गाजाक्षेत्रमा विनाशको स्तर अकल्पनीय, पुनर्निर्माण गर्न ८० वर्ष लाग्ने

A+ A A-

हमास र इजरालयबीचको युद्धका कारण प्यालेस्टाइनीको बसोबास क्षेत्र गाजा तहसनहस बनेको छ । संयुक्त राष्ट्र संघका अनुसार, गाजाको विनाश अकल्पनीय छ । यसको पुनर्निर्माण गर्न ४० अर्बभन्दा बढी डलर खर्च हुनेछ । समाचार संस्था अल जजिराका अनुसार, यति खर्च गरे पनि गाजाको पुनर्निर्माण गरिसक्न ८० वर्ष लाग्न सक्छ । मानवीय क्षति पनि अभूतपूर्व स्तरमा छ ।

७ अक्टोबरमा इजरायलमाथि हमासको आक्रमणसँगै युद्ध सुरु भएको थियो । त्यसपछि कम्तीमा ४३ हजार ५ सय ९६ प्यालेस्टाइनी मारिएका छन् । ७७ हजार ८ सय १६ जना घाइते भएका छन् । इजरायलतर्फ मृत्यु हुनेको संख्या १ हजार १ सय ३९ जना छ । दर्जनौँ मानिस अहिले पनि हमासको नियन्त्रणमा छन् ।

दोस्रो विश्वयुद्धयताकै धेरै स्रोत, साधन खर्च हुनेगरी गाजामा क्षति भएको राष्ट्र संघका अधिकारीले बताएका छन् । संयुक्त राष्ट्र विकास कार्यक्रम (यूएनडीपी) को अरब राज्य क्षेत्रीय ब्युरोका निर्देशक अब्दुल्ला अल दारदारीले बिहीबार एक अनलाइन समाचार ब्रिफिङमा भने, ‘हामीले सन् १९४५ पछि यस्तो देखेका थिएनौँ । यति तीव्रताले यति कम समयमा यति ठूलो विनाश ।’

इजरायल र हमासबीच युद्धविराम गराउने प्रयासमा अन्तर्राष्ट्रिय मध्यस्थकर्ता लागिरहेका छन् । यसैबीच नयाँ संकेतका रूपमा हमासले युद्धविराम वार्ताका लागि इजिप्टमा एक प्रतिनिधिमण्डल पठाएको अल जजिराले लेखेको छ ।

अमेरिका पनि गाजामा युद्ध रोक्न पछिल्लो समय दबाबमा छ । त्यहाँका विश्वविद्यालयहरूमा गाजा युद्धको विरोधमा प्रदर्शन भइरहेका छन् ।