काठमाडौँ। सहाना प्रधान स्मृति यू-१९ पुरुष तथा महिला भलिबल प्रतियोगिताको पहिलो संस्करण आजदेखि सुरु भएको छ। सहाना प्रधान प्रतिष्ठानद्वारा आयोजित प्रतियोगिताको आइतबार प्रधानमन्त्री पुष्पकमल दाहाल ‘प्रचण्ड’ले उद्घाटन गरेका छन्।
दशरथ रंगशालामा जारी प्रतियोगिता उत्साहजनक रूपमा सुरु भएको प्रतिष्ठानकी अध्यक्ष रामकुमारी झाँक्रीले जानकारी दिइन्। पूर्वशहरी विकास मन्त्री एवं नेकपा एकीकृत समाजवादीकी सचिव समेत रहेकी झाँक्रीले साहना प्रधान प्रतिष्ठानले अब हरेक वर्ष खेलकुद प्रतियोगिता गर्ने पनि बताइन्।
उनले नेपालमा भलिबल खेल अत्यन्तै लोकप्रिय भए पनि अत्यन्त न्यून खेल पूर्वाधार एवं कम बजेट रहेको भन्दै प्रधानमन्त्री ‘प्रचण्ड’लाई त्यसतर्फ ध्यान दिन आग्रह समेत गरेकी थिइन्।
उद्घाटन समाराेहमा बाेल्दै प्रधानमन्त्री पुष्पकमल दाहाल ‘प्रचण्ड’ले सहाना प्रधान नेपाली वामपन्थी आन्दोलनको एक जना शिखर व्यक्तित्व भएको उल्लेख गर्दै सामन्ती पञ्चायती व्यवस्थाविरुद्ध कठोर सङ्घर्ष हुँदै २०४६ सालको जनआन्दोलनसम्म आउँदा संयुक्त वाम मोर्चाको नेतृत्वदायी भूमिका निर्वाह गरेको बताए। उनले भने, ‘वैचारिक र सांगठानिक भूमिकाको इतिहासमा प्रधान सधैँ प्रेरणादायी हुनुहुन्छ, रहनुहुन्छ।’
उनले समग्र खेल क्षेत्रको विकास र खेलाडीहरूमा उत्साह र प्रोत्साहनलाई आफूले विशेष ध्यान दिने समेत उल्लेख गरे। प्रतियोगितामा सात वटै प्रदेशका १९ वर्ष मुनिका महिला तथा पुरुष टोलीको सहभागिता छ। पहिलो दिनको खेलमा पुरुषतर्फ कोशी प्रदेशले लुम्बिनी प्रदेशलाई हराएको छ। यही असार १५ गतेसम्म प्रतियोगिताको दुवैतर्फका विजेताले ३ लाख, उपविजेताले २ लाख तथा तेस्रो हुनेले १ लाख रुपैयाँ प्राप्त गर्नेछन्।
![](https://i0.wp.com/purbadharwatch.com/wp-content/uploads/2024/06/WhatsApp-Image-2024-06-23-at-15.57.58-scaled.jpeg?resize=750%2C477&ssl=1)
कार्यक्रममा नेकपा एकीकृत समाजवादीका अध्यक्ष माधवकुमार नेपाल, सम्मानित नेता झलनाथ खनाल, उपाध्यक्षहरू राजेन्द्र पाण्डे, प्रमेश हमाल, महासचिव घनश्याम भुसाल, सचिव जीवनराम श्रेष्ठ, राष्ट्रिय खेलकुद परिषद् (राखेप) का सदस्य सचिव टंकलाल घिसिङ लगायतको उपस्थिति थियो।