर्नेछ । यूएनडीपीका अरब स्टेट्सका क्षेत्रीय ब्युरोका निर्देशक अब्दुल्लाह अल दरबारीले पूर्वी जेरुसेलम, वेस्ट बैंक र गाजाको मानव विकास सूचकांक २० वर्षयताकै कमजोर अवस्थामा पुगेको उल्लेख गरेका छन् ।

गाजामा गरिबी बढेर ६०.७ प्रतिशत भएको छ । यसरी हेर्दा मध्यम वर्गको एउटा ठूलो हिस्सा गरिबीको रेखामुनि आएको छ । यो युद्धका क्रममा गाजामा ३४ हजारभन्दा बढीको मृत्यु भएको छ ।

मारिनेमा ७० प्रतिशत महिला र बालबालिका छन् । मृतकमध्ये १७० संयुक्त राष्ट्रसंघका कर्मचारी, ७ जना वर्ल्ड सेन्ट्रल किचेनका कर्मचारी पनि छन् भने ९० जनाभन्दा बढी पत्रकार मारिएका छन् । हालसम्म गाजाका २३ लाख मानिस आफ्नो घर छाडेर शरणार्थी शिविरमा पुगेका छन् ।

प्रकाशित मिति: शुक्रबार, वैशाख २१, २०८१ १४:००